I går var det mot normalt, i dag er det normalt. Turen til sjukehuset i dag tidleg var før trafikken hadde starta, og truleg var timen eg hadde fått før rushet sette inn på akutten og, for korridorar og venterom var tome då eg kom inn. Dermed vart eg ført vidare ganske så omgåande, og før eg visste ordet av det, sat eg utanfor eit rom og venta på undersøking, dei måtte bare ordne ein pasient som var innlagd først. Men då ho var ferdig, kunne eg leggje meg på ein benk og overlate den vidare prosessen til ein dansktalande lege som tydelegvis kunne sine ting. Han klemde og trykte på foten min med ultralydscanneren som best han kunne. I dataalderen går bileta digitalt frå den eine PC’en til den andre, så for meg var det bare å gå attende til akutten og vente på resultatet.

Den ventetida vart kort, for det var OL-finale i handball. Dei var alt komne til 2. omgang, og eg trudde mest ikkje mine eigne augo då det var leiing på fem mål etter første omgang, og leiinga auka. Dei smilte og fann kvarandre i dei mest umoglege situasjonar. Mest heile omgangen gjekk før legen kom med resultatet, som heldigvis var positivt for min del. For å vere sikker på at han vurderte rett, drøfta han foten min med ein overlege og, det gjorde ikkje noko, for fjernsynet var godt, og eg var framleis om lag åleine i venteromet.

Konklusjonen på det heile var at eg kunne dra heim utan at dei hadde funne noko spesielt å engste seg over, med andre ord, det var normalt løp i venene mine i høgre foten, sjølv om han ikkje hadde likt sommarvarmen noko særleg.

Men nye dekk vart det ikkje, då eg kom til Mandal, var det stengetid hjå Dekk1, så eg får vel klare meg ei ny veke med dei gamle.

I dag ville huseigar ha styremøte i radiostova, men eg hadde ein avtale om å få nye dekk til bilen, så eg kunne ikkje låse opp for dei klokka 12. Då eg ringde Tarald Myrum, som er styreleiar for å fortelje at han kunne hente nøkkel på Velkomstsenteret og fortalde at han måtte slå av alarmen, verka det som om han vart litt overraska over det med alarm. Men vi har alarm i Valle Radio, den hyler ganske kraftig, det veit eg, for eg kom til å løyse den ut ein gong.

Før eg skulle dra til Mandal, hadde eg ordna ein time hjå fastlegen min, Hallvard Mosdøl. Eg har slite noko med ein fot i sumar og tenkte han kunne finne ei løysing. Men det synte seg at hans løysing var annleis enn eg hadde tenkt, og før eg visste ordet av det, var eg utstyrt med rekvisisjon til akuttmottaket på Sørlandet Sykehus Kristiansand.

-Jaja, dei nye dekka står godt, tenkte eg, og drog til Kristiansand. Litt over klokka 14 kom eg inn og vart registrert. Korridoren var full av folk, og etter ei stund høyrde eg ein sjukepleiar som sa at folk som sat og venta, hadde sete sidan klokka 10. Det var bare å smørje seg med tålmod. -Fredagane er ofte kaos her, var det ei anna som sa.

Ein får høve til å reflektere litt når ein sit slik i ein sjukehuskorridor og ser folk kome og gå. I grunnen var eg glad for at eg ikkje hadde det som dei andre pasientane, det var mange som kom ut att med gipsa arm eller hand. Eg tenkte at eg for det meste har sluppe unna slike skavankar i livet. Ein gut kom med foreldrene, han hadde skadd handa då han spelte handball og faren meinte han heller burde gå over til å spele handball på data, det var ikkje så skadeleg. Sonen bles til det forslaget, tydeleg irritert over at nokon kunne vere så dum som pappa… Ettersom han kanskje skulle få narkose, kunne han verken ete eller drikke, men han fann seg i det med stoisk ro og ein ispose på den skadde fingeren.

Det førte tankane over til handballjentene. Dei skal spele finale i morgon, den har eg gledd meg til å sjå heile veka. Truleg vert det også mot normalt, for sjukehuset kunne ikkje få gjort det dei måtte då eg endeleg kom frå kø i korridoren til undersøkingsromet. Klokka var blitt nærare seks og aktiviteten var gått over på kveldsbluss, og der synte det seg at eg ikkje kunne bli prioritert. I staden fekk eg ny time i morgon klokka 09, og når handballjentene spelar klokka 09.45, spørs det om eg sit i køen eller vil få høve til å sjå kampen.

Det blei altså ein fredagskveld mot normalt. Og knappast ei einaste redigering på wikipedia heile dagen, det er og mot normalt.

Dette spørsmålet har eg fått mange gonger den siste veka. Det verkar som om folk ventar på at Valle Radio skal kome i gang att.

Til alle som har spurt, har eg måtta seie at vi startar ikkje før i september. Men til onsdag, som er siste onsdagen i august, er det kommunestyremøte, og det vil vi overføre.

Eit problem som eg vil dele med dykk, er at vi treng fleire teknikarar. Gudrun Rysstad har teke ein pause etter fleire år bak spakane, og Knut Olav Tveiten er reist på skule og er ikkje heime midt i vekene. Vi vil prøve å setje opp ei liste for å halde sendingane i gang, men det er ingen tvil om at vi treng fleire til å hjelpe oss på teknikarsida om vi skal klare å halde aktiviteten oppe. Har du lyst og høve til å hjelpe, er du svært velkomen.

Styret hadde og fått eit spørsmål om vi ville arrangere rebusløp i kulturveka, men det sa vi nei til, vi kan heller hjelpe arrangørar å få ut informasjon om sine arrangement gjennom radioen. Det er meir det som er naturleg for ei radio.

Britta Lise har gjort eit stort arbeid med å organisere og få på plass nye reklamar. No er dei fleste i boks, det er bare finpuss att. Du har noko å gle deg til, det er gjort ein full gjennomgang av dette stoffet.

Vi hadde seminar før ferien, der vi drøfta kva som er god radio. Vi var innom mange tema, men det var ikkje noko framlegg om å endre på den malen for program som vi har laga, så mønsteret vil verte det same som tidlegare. Så får vi sjå etter kvart korleis det legg seg til rette.

Så svaret på spørsmålet i overskrifta er: -Ja, me startar snart.

Laurdag skreiv eg på bloggen at det kunne bli ein interessant kveld i Valle kyrkje til onsdag, då Bernard Emmelkamp skulle spele konsert. I kveld var han der, og det vart ein interessant kveld. Han hadde rett nok dementert litt i Setesdølen, Heavy Metal var ikkje popmusikksjanger, men eit uttrykk for at orgelets metallpiper skulle brukast på konserten.

Programmet var interessant:

Johan Varen Ugland: Bryllups-intrada
Edvard Grieg: Fire norske dansar, tilrettelagt for orgel av Bjørn Andor Drage http://no.wikipedia.org/wiki/Bj%C3%B8rn_Andor_Drage
Günter Bergmann: Harmonice-Mundi-Iovis, eit moderne stykke i fem satsar
Ludvig Nielsen: Fantasi (Opus 4) over to gamle olsokmelodiar: Ljoset over landet dagna og Dette er dagen som Herren har gjort. http://no.wikipedia.org/wiki/Ludvig_Nielsen

Så kom tre stykke av Bernard Emmelkamp:
I himmelen, i himmelen
I tro under himmelens skyer
Deg være ære

før han avslutta med
Johann Sebastian Bach: Den doriske toccata.

Vel 20 personar hadde funne vegen til Valle kyrkje denne kvelden. Soknerådsleiar Gro Haatveit ønska velkommen før Bernard orienterte om programmet. Opplegget for konserten er planlagt ut frå at den skal spelast i Münster i Tyskland seinare i sommar.

Mange av stykkene har vi hatt med i programmet Postludium i Valle Radio, og Niklos Besteland var til stades for å få med seg levande orgelmusikk, til inspirasjon for programma til hausten.

-Vi har eit strålande instrument i Valle kyrkje, det burde vore brukt mykje meir til konsertar, sa han og berømma Bernard for konserten.

Tonhild Kråkenes, kantor i Valle og Bykle, hjelpte Bernard med registrering av orgelet under konserten. I ein prat etter konserten, det var kyrkjekaffe og høve til å slå av ein prat, kunne ho fortelje at dei planla at ungdommar frå Kulturskulen skulle vere med ved gudstenestar i Valle kyrkje i haust, mellom anna var det planen at eit band skulle spele saman med orgelet. Ho såg fram til det og vona at fleire på den måten ville få augene opp for det flotte instrumentet og kome til kyrkje for å høyre dei unge spele.

Det er så mange endringar i bygdom kome til, skreiv Ivar Aasen. I alle fall var det det eg trudde han skreiv. Men då eg søkte på nettet, kom eg til denne nettstaden, og her var verset noko annleis:

Der er so mange Hendingar
i Bygdom komne til;
me sjaa so mange Vendingar
20 alt paa eit litet Bil.
Dei hava snutt um Vollarne
og flutt og rudt og bygt;
men dei gode gamle Kollarne
dei standa lika trygt.

Songen heitar Dei gamle fjelli, og om han skreiv det då han var i Valle, er lite truleg. Det kunne vore skrive kor som helst i landet, akkurat dette verset i alle fall.

Når eg kom i tanke om verset, var det fordi i løpet av dei par dagane som eg har vore i Valle att etter sommarferien, så har eg fått melding om mange endringar. Nokre flytter, andre får seg ny bil, nye fjes dukkar opp på skulen og i gata. Det er endringar.

I Valle Radio er det endringar i teknikarstaben før sesongen. Det er grunnen til at eg ikkje har sett opp lista for komande sendingar enno. Men no har eg kalla inn til styremøte torsdag, så må vi få diskutert litt og sjå korleis vi skal gjere det framover. Framlegg til løysing hadde vore flott å få, kanskje du som les dette skulle melde deg som teknikar og hjelpe oss i haust.

Etter kvart ser vi endringar og i naturen. Det blir kaldare att, snart er hausten over oss. Nyt dagane medan du kan.

Åremålsdagar kjem og går. Eg trur Britta Lise hugsar på dei fleste, og i kveld kom det ein epost frå henne. Ho er den av medarbeidarane i Valle Radio som på ein særskilt måte spreier varme og har omtanke. Det seier eg utan å blunke, for eg synest det, og det skal ikkje vere til forkleining for andre.

Ferien er over og vi starta opp att i dag. Det har jo blitt nokre telefonar, for born og familie er spreidde over heile landet:
Sigmund og Margareth er på fottur i Rondane,
Margunn og Stein er tilbake i Kristiansand etter å ha vore på Katie Melua-konsert i Hauge i Dalane laurdag
Helge er på jobb i Oslo og har vore det ei stund
Rønnaug og Lars Gustav har fått skulegutt i familien, då Håkon begynte i 1. klasse i dag. Eg trur nok at Kristine misunte han litt, ho må vente eit år.

Bursdagshelsingar i brev er det ikkje så ofte ein får lenger, no er det tekstmelding som gjeld, og søskena mine har lært seg kunsten betre enn eg. Så Solvor og Hermund får få svaret her, dei les jo bloggen og får med seg litt av kvart om Valle Radio.

Men mor sende brev, ho hadde funne eit kort med informasjon om kva som hende i 1947, og så supplerte ho med det som er sjølvopplevd: At det var ein varm sommar og ein dag om lag som dagen i dag. Å nærme seg pensjonsalder og ha foreldre i live, er det få som opplever, men den velsigninga har eg fått, og eg takkar for den. Ho ringte og, halv elleve om kvelden, for ho hadde vore på kvinneforening, dei starta haustsesongen i kveld. Sprekt gjort når ein sjølv er tett på 91.

Og så er det epost, då. Eit av søskenbarna mine, Brit, er ivrig epostar, så eg får stadig rapportar om sykkelturar på Jæren. Ho legg ved bilete, så flotte bilete at ein får heimlengt og undrar seg over alt det ein kan finne av vakre ting når ein er ute og syklar. Eg sa heimlengt, ikkje sykkellengt, det er noko anna.

Ein stor del av dagen i dag var eg ikkje inne og fylgde med på eposten. Då eg i kveld sjekka innboksen min, låg det og ein epost frå Helge Homme med gratulasjon.

Siste eposten eg opna med bursdagshelsing var frå blogg-administrasjonen. Dei oppmoda meg til å skrive om dagen på bloggen. Dermed vart dette innlegget ganske annleis enn det eg skriv om til vanleg. Men det var godt å kome til Valle att og starte skule og møte vener og kjente i bygda.

Det har blitt litt skriving på wikipedia i dag og, Her er ein artikkel eg har hjelpt litt til med tidlegare: http://no.wikipedia.org/wiki/R%C3%B8d_skogsnegl Det er utruleg alt ein kjem borti.

Eg hadde tenkt å late dagen passere stille. Difor laga eg ingen fest for elevane i pausen vår på skulen i dag. Det spørs om eg ikkje må orne noko i morgon når det no vart så offisielt at det til og med kom på bloggen. Den som lever, får sjå. Feiringa med mat hadde vi laurdag då syster mi og mannen var på besøk. Reidun hadde laga Lady Goldenglow-kake, som er ei gamal oppskrift frå Ålgård, og den smaka nesten like godt som eg hugsar frå 50 år tilbake. Her er oppskrift på kaka: http://home.no.net/hleite/ladygold.htm

Kanskje vi skulle verte betre til å markere åremålsdagar i Valle Radio?

Bernard Emmelkamp, som har vore med i fleire program i Valle Radio, skal ha konsert med tema Heavy Metal i Vennesla kyrkje sundagskvelden og onsdagskvelden kjem han til Valle. Sidan skal han til Münster i Tyskland og spele denne konserten.

Eg har jo tenkt på heavy metal som ein type musikk som eg ikkje har sans for. Så eg måtte slå opp på wikipedia for å sjå kva og kven som var teke med i samband med denne musikkstilen. Her er lenka: http://no.wikipedia.org/wiki/Heavy_metal I den artikkelen var det så mykje at eg kunne verte svimlen av mindre.

Eg fann då ut at to musikkgrupper som har vore spelt ein del i Valle radio, høyrde til denne sjangeren. Det var tyske Rammstein, som Theis gjerne fann fram. http://no.wikipedia.org/wiki/Rammstein Dei høyrer til i gruppa Industriell metal, sjå http://no.wikipedia.org/wiki/Industriell_metal

Den andre gruppa, som har vore spelt i Valle Radio når ungdomar har vore her og laga musikkprogram, er Metallica. sjå http://no.wikipedia.org/wiki/Metallica Dei høyrer til gruppa Trash metal, som er ei undergruppe av Heavy metal, akkurat som Industrial metal er det.

I artikkelen i Setesdølen som handlar om konserten, står det at det kanskje er Heavy Metal Falling From The Sky av Jimi Hendrix som kanskje er opphavet til sjangeren. Her er lenke til Jimi Hendrix, men eg fann ikkje den songen når eg leita rundt i artiklane om han: http://no.wikipedia.org/wiki/Jimi_Hendrix

Det kan verte ein interessant kveld i Valle kyrkje til onsdag.

I sommar kom eg over eit hefte som Leonhard Bjarne Jansen gav ut i 1996 i samband med Hans Henrik Holm-seminaret same året. Det var ein Setesdalsbiografi, og her fann eg det som han seier er det meste som er skrive om Setesdal og av folk frå Setesdal. 67 sider var det då. Den som fylgjer med, veit at det er skrive ein del etter den tid. Difor tenkte eg at eg skulle søke i bibsys, som er databasen universitetsbiblioteka brukar for å sjå om det er kome meir. Her er lenka til bibsys om du vil søkje sjølv: http://ask.bibsys.no/ask/action/smpsearch

Her er det eg fann ved å bruke søkekriteriet Valle eller Rysstad og Setesdal:

1. Martin Skjekkeland Hans Henrik Holm 1896-1996 : foredrag omkring 100-årsminnet / [redaktør av heftet: Ånund K. Homme] 1996 ISBN 82-91793-01-8 134 sider

2. Johannes Skar-seminar i Valle 1997 : foredrag 1997 ISBN 82-91820-07-4 67 sider

3. Magnar Undheim: Njardarheim 1999 ISBN 82-995265-0-7 144 sider

4. Svein Inge Olsen m.fl.: Kjempa for Norge og andre setesdøler / [illustrasjoer: Olav Bjørgum] 1999 ISBN 82-476-0128-1 248 sider

5. Ingebjørg Vegestog Homme og May Lis Flateland: Rette klede i Setesdal : frå vogge til grav 1999 ISBN 82-995252-0-9 184 sider

6. Nomeland, Torjus: I mi tid : so levde me på ein gard i Setesdal i fyrste halvdelen av 1900-talet

7. Stølslandskapet på indre Agder : prosjektrapport 2002 Svalheim, Ellen J og Jansen, Leonhard B.

8. Hamran, Ruth: Billedsamlingen i Rygnestadloftet, Valle i Setesdal : fra senmiddelalder til reformasjon og renessanse 2002

9. Mogaard, John O. Mauring, Eirik: Data acquisition and processing : helicopter geophysical survey at Valle, Setesdal 2002

10. Christie, Sigrid: Bildene på Rygnestad 2003

11. Rostrup, Randi: Ein Jær-prest i Valle kyrkje i Setesdal 2003

12. Hageland, Torfinn Normann: Ferdsla i Setesdal i eldre tid 2006

13. Berg, Kirsten Bråten; Rysstad, Astri; Rolfsen, Kari: Stev for dagen 2007

14. Rysstad, Kim André: Tak hardt uti hand 2007

15. Lien, Ole Birger: “Finn ein haldningsmessig representativitet mellom dei tre gruppene folk, administrasjon og politikarar i dei fire kommunane Bykle, Valle, Bygland og Evje og Ho 2008

I søket kjem ikkje forfattarar frå Setesdal fram, bare tema med Setesdal og Valle. Men det vart jo 15 titlar likevel. Og det er sikkert ikkje alle titlane innan dette heller.