Tysdag 28. april

Ansvarleg: Harald Haugland

18:00 Kvarteret
18:15 Over ein open Bibel
18:30 Sangkveld
19:30 Tysdagsmagasin
20:30 Postludium ved Niklos K. Besteland
20:00 Kyrkjebakken

Onsdag 29. april

Teknikar: Jørund Georg Jore

18:00 Kommunestyremøte

Kva kan me gjere for å utvikle kontakt mellom næringslivet i Setesdal, slik at folk og verksemder vert meir synlege? Dette var eit av spørsmåla som var tekne opp på Setesdalskonferansen på Hovden Høyfjellshotell sist veke. Noko som alle var samde om, var at møteplassar som denne konferansen var viktige, og det var difor applaus då det kom signal om at Setesdal Regionråd truleg ville sponse tilsvarande konferansar seinare år, sjølv om det no var slutt på dei sentrale tilskota som hadde vore føresetnad då tiltaket vart starta.

Eit anna tiltak som var nemnd mellom mange, var å bruke lokalradioen meir. Det verka ikkje som om han stod på postlista til alle dei som sender ut pressemeldingar i ulike situasjonar.

Og så dukka ideen om sosiale medier opp. Facebook og wiki er ofte stikkord for slike. Det er medier som fremmar samarbeid om eit tiltak gjennom å gje deltakarar høve til å bidra på ulike måtar. Eg fekk i oppgåve å gjere noko med dette, og det vil eg prøve på. Bloggen er ein god plass å starte, så difor nemner eg det her.

Kan hende burde kommunane sin policy på området endrast. I Kristiansand er det ingen diskusjon, der kan ein vere på facebook om ein er på jobb i kommunen, det synte saka med ordføraren sin feilsending av ein humorvideo tydeleg. Kanskje skulle ein opne for at folk kunne kommunisere raskt og effektivt også i Setesdal…

Då eg var liten, spurde vi kvarandre om kva vi helst ville ha, ein kopp med blod eller sju hol i hovudet. Dei fleste svara nok ein kopp med blod og gløymde å telje dei sju hola vi alt har i hovudet, nasebor, augehol, øyrehol og munn.

Runde dagar kjem oftare etter som åra går. For tre år sidan fylte eit søskenbarn 60 år, og sidan har det gått slag i slag med slike dagar dei siste åra. I kveld var det mi eldste søster som markerte merkedagen ho runda tidlegare i veka, det var ei oppleving å få vere i lag med henne, familie og venner av henne i Lyngdal i kveld.

Ho er av typen som har kontroll på arrangement, men denne kvelden var i stor grad overlevert til born, og det var ikkje mindre triveleg. Tidlegare i vinter hadde ho og mannen vore på ferietur til Bangladesh, India og Thailand, og å få nyte bilete og forteljing frå turen var ein av ingrediensane i festprogrammet. Det var og inkludert ein kyrkjekonsert i Lyngdal kyrkje, der det var musikk av høg klasse både når det var tale om song og spel.

I vår ungdom var det synd å lage hol i øyro. Ei anna av systrene mine laga hol i øyro for 35 år sidan og gøymde hola bak langt hår ganske lenge, og då mor oppdaga det, fekk ho høyre vårt moderlege opphav si meining ganske tydeleg.

i 60-årsdagen i kveld var bursdagsbarnet sin frisør med som gjest, og ho tok henne fram og rigga henne til på ein stol med eit handkle over skuldrene, og plutseleg sat det ei perle i det eine øyret, og snart etter var det og ei på plass i det andre. Jubelen stod i taket både hos jubilanten sine born og andre gjester. Bare eit heimekomponert potpurri basert på Abbas Mamma Mia-melodiar om korleis det var å vekse opp med syster mi til mor, framført av borna hennar, kunne måle seg i respons frå gjestene.

Det er ikkje hol i hovudet å markere merkedager, det er hol i hovudet å ikkje markere dei.

For knaapt eit par veker sidan stod det om Setesdalskonferansen i ein annonse i Setesdølen. Eg tenkte at det kunne vere ein interessant sak å ha noko om i Valle Radio, og i sendinga onsdag etter påske snakka eg med Rune Skibsrud om dette i ein telefonsamtale. Skibsplastsjefen var leiar for programnemnda for konferansen, du finn programmet her:
http://www.setesdal.no/Modules/article.aspx?ObjectType=Article&Article.ID=1106&Category.ID=592

Eg prata fyrst med Ingunn Kile og praten førte til at eg melde meg på konferansen, eg tenkte at nettverkbygging i Setesdal kan vere ein god ting for meg som programleiar i Valle Radio. Frå Valle deltok utanom meg og Tina Høgevold frå Bleieboden også to av dei som var mest sentrale i påskesendingane våre i år: Trygve Rysstad med kona Inger og Kjell Olav Uppstad. Dei fyrste var hovudsponsorar, den siste kniva om å kjøpe flest lodd, og vann dalebukse.

Det vart ein interessant konferanse, Klart vi bygde nettverk. Tema for konferansen var Tru på opptur? Korleis takle finanskrisa i høve media, kommunikasjon og marknadsføring. Det var Erik Dale frå Dale+Bang som leidde konferansen og det gjorde han på ein artig måte. Dei 30-40 deltakarane fekk rikeleg høve til å verte kjent med kvarandre og input til temaet.

Det har slått meg meir enn ein gong at næringslivet i dalen ikkje er flinke til å bruke lokalradio når dei vil få fram noko om det dei held på med. Vi møter mykje velvilje for sponsing og annonsar, men stoff til rekasjonell omtale er det få som tenkjer på. Leiaren av kafeen Møteplassen på Evje fortalde om starten i fjor vår og korleis det gjekk svært godt i sommarsesongen, men 1. september var det ikkje same susen. Men på nyåret ringde Fædrelandsvennen og ville ha ein prat, og då serverte ho blå potetstappe og anna snadder til journalisten, noko som resulterte i to sider med omtale. Ei heilside kostar 60.000 som annonse, no fekk dei det doble gratis i helgebilaget God Helg, og dagen etterpå var det kø av folk som ville ha sundagsmiddag der. Sidan har heile prosjektet gått betre.

Eg tenkte eg skulle nemne det her, det er ikkje alltid så lett for oss å fange opp ting som skjer i næringslivet i dalen, så om du har noko på hjarta, bør du ta kontakt med Valle Radio, slik at vi kan formidle det i ein samtale.

Ronny nyttar Facebook aktivt når han har sending, og han sende ut denne meldinga før onsdagssendinga:

Emne: Sendingen onsdag 22. april

Til i morgen har jeg invitert Hanna Assmann Kyte. Hun er blant dem som har kommet videre i UKM på Evje. Vi tar en prat om dette mellom 18.oo og 19.oo.

Klokken 19.oo får vi som vanligt Kommunen orienterer, og denne gangen ved Rådmannen kontor.

Klokken 19.30 blir det Tankar frå Bibelen ved Håvard Viki

Klokken 20.oo til 21.oo er det Ronnys time, og jeg har invitert Erling Sagneskar. Han vil gi til beste litt om sin forestående langtur i Setesdalsheiene i sommer, og som takk for dette vil jeg tipse ham om fluer og fluefiske gjennom sesongen.

Klokken 21.oo og utover blir det Open Sending med Britta Lise Homme. Hun lover oss rebuser som dere må ringe inn på. Vi har som vanlig et overdådig premiebord.

MVH Ronny

Eg fekk ikkje med meg hele sendinga, men praten med Hanna om Ungdommens KulturMønstring og andre aktivitetar, var eit interessant innslag. Ho var flink til å fortelje og musikkvalet var variert.

Av det overdådige premiebordet fekk eg ein bifftallerken i tre og ein frisbee etter at eg ringte inn løysing på rebusen Pepperbiff. Rebusane var laga frå tilbodslista til Joker og menykartet på Sølvgarden Hotell.

Facebook kan vere eit godt hjelpemiddel i kontakten mellom lyttarar. Ei av dei som er med i gruppa på Facebook og som bur i Kristiansand, ringde inn i går. Ho hadde vore interessert i Valle Radio og gjennom gruppa hadde ho funne korleis ho kunne høyre på nettradio. Mange medlemmer av gruppa var pålogga i går under Open sending.

Men framleis står det att ein del for å finne gode måtar å bruke gruppa på.

Å ta i mot 2400 telefonar på to kveldar er litt av ei oppgåe. I følge Setesdølen var det så mange telefonar til Valle Radio i påska 2009. Helsingar, loddsalg og rebusar, om vi deler på to kveldar, vert det 1200 til kvelden og deler vi det ut på 6 timar, vert det 200 i timen. Det er rimeleg hektisk då, dette skal ein lage radio av: Helsingar og loddkjøp skal organiserast og kome på lufta, rebusar skal løysast, vinnarar trekkjast ut og prate med.

Når sendinga er slutt, må ein setje seg ned og tøme hovudet for inntrykk og surr før ein kan ta kvelden. Setesdølen sin flotte reportasje fredag 17. april syner litt av aktiviteten. Eg let meg imponere både av folk og av reportasje. Takk til Ole Birger Lien som skreiv artikkelen, og til Ørnulf Hasla som rokk å ta bilete midt i all ståheien. Det er godt for ettertida å sjå kva vi held på med.

Eg har site og mimra litt i kveld over heilt andre avisutklipp. Det var ein vane for meg i alle år å klippe ut frå aviser. Men no har eg jamt slutta, Så eg tok for meg nokre av utklippa og såg gjennom dei før eg heiv dei. Eg har hatt mange interesser opp gjennom åra, det spegla seg i utklippa. Men eg ser at eg nyttar media på ein ny måte no. Eg googlar. Og er på Facebook. 368 medlemmer er det i Valle Radio-gruppa no. Det gjer eg ikkje så mykje ut av, men eg er der.

Takk til dykk som vil legge meg til som ven. Eg svarar i helgene, for i vekene er eg utan kontakt til Facebook. Det er Valle kommune sin policy. Ordførar Per Sigurd Sørensen styrer ikkje i Valle, i Kristiansand er dei tilsette på Facebook og det veit heile landet etter at ordføraren gjorde ein tabbe. Eg veit ikkje om han fekk 2400 telefonar, men ein storm vart det og Fædrelandsvennen hadde stoff til fleire sider i eit par dagar, det hender jo ikkje så mykje like etter påske.

Heldigvis har eg wikipedia, det dekker ganske mange sider av avisutklippa mine og kan nåast når eg ynskjer det, til forskjell frå utklippa som eg mimrar over kvar gong eg flytter eller når eg finn dei. Og når eg skal kaste dei.