Kategoriarkiv: Ymse

Ymse

Mediesirkus

Legg att eit innspel

Så har vi fått ny sentralbanksjef. I statsråd i dag vart Jens Stoltenberg utnemnd for ein periode på åtte år, og når dei er gått, er han 70 og kan for lengst gjere som han vil, i alle fall om han fylgjer rådet frå Wenche Myhre sin sang Når jeg blir seks og seksti.

For deg og meg har denne utnemninga neppe noko å seie, for pengepolitikken er nokså stabil her i landet. Men det vart mediesirkus av det og i dag måtte han svare på mange spørsmål på ein pressekonferanse.

Kan hende var det meir sirkus i Beijing der OL opna og land etter land kom marsjerande inn. Etter det eg høyrde er Norge det landet som har teke flest medaljar i Vinter-OL, og folk håper nok på fleire. Men det er eit problem med tidsforskjellen, for konkurransane går på det som er natt for oss i Norge. Ettersom vi er godt vande med å sjå konkurransar i sann tid, er det ikkje sikkert vi sit klistra til skjermane for å sjå repriser som blir sende på dagtid når vi alt har lese resultata på ulike plattformer.

Så får vi håpe at ikkje koronaen slår ut mange deltakarar så dei ikkje får bli med på konkurransane i det heile. På med munnbinda, kanskje endåtil heime i stova, for kven veit, kanskje kjem viruset seg gjennom TV-skjermen om vi sit for nært.

Ymse

Fuglane veit

Legg att eit innspel

Det er sanneleg ikkje så lett å vite korleis ein kveld i Valle Radio kan bli. I kveld hadde eg heldigvis Siri Johannessen til å hjelpe meg som teknikar. Eg hadde etter kvart fått til eit program, trudde eg. Rammene ligg der, først er det andakt, så er det kommunen informerer, Haralds time og Opi sending.

Vi har jo hatt eit fokus på å hente fram program frå arkivet, 20 år tilbake i tid. I kveld måtte vi også hente andakten frå arkivet, for Torfinn Brokke hadde problem med å stille i kveld, så då fekk Bjørgulv T. Berg ordet i staden.

Så var det kommunen informerer, der kunne vi ikkje godt ha noko frå arkivet, der burde det jo vere ferskvare. Men skulefagleg ansvarleg Else var sjukemeld og Malla hadde sagt at ho skulle ordne radioen for henne. Problemet var bare å få tak i Malla. Det gjekk ikkje. Men Siri tenkte lenger enn meg og meinte vi kunne jo prøve ordførarane. Jon Rolf var oppteken i telefonen då eg ringde, så då prøvde eg byglandsordføraren, men han var midt mellom to møte, så det gjekk heller ikkje. Heldigvis var Svein Arne Haugen i Evje og Hornnes ledig, og han er leiar i Regionrådet, så då kunne vi snakke med han om satsinga deira på reiseliv, kompetanseheving og infrastruktur. Og sanneleg vart det plass til litt aktuelt frå hans eigen kommune også.

I Haralds time hadde eg lagt opp til eit innslag frå arkivet. Men først hadde eg ein prat med Svein Inge Marcussen i fugleforeninga. Han bur i Tvedestrand, så vi fekk ein flott prat om faul, som han sa. Han hadde vore interessert i det sidan han var seks å og fekk Fuglene i farger-boka og hadde loggført å ha sett 350 fuglar. Ein gong kjørte han heilt til Nordkyn-halvøya for å sjå ein sibirfugl som hadde blitt ført med vinden dit. Før var det jo eit stort ornitologisk miljø i Setesdal, så han hadde vore mange gonger oppover i dalen, mellom anna hos Jorunn Lund Tveit og Olav J. Tveit på Rysstad.

Så kom Opi sending, og der vart det Jorunn Lund Harstad og Kristin Sagneskar som måtte ta kvelden, for Ørnulf, som var sett opp i programmet, hadde visst fått anna å gjere. Men dei tok kvelden på strak arm med mykje humor og fleire innringarar som hadde mangt og mykje å fortelje. Så totalen var både underhaldande og informativ i kveld, sjølv om ikkje alt gjekk som planlagt.

Ymse

Meir frå arkivet

Legg att eit innspel

Siri nyttar stoff frå arkivet i radioen no, og det syner at vi har hatt mykje stoff som framleis er aktuelt i radioen. I kveld var det Bjørgulv Straume som snakka om munnharpa og spelte Håvard Heddis minne, ein slått han sjølv hadde laga. Eg vart utfordra om å finne noko til Sanghalvtimen, og då fann eg eit stykke av Albrechtsberger der munnharpa var brukt til orkester. Eg visste at vi hadde hatt det med før, og sanneleg var det med i opptaket frå gamle dagar også, Bjørgulv fortalde at han hadde fått ei plate av Niklos K. Besteland med dette stykket på. Sjølv hadde han spelt i samspel med munnharpe og fele, harpeleik og eit anna instrument eg ikkje hugsar heilt no. Men elles var det jo mest solistisk for hans del. Ettersom det stykket eg hadde funne alt var spelt, fann Siri ein seinare sats av same komponist i staden, så slapp vi å høyre det same to gonger.

Postludium var også frå arkivet, det var Pieter Leebeek som hadde funne musikk, og då orgelmusikken kom i øyretelefonane mine, lente eg meg tilbake og kunne nyte musikken.

I den aktuelle timen var det ein samtale om Arkivet i Kristiansand der også mange setesdølar var innom under 2. verdskrigen. Ho som skulle vore med i programmet hadde blitt sjuk, så ein annan måtte steppe inn på kort varsel. Det gjorde han svært godt, og Arkivet vil gjerne ha meir informasjon om folk som alt er på nettstaden fanger.no

Afghanistan er i fokus no om dagen, og frå Norea hadde Siri fått eit innslag om situasjonen for kristne i det landet, det er bare ca. 7000 kristne der, og Taliban leitar etter kristne, så mange lever i frykt og prøver å kome ut av landet. Vi må be for Afghanistan, vart det sagt.

 

Ymse

Fuglar

Legg att eit innspel

Denne veka er det hagefugltelling her i landet. Det blir eit tema i sendinga onsdagskvelden, som har dette programmet:

Onsdag 2. februar

Ansvarleg: Harald Haugland
Teknikar: Siri Johannessen
Telefonvakt: Ingunn Åkre Rysstad
Program
19.00 Tankar frå Bibelen ved Torfinn Brokke
19.30 Kommunen informerer ved Else Margit Tveit
20.00 Haralds time
*Frå arkivet
*Hagefugltelling 2022. Svein Inge Marcussen frå BirdLife Aust-Agder
21.00 Opi sending ved Ørnulf Hasla og Kristin Sagneskar
Høyr Valle Radio på
Det er mange fugleinteresserte i Setesdal, ei stund hadde dei vel eiga avdeling av ornitologisk forening, det som no har fått namnet BirdLife. Svein Inge Marcussen i Tvedestrand er interimsleiar av denne foreninga i Aust-Agder, og har også vore i Setesdal for å sjå på fuglar.
Ymse

Nesten utruleg

Legg att eit innspel

Når stormen den herjer og vinden vi ser, vi kan da jo slett ikke klage. Slik syng vi i ein julesang, og vi kunne kanskje halde fram:

For Setesdalswiki oss alltid er nær, vi kan være muntre og glade.

I dag kom det igjen mange nye artiklar til leksikonet, sju i talet, og endå er det ein dag att til månaden skifter. Det må vere lenge sidan vi har fått så mange nye artiklar på ein månad, akkurat no er det 130 nye. Her er lista:

Når ein er munter og glad og inspirert, då dukkar skrivelysten fram, så kan hende blir det fleire artiklar i morgon om spiriten held seg. I dag hadde vi eit spørsmål i vår daglege quiz: Kva heiter Den hellige Ånd på latin? Svaret skulle vere Spiritus Sanctus, spirit kan til og med vere hellig.

Ymse

13 nye

Legg att eit innspel

I dag var ein sterk dag for Setesdalswiki. 13 nye artiklar vart lagde til. Her er dei;

Siri finn skattar i arkiva, Geir finn stader i Setesdal vi enno ikkje hadde skrive om, og sjølv har eg skrive inn overskrifter i to aviser og laga ein artikkel om ein organist som seinare skal spele til gudsteneste i radioen. Eg hadde planar om å skrive om dei som skal ha gudsteneste i morgon også på Setesdalswiki, men fann ikkje nok informasjon til å gjere det, men eg vonar slik informasjon vil kome etter kvart.

Gudstenesten i morgon er frå Finnnsnes kirke. Sokneprest Ruth Astrid Stellmacher er liturg og Sarah Blamire er organist. Enid Bratteng og Nicole Wiik er tekstlesarar, og Kjell Karstein Øvereng medverkar også i gudstenesta. Finnsnes kirkes ungdomskor og Kirkebandet deltek med sang og musikk, dirigert av Solrun Borvik.

Preiketeksten er Joh. 5, 1-15 og salmene er 322 Stor er din trofasthet, 331 Du lyser din fred over barnet, 452 Du som styre straum og vind og 520 Gå gjennom byens lange, rette gater

 

 

Ymse

Tre nye

Legg att eit innspel

Det vart tre nye artiklar på Setesdalswiki i dag. To av dei skreiv Geir Daasvatn, medan eg etter kvart kom i mål med den tredje. Den handla om ein av radioprestane i 2022. Det kan jo vere greitt å vite noko om dei som talar på gudstenestene i radioen sundag klokka 11.

Eg er så heldig at eg har tre prestebøker med biografiar over prester og teologiske kandidatar i Den norske kyrkja, så ofte kan eg finne informasjon der. Då er det verre å finne noko om organistane og kyrkjemusikarane, for det er ikkje laga noko bok om organister i Den norske kyrkja, så vidt eg veit.

Ein gjer seg jo nokre tankar når ein held på med slik skriving. Det ser ut til at alle dei seks kyrkjene som skal ha mange gudstenester dette året, er arbeidskyrkjer, ingen er tradisjonelle langkyrkjer. Om det er lettare teknisk å overføre gudstenester frå slike kyrkjer, veit eg ikkje.

Komande sundag er det gudsteneste frå Finnsnes kyrkje. I ungdommen budde eg på Finnsnes eit år, det var før kyrkja der var bygd, så då måtte dei til Lenvik kyrkje på Bjorelvnes når dei ville på gudsteneste. Kan hende får eg laga artiklar om folka som deltek i gudstenesta der også, eg sende spørsmål til ein, og han formidla det vidare til dei aktuelle folka.

Her er presten eg skreiv om i dag:

Per-Kristian Bandlien

 

 

Ymse

Radioprestar

Legg att eit innspel

I kveld laga eg ei liste på Setesdalswiki over radioprestar som skal ha gudstenester sundagar klokka 11 i NRK Radio. Kvar prest på den lista skal ha seks eller sju gudstenester. Det var ein artikkel om dette i Vårt Land i går, og då tenkte eg at eg kunne jo lage den om til ei liste.

Radiogudstenestene har vore i NRK sidan 1924, det manglar altså bare to år på hundreårsjubileum. No har NRK hatt kurs for å hjelpe dei prestane som skal ha slike gudstenester til å få ei god form på dei. Eg tenkjer at eg etter kvart kan lage artiklar som vil gjere dei røde lenkene blå. Kan hende blir det også ei liste over dei andre prestane som har radiogudstenester.

Det  er mange som høyrer på radiogudstenestene, i snitt seier NRK at det er 300.000, så det er den største møtelyden i landet. Då trengst det å få opplæring for dei som skal forkynne i desse gudstenestene.

Radioprestane 2022

Ymse

Stavkyrkje og redningshundar

Legg att eit innspel

Stavkyrkje og redningshundar var tema i den aktuelle timen som Øyvind Jacob hadde i Valle Radio i kveld. Han snakka med Bjørgulv Bjørnarå om arbeidet som han gjer med redningshunden sin, det er blitt ein livsstil for han og Elisabeth Spockeli, kona hans. Dei trenar kvar dag, hundane må haldast i trim, og det må folka også.

Det kallast ein ekvipasje, hund og førar, og dei må trene både for sommar og vinter. Vi har jo sett noko av det i serien Redningshundene på NRK TV, og sjølv om Bjørgulv ikkje vart med i serien, kjenner han dei som er med der, for dei er jo på samlingar i regi av Norske Redningshunder fleire gonger i året i tillegg til eigentreninga.

For ein som er glad i å vere ute i skog og mark, er det ein ideell hobby. Men den er ikkje lukrativ, for ein får bare betalt for reise om ein blir kalla ut til ein aksjon. Alt anna må ein koste sjølv. Det er politiet som kallar ut til leiteaksjon, og i Setesdal er det tre ekvipasjar på Hovden, to i Valle og ein på Evje. Så det er eit lite miljø, men ein triveleg aktivitet.

I samtalen med Knut H. Rysstad, JA-Knut, snakka dei om planane for å byggje ei stavkyrkje på Rysstad. Eg vart jo noko overraska over prisoverslaget, det var tale om 30 millionar kroner, men dei såg visst lyst på å få inn så mykje pengar. Dei ville gjerne ha melding om viss folk hadde stokkar som kunne høve til kyrkja, etter det eg skjøna, var det snakk om stokkar som framleis vaks, men som kunne merkast som høvelege når bygginga skulle starte. Mellom anna var det tale om slike kne som skal bere taksperra. Om nokon visste om slike, måtte dei melde frå.

 

Ymse

Emigrering

Legg att eit innspel

I kveld var Olav M. Holen i Valle Radio og fortalde om utvandringa frå Bykle til USA. Den starta på 1840-talet og gjekk via Kristiansand til Le Havre og så til New York. Dei 28 som reiste måtte ha med seg 60 kg mat pr. person, så det var litt av ein tur. Men så tok han også mange veker.

Seinare reiste folk over heia til Suldal eller via Brokke til Lyse og tok båt til Stavanger før dei så drog vestover. Ein slik tur er det fortald om i Byklesoga Heimar og folk i Bykle av Ånund Olsnes,

Her er lenke til det som står der: Løyning under Ryningen