Det er lurt å sjekke antennene til Valle Radio om vinteren. Dei ligg på høge punkt i heia, og om vinteren kan ein ta seg fram med snøscooter. Laurdag 8. mars hadde vår tekniske sjef Jørund Georg Jore ein avtale med Jørgen Lien, som leverer utstyr til Valle Radio, om å ta ein inspeksjonstur. Diverre vart Jørgen sjuk, men Jørund fekk Geir Olav Uppstad med som vikar.

**Jørund fortel:**
På Løefjødd hadde båe festa til røyret som held antenna som mottek signal frå Ljomsnuten brote rett av. Antenna hadde snurra rundt og hekk etter kabelen. Av ein eller anna tilfeldig grunn peka den mest i rett retning. Men det er klart at i vind ville den lett kunne svinge med resultat at mottakaren ikkje fekk inn signal og sendaren difor ikkje hadde noko å sende. Mest sannsynleg er dette årsaken til at sendingane på Rysstad har vore ustabile. På Løefjødd er sendarantenna ein “pisk” som står rett opp i toppen av stolpen.

Festet vart teke med til Otera i Øyne og nytt feste var montert. Deretter vart det ein ny tur til Løefjødd for montering.

Deretter drog Jørund til Ljom for å sjå korleis det var der. Ettersom Geir Olav måtte heim, fekk han med seg sonen sin, Knut Olav, på den turen. Det var noko hardare ver der.

-På Ljom er mottakarantenna montert i toppen av den store masta. Det er sendarantenna som står i gavlen på hytta. Alt var i orden på Ljom, fortel Jørund, som vonar at alt teknisk no skal vere klart til påskesendinga.

**I studio**
I studio har me fått nye mikrofonar. Vi har gått over til øyreklokker som har mikrofon. Dermed kan ein vere friare i studio enn med fastmonterte mikrofonar. Vi har og fått kompressorar til mikrofonane, slik at lyden ikkje går over eit fastsett volum om nokon til dømes hostar.

Etter ei god natt vakna vi til ein morgon med eit par centimeter snø i dag. Men himmelen viste blåe flekkar mellom det grå, så vi var positive der vi åt frokost, smurde nistepakke og gjorde klar for tur til Furestøyl og vidare til Sinnes for James. Eg var sjåfør, så eg skulle heim att etterpå. Ved halv ni-tida la vi i veg.

Er det nesten bart nede i dalen, så er det nesten ein meter med snø i området ved Furestøyl, og på parkeringsplassen var det studd saman ein horde med bussar. Bussen frå Valle starta halv sju, no stod den oppe og var venterom for dei som skulle starte utetter dagen. Tilsvarande var det for dei som kom frå Mandal med buss. Når alle hadde starta, kunne bussane ta fatt på turen ned dalen til Evje, vidare til Tonstad og så opp Sirdal til Sinnes.

Ti på ni sette eg passasjeren min av og ønska han god tur. Så rygga eg meg ut i kanten for å sjå litt på det yrande livet på den store parkeringsplassen. Eg tenkte på Sigmund som var på ein matstasjon inne på heia dei åra han gjekk på skule i Valle. Det er eit stort dugnadsapparat som må til for å få avvikle eit slikt renn. Øyvind Jacob var speakar og talde ned til start. Klokka ni starta menn mellom 15 og 30 år, og så gjekk det slag i slag utover. Då hadde dei fyrste vore i løypa frå halv åtte, men like fullt var det nesten som tog som la i veg innover i heia.

Eg var ikkje den einaste sjåføren i liten bil på Furustøyl denne morgonen. Fleire gjekk ut av bilen og tok bilete av den som skulle gå, før dei tok fatt på turen mot Sirdal for å hente. Eg heldt meg inne, etter kvart var det blitt ganske oppkøyrt, med store hol i isdekket/ snøen. Så etter å ha snust litt på folkelivet, la eg meg mellom dei fyrste bussane og rulla ned Brokkebakken til Nomeland att. Der drog bussane mot sør, medan eg drog heim att til Valle.

No er løpet over. Kor lang tid dei brukte, dei eg kjenner, har ikkje vore råd å få opp på skjermen min enno. Truleg er det mange som leitar i listene i kveld, for sidene vert ikkje viste. Men her er heimesidene, du kan sjå sjølv: http://www.sesilami.no/

Tor Joar Ravndal vann for 9. gong i år. Han er frå Gjesdal IL, eg sender gratulasjonar til min opphavskommune så vel som til arrangørane for gjennomføringa. Mot ganske mange odds verkar det som om gjennomføringa var grei.

I fjor var det sett ned ein komite som skulle sjå på kva ein kunne gjere for å utnytte Sesilåmi betre i Valle. Korleis det gjekk med det arbeidet har eg ikkje sett noko om. Kanskje Valle Radio bør ta ein prat med assisterande rennleiar Tarald Myrum frå Valle IL for å gje lyttarane svar på kva dei kom fram til.

Under sendinga fredag 7. mars var Sesilåmi tema. Rolf Erik hadde laga rebusar som var relevante i høve til arrangementet, og eg plussa på med nokre på slutten då det synte seg at ein trong fleire. Men det var ikkje mange av dei som ringte inn som skulle gå løpet. Ikkje mange av dei som ringte inn hadde gått løpet heller. Men svara kom utan problem. Ei av dei han snakka med hadde vore i transportgruppa som frakta heim dei som braut rennet. Elles hadde nok dei fleste bare erfaring frå turar over fjellet på sommarføre.

Noko anna var det då eg i dag møtte James Karlsen på Soknehuset. Han er debutant i år, men har 40 mil bak seg i løyper på Hovden denne vinteren. Son hans, Sindre, gjekk i fjor og kytte av turen, då gjekk den i strålande sol. Men eg såg folk med 15-årsmerke på skidressen, og Gunnar Brottveit på Valle Handel har vel gått alle med unntak av eitt renn. Kollegaen min på vaksenopplæringa i Valle, Øystein Berg, har gått fleire gonger no og satsar på å gå i år også. Mest kvar dag etter jol, når veret har vore lagleg, har han trent i lysløypa på Furestøyl. Medan eg sat og venta på at James skulle hente nummeret, kom ein Hå-bu eg har vore i selskap med hos presten på Varhaug bort til meg, han var og klar for ein stri tur over fjellet. For regnet silte ned.

I Soknehuset hadde bygdekvinnelaget rigga til kafé der folk kunne få kaffe og litt å bite i medan dei venta. Det var smørjetips å få for den som var usikker på kva han skulle smørje med, om du hadde feil ski, kunne du få kjøpe nye i ausande regn utanfor soknehuset. I storsalen var det utleige av madrassar for dei som skulle sove der, 100 personar hadde fått plass i roma etter det eg skjøna. Då eg var der, stod det tre turbussar på parkeringsplassen, i tillegg var det ganske mange bilar. Og regnet silte ned.

Vi tok oss ein tur på Sylvgarden, vi var tidlege. Sjølv om dei hadde bryllaup i kjellaren, venta dei storinnrykk til middag litt seinare på kvelden. Og alle senger var opptekne der og. Som vanleg ligg det folk i alle hus denne helga, bedehuset på Nomeland er fullt av skiløparar komande natt. Medan vi sat på Sylvgarden, tok dei fyrste til å kome inn. Og då vi gode og mette drog frå Rysstad, silte det framleis ned.

Om det er snø i høgda, har dei ein stri tørn med å halde låma open. Vermeldinga ser ikkje ut til å vere på arrangementet si side når det gjeld nedbør. Men når det gjeld vind, reknar ein med høvelege forhold i fjellet. Her er lenke til Sesilåmi på Internett: http://www.sesilami.no/