Kategoriarkiv: Ymse

Ymse

Leksikonskriving

Legg att eit innspel

Dei fleste av dykk som les bloggen min, har nok etter kvart fått med seg at eg dei siste åra har skrive på leksikonet wikipedia. Vi er mange som gjer det, dei siste par månadene har vi skrive om lag 15.000 nye artiklar. I tillegg kjem all utviding og fiksing og oppdatering av 185.000 gamle artiklar.

I helga leita eg fram mitt leksikon frå 1973,. Gyldendals store konversasjonsleksikon. Stoffet der er jo gått ut på dato for mange av artiklane. Andre folk har kome i fokus, så mange av dei som er omtalt der, er tekne ut i nyare utgåver av leksikonet.

Ettersom eg har vore litt oppteken av å skrive om folk som har dikta salmar, kom eg til Johannes Johnson, far til biskop Alex Johnson. Det fine med wikipedia er at det er plass til omtale av dei som etter kvart ville falle ut av eit papirbasert leksikon. Men ein må helst ha tilgang til papirbasert stoff for å kunne skrive om dei, for det viser seg svært ofte at folk som ikkje er her meir etter at IT-revolusjonen kom, ikkje så lett let seg finne på verdensveven.

Wikipedia er eit leksikon som er lett å ty til. Alle kan redigere der, skrive nye artiklar eller fikse på gamle. Men ganske lenge vil det vere naudsynt å nytte papirbaserte oppslagsverk, ein kan ikkje basere seg på at alt er få finne på internett på lenge enno. Så får vi heller nynne på salmene han skreiv og tenke på ei eldsjel som sleit seg ut i arbeidet for evangeliet på Madagaskar og her heime.

Johnson skrev en rekke bøker, og i Norsk Salmebok finnes det flere salmer av ham:

  • 515 Vår seierssæle helt og drott (fra 1899)
  • 517 Lysenes far, vi takker deg (fra 1912) Melodi av Sigurd Lunde
  • 830 En dalende dag, en stakket stund (fra 1906)

Han har også oversatt den eneste salme vi har fra Madagaskar i Norsk Salmebok:

  • 516 Send ut, o Jesus kjære (oversatt i 1915)

Artikkelen om han finn du her:  http://no.wikipedia.org/wiki/Johannes_Johnson

Ymse

Valle Radio veke 49

Legg att eit innspel

Tysdag 2. desember

Ansvarleg: Harald Haugland

18:00 Kvarteret
18:15 Over ein open Bibel
18:30 Musikk før jol. Händels Messias, del 2
20:00 Aktuelt frå kyrkje og kristenliv
20:30 Postludium. Niklos K. Besteland presenterer musikk til advent.
21:00 Kyrkjebakken

Onsdag 3. desember
Sendinga denne kvelden er flytt til fredag, då blir det sending til Heile dalen. Sjå program i fredagsavisa.

Ymse

Tankereiser

Legg att eit innspel

Når ein ser på TV i desse dagar, kan ein av og til kome til å tenkje at det er betre å reise i tankar enn  fysisk, så slepp ein strande på ein flyplass i Bangkok eller andre problem som måtte dukke opp. Dei flyktningane som vi har venta på i haust, skulle reist frå Bangkok onsdag, men det vart det ikkje noko av, så nå får vi vente lenger på å få dei til Valle.

I det siste har eg bladd litt i ei bok som eg har hatt i hylla mi i mange år. Det er Stig Wernø Holter si bok Kom, tilbe med fryd, ei bok som fortel om hymnologi med utgangspunkt i Norsk Salmebok, men som og tek med mykje interessant stoff frå gamle salmebøker.

Ein av salmediktarane som eg har visst var frå Stavanger, var Jonas Dahl. Så fann eg han i boka til Stig Wernø Holter, og då tenkte eg at eg hadde eit godt utgangspunkt for å skrive ein artikkel om han i wikipedia, nettleksikonet som no nærmar seg 200.000 artiklar, i dag runda vi 197.000, og med den farten folk no lagar nye artiklar, kan ein truleg runde milestolpen alt den komande veka. Så eg tenkte at ein prest og salmediktar og forfattar frå Stavanger bør få vere med på dette og gjekk i gang med å skrive.

Etter kvart som eg samla stoff og skreiv inn i teksten, så vart det ganske så interessant, han hadde vore klassekamerat med Alexander Kielland, han gifta seg i Bergen, fekk si fyrste presteteneste i Vår Frue kirke i Trondheim, drog til Nederland som sjømannsprest, kom heim og var prest på Kongsberg, sidan i Petrikyrkja og Domkyrkja i Stavanger før han avslutta prestetenesta si i Ullern kyrkje i Oslo, der han døydde i 1933. Eg tenkt at eg hadde vore i mange av dei kyrkjene han hadde hatt teneste, og på ulike måtar gått i spora hans mange stader, sjølv om han døydde om lag på den tida foreldrene mine vart fødde.

Son hans, Alf Fasmer Dahl, kom noko nærare meg, for han var prest i Birkeland menighet i Bergen, og der budde eg frå 1973 til 1976. Dei hadde eit kor der som heitte Fasmer Dahls kor, det hadde han starta i si tid. Og så har eg nynna på melodiar han har laga, ikkje minst melodien til farens  Nå vandrer fra hver en verdens krok.

Du kan lese meir om far og son Dahl på wikipedia:  http://no.wikipedia.org/wiki/Jonas_Dahl Der er det lenke til sonen, og hyperlenker på wikipedia kan sende deg og ut på tankereiser. God tur.

Ymse

Kursoppleving

Legg att eit innspel

Som eg skreiv om i går, har eg vore på kurs. Vi har snakka mykje fag, men i sosiale situasjonar hender det at ein kjem inn på personlege relasjonar og. Det høvde slik at eg kom til å fortelje at eg var aktiv i Valle Radio, og då kom det ganske så fort ein kommentar om at den høyrer eg på når eg er på Hovden i påska. Så det var ei stadfesting av det vi jo opplever i påskesendingane, at folk frå store deler av Sørlandet høyrer på oss når dei har høve til det.

Ein av dei eg prata med hadde og møtt min orgelmakkar Niklos K. Besteland og late seg imponere av hans store kunnskap om emnet. Så der var relasjonane til Valle Radio.

Men elles har kurset vore ei god hjelp til å oppdatere seg på den situasjonen utlendingar går gjennom når dei skal ta Norsk Språktest og dermed få eit papir på at dei kan gjere seg forstått på norsk og at dei sjølve forstår det. År om anna er det ganske mange som går gjennom denne testen rundt om i Norge, nokre av dei er frå Valle. Det er ei god hjelp at dei har trening i å bruke språket ikkje bare i situasjonen på skulen, men og frå andre situasjonar, anten det er som praktikant eller arbeidstakar, eller det er i sosiale situasjonar.

I Valle er det etter kvart blitt ganske mange utlendingar, og når dei kjem seg på flyet frå Bangkok, vil det i næraste framtid kome to nye familiar som har bakgrunn frå flyktningleir for burmesarar i Thailand. Minoriteten karenarar i Burma er på heile åtte millionar menneske, altså fleire enn heile befolkninga i Noreg, Svært mange av desse er drivne bort frå heimane sine og har måtta søke tilflukt hos FNs høgkommissær for flyktningar sitt apparat for å verne folk i det området av Asia som i desse dagar er mykje i søkelyset.

Ymse

Kurs

Legg att eit innspel

Å dra på kurs kan vere interessant. No har eg hatt ein heil dag om språkopplæring av innvandrarar. Mange synspunkt å ta med seg, ikkje minst om dei endringane dei må innstille seg på når dei kjem til landet vårt.

Og sanneleg må vi og endre oss.

Ymse

Normisjons si jolemesse i Valle

Legg att eit innspel

Tysdagskvelden var Åse Rike i studio og fortalde om Normisjon si jolemesse som skal vere i Valle menighetshus laurdag 29. november. Det var ei stor glede å få henne til å kome og informere om jolemessa, ho brenn for dette arrangementet som kvinneforeningane Fjellblomen i Valle og Regnbogen i Hylestad står bak. No har dei halde på i 26 år, kunne ho fortelje. Denne gongen kjem Knut Svein Dale og Oluva Laksa frå Normisjon Agder krets.

Det som er spesielt med messa i år, er at dei har salsbord med mange heimelaga ting, mellom anna har dei baka jolekaker som dei vil selje. Mange bakar ikkje lenger sjølv, då kan det vere greitt å ha ein smak av jolebakst slik han var før å setje fram. Som vanleg vil det vere suppe og eplekake på jolemessa, så vel som kaffe, vaflar og kaker. Og åresalet er av godt, tradisjonelt merke med marsipankaker, kransekaker og fruktkorger som hovudgevinst. Så kan ein vurdere kva for ei trekking ein vil kjøpe flest årer i.

Det har og vore tradisjon å ha eit større lotteri med gevinstar på bok. Denne boka ligg ute på Joker i Valle, så om ein ikkje kjem seg på messa, kan ein legge i når ein er på butikken.

I løpet av dagen vert det andakt klokka 13 og familiemøte klokka 16, då kjem Vallle og Hylestad barnekor for å syngje. Og så er det trekking om lag klokka 18, kunne Åse Rike fortelje. År om anna får ein inn hundre tusen kroner til Normisjon sitt arbeid. Normisjon arbeider både i Noreg og har misjonærar rundt om i verda, så organisasjonen treng pengar for å halde oppe arbeidet.

Eg vart så glad då Åse tok utfordringa og sjølv kom i studio for å fortelje om jolemessa. Det er viktig at dei som står midt oppe i eit arbeid, fortel om det dei brenn for. Dei har meir å fortelje enn eg vil ha om eg les opp annonsen frå avisa. Når ein nyttar lokalradio på denne måten, då er det ekte lokalradio, etter mi meining.

Ymse

Program veke 48

Legg att eit innspel

Tirsdag 25. november

Ansvarleg: Harald Haugland

18:00 Kvarteret
18:15 Over ein open Bibel
18:30 Møteplassen
19:00 På konsert
20:00 Kyrkje og kristenliv
20:30 Postludium ved Niklos K. Besteland. Musikk til siste sundag i kyrkjeåret, domssøndagen
21:00 Kyrkjebakken

Onsdag 26. november

Teknikar: Jørund Georg Jore

18:00 Kommunestyremøte

Interessant onsdagskveld i Valle Radio

Til onsdag er det kommunestyremøte att, og sendinga skal overførast i Valle Radio. Det vert eit langt møte for representantane som startar med lunsj klokka 12 og deretter har temamøte om budsjett og innsparing for alle politiske utval, ikkje bare kommunestyret. Det møtet varer til 15:30, så er det pause til klokka 18:00.
Som start på møtet skal det vere opning av S_M-A-R-T smykkeutstilling i Velkomstsenteret. Det er rådgjevar kultur Torunn Charlotte Lund som skal opne utstillinga av arbeid som elevar i utvekslingsprosjektet på Valle vidaregåande skule stiller ut. Du kan høyre det i radioen om du ikkje møter fram.
Deretter vert det tre orienteringar før sjølve kommunestyremøtet:
1. Arbeidet med Rv ) frametter. Signe Sollien Haugå i Setesdal Regionråd
2. Reguleringsplan Valle sentrum. Torgeir Haugaa
3. Tidsreisa – ideskisse for utvikling av Prestfossen kulturlandskap. Torunn Charlotte Lund.

På Valle kommune sine heimesider ligg informasjon om sakene som skal opp i kommunestyremøtet, mellom dei finn vi og saka om gjestebustad til utflutte valldølar. og omgjering av lån til offentleg tilskot.

Ymse

Interessant onsdagskveld

Legg att eit innspel

Til onsdag er det kommunestyremøte att, og sendinga skal overførast i Valle Radio. Det vert eit langt møte for representantane som startar med lunsj klokka 12 og deretter har temamøte om budsjett og innsparing for alle politiske utval, ikkje bare kommunestyret. Det møtet varer til 15:30, så er det pause til klokka 18:00.

Som start på møtet skal det vere opning av S_M-A-R-T smykkeutstilling i Velkomstsenteret. Det er rådgjevar kultur Torunn Charlotte Lund som skal opne utstillinga av arbeid som elevar i utvekslingsprosjektet på Valle vidaregåande skule stiller ut. Du kan høyre det i radioen om du ikkje møter fram.

Deretter vert det tre orienteringar før sjølve kommunestyremøtet:

1. Arbeidet med Rv 9 frametter. Signe Sollien Haugå i Setesdal Regionråd
2. Reguleringsplan Valle sentrum. Torgeir Haugaa
3. Tidsreisa – ideskisse for utvikling av Prestfossen kulturlandskap. Torunn Charlotte Lund.

Her er lenke til kommunestyremøteinformasjon hos Valle kommune:
http://www.valle.kommune.no/councilmeeting.aspx?ObjectType=ePhorteCommitteeMeeting&ePhorteCommitteeMeeting.ID=230

Ymse

Stuvfullt hus og tom lommebok

Legg att eit innspel

Då eg snakka med Ragnar Aas om jolemessa på Rysstad, var han godt nøgd med resultatet både når det gjaldt folk og pengar. Han var særleg takksam for at ordførar Bjørgulv Sverdrup Lund hadde kome med ei helsing i høve at det var 25 år sidan desse jolemessene starta. Og veret hadde vore lagleg jolemessever, ikkje så fint at folk gjekk på heia og ikkje så dårleg at folk sat heime.

Sjølv fekk eg det som truleg blir mi einaste jolemesse i år denne helga. Det var Normisjon si jolemesse i Mandal, og eg tok ein tur dit laurdagskvelden for å høyre Kurt Hjemdal tale. Han talte i ein halv time utan manuskript med utgangspunkt i 1. Peters brev 1, 3: Lova vere Gud, vår Herre Jesu Kristi Far, han som i si store miskunn har født oss på nytt til ei levande von ved Jesu Kristi oppstode frå dei døde! Temaet for talen var Levande von og det var inspirerande å høyre på. Gospelkoret Restart frå Søgne song og det var trøkk i songen deira. Stuvfullt bedehus var det og denne kvelden.

Men så var det tilbake til åresal og sosialt samvær med kaffe og mat. Ulikt messa på Rysstad hadde dei seks gevinstar, så trekkinga tok si tid. Men dei som var der, hadde nok sett av laurdagskvelden til dette. Truleg hadde dei teke ut pengar og, men akkurat som på Rysstad var det ein minibankterminal om nokon gjekk lens. I grunnen er det fort gjort å gå lens på ein slik kveld, det vert fort til at ein kjøper for ein hundrelapp eller to i åresalet. Og så skal ein leggje i på hovudtrekkinga. Og plutseleg er lommeboka tom.

Sjølv vann eg ein pose Sørlandschips denne kvelden. Eg får trøste meg med at andre kveldar har eg ikkje kome så tomhendt heim. Og så hadde eg jo tenkt å støtte arbeidet med nokre kroner, no fekk eg ein triveleg kveld attpå med ei god preik og vakker song.

Ymse

God lokalradio 2

Legg att eit innspel

I dag kan eg fortelje om respons etter innlegget mitt i går. Det gjekk ikkje så langt ut på dagen før det kom ein epost frå vest som ville vite kven som hadde ringt inn frå Brusand. Det synte meg at nokre av familien min fylgjer med på det eg skriv, sjølv om eg har fått kommentar frå andre om at når eg skriv om Valle Radio, så tykkjer dei ikkje det er så interessant. Dei er ute etter at eg skal skrive personleg stoff, men då svarar eg at dei nok finn litt personleg stoff i det eg skriv om Valle Radio, så dei får bare lese mellom linjene.

Like etter kom ein epost frå Per Randa på Brusand. Han fortel:

Eg har ikkje vore på lufta på valle radio før, men oppdaga valle radio i 2001, var ein som sendt nokre klipp derifrå på jærradioen her, og på dei klippa var det Britta Lise som snakka, så eg fann mailen hennar og kontakta hu og har hatt kontakt med hu sidan. Det var dialekten i valle som fascinerte meg, hadde høyrd nokon frå Bykle på fjernsynet ca. ti år før det igjen med omtrent same dialekten.

Vi fekk ein triveleg utveksling av tankar i fleire epostar i løpet av dagen i dag. Så neste gong eg dreg forbi Brusand, sjå http://no.wikipedia.org/wiki/Brusand med eit flott bilete av stranda der, vil eg kunne tenkje på ein eg har brevveksla med som fylgje av Valle Radio og ikkje bare nyte utsikten og sjå på Hitlertennene – krigsminnesmerket som står att på stranda, sjå http://web3.aftenbladet.no/kultur/article75967.ece