No er det snart ei veke sidan årets første nummer av Setesdølen kom ut. Vi brukar å få det med Fædrelandsvennen og dei andre avisene vi har, men den tysdagen kom avisa ikkje. Ettersom eg skriv inn overskriftene på Setesdalswiki, likar eg å ha papiravisene, så eg ringte avisa og dei lova å sende den med posten.

Men det er eit problem med Posten, og det er at omdelinga her er tre dagar den eine veka og to dagar den andre veka. Den veka vi no er inne i, er det omdeling måndag, onsdag og fredag. Ettersom avisa ikkje kom i dag, må eg vente til onsdag før eg kan rekne med at ho kjem.

Det er klart at når Posten skal ha bærekraft og vi bare nyttar epost, blir det små inntekter. Eg har ikkje slått opp kor stort overskot Posten har år om anna, men noko må det vel bli, for vi kjøper varer via postordre som aldri før og eg har til dømes lese om Bli Vakker, nettbutikken i Kristiansand som gjer det svært godt.

Posten har fått konkurrentar når det gjeld pakkar også, Nord Post kjører forbi huset vårt med ein liten lastebil fleire gonger i veka, eg trur dei omtrent leverer på døra til folk.

Men enn så lenge ventar eg på Setesdølen nr. 1, 2022.

I år er det 25 år sidan Valle Radio starta. Difor sender vi program frå den første tida i sendingane våre framover. Siri Johannessen har vore i arkivet og funne perler som kan hjelpe oss å hugse alt vi har vore med på. Men vi kviler ikkje på laurbæra, det er aktuelle saker også.

Tirsdag 11. januar
Ansvarlig og tekniker: Siri Johannessen
18.00 Kvarteret, programinformasjon og kåseri
18.15 Over en åpen bibel med Pet Karlsen fra Norea
18.30 En lang time med Dette er mitt liv med Elise og Øystein Litleskare, og Åpne dører med Olaug Bjørke om bønn.
19.45 Glade toner med Ånund K

Her kjem siste del av innlegget til Leonhard Jansen:

Valle sparebank vart tidleg involvert gjennom ein sponsoravtale som gav årleg 25 000 kr. Det vart gjort avtale med kommunen og Næringsfondet, og  i tillegg til sendarane som kosta 200 000 kr, vart det kjøpt studioutstyr til 400 000 kr. I januar var vi ein heil delegasjon nedover til kysten der vi besøkte andre nærradioar, og til slutt full omvisning på Lynor som hjelpte oss med det vi skulle ha av teknisk utstyr.

Vi fekk eit rom i tredje etasje i det gamle heradshuset, og vaktmeistar Hallvard Åkre hadde greitt vetrearbeid med å byggje studio. Ei nøtt var korleis vi skulle lydisolere, men det vart klistra eggekartongar rundt på vegger og tak, og så var det så heldig at dei akkurat heldt på å byggje om på tannlegekontoret, og den dobbeltisolerte døra til rommet der pinebenken var, vart galant donert til studiodør. Mest heilt lydtett. Lurer på om det er den som er i det nye studioet au?

Ut over våren var det øving saman med Bykle radio. Eg minnest eg var opp til Bykle fredag før påske og var med på sendinga der. Så inviterte Hallvard og gjengen til påskesending skjærtorsdag. Det var det fyrste påskeshowet til Hallvard. Og etter kvart var det jo påskesendingane som kom til å finansiere heile radioen. Han ville ikkje ha bingo, men lurte på om det kunne ordnast slik at det kosta litt ekstra når dei som ringe under opi sending kom igjennom. Heldigvis vart nå det ikkje noko av.

Førebuingsarbeidet gjekk sin gang, og 7. mai 1997 var den fyrste ordinære sendinga frå studio i Valle. Eg hadde laga eit intervju med Sigurd Lund som spela og song. Hadde redigert på minidisc. Primitivt, men det gjekk an. Seinare hadde eg Opi sending saman med Bjørg Brokka Rike. Elles var det opningstimen med Leif, Hallvard og Theis, Helgestart med Theis, Unge kostar med 5 unge jenter, Leifs Håve og Blanda drops med Hallvard og Ånund. Ånund K. hadde gamle svisker, og det programmet byrja med ei knirkande dør minnest eg.

Ut over sommaren var det litt sending, og eg minnest spesielt opplegget under Rysstadmarknaden. Då kom eg gåande inn på scenen medan eg rapporterte kva som skjedde rundt meg i mobilen, for til slutt å overlevere mobilen til sjølvaste Vestlandsfanden som då vart intervjua av Hallvard på direkten. Det begynte å verte avansert radio.

På hausten vart det litt kluss då alt sendarutstyret i Bykle skulle flyttast over til nytt samfunnshus, men 26 september var vi i gang att. Eg dreiv og førebudde meg til sending i samband med sauesjået 4.  oktober, og hadde funne fram til mykje godt sauestoff den kvelden som eg og Hallvard Tveit hadde ansvaret for. Tenkte nok det var midt i blinken, men det var ikkje akkurat den responsen eg hadde forventa. Folk tykte visst det vart litt vel mykje sauepreik.

Eg kunne nok ha halde på eit bel og mimra, det var ei gild tid. For meg så endte det i grunnen opp med at eg fekk meg både kjering og sauefjos å halde styr på det året, og det var i grunnen nok. Men som me skjønar av den påskjøninga som kom for ei tid sidan, har det vore nok av dugande medarbeidarar til å take stafettpinnen vidare.

Gratulerer endå ein gong!

Her kjem andre del av innlegget til Leonhard Jansen om starten på Valle Radio:

Så er eg litt i tvil om korleis alt bar til. Eg trur i grunnen ikkje at det vart valt noko ny nemnd, men at det var Hallvard Kjelleberg som hausten 1996 tromma saman eit lag med Theis Salvesen, Leif Kvinlog, ein som het Kjetil Soland og jobba på teknisk, Bjørg Åkre som økonomiansvarleg, og meg på kulturkontoret. Så var au Torleiv Soltun involvert, og Jørund Georg kom også inn i biletet nokså fort. Men det var kanskje etter at Kjetil Soland hadde flytt vekk.

Det å få i gang nærradioen var truleg eitt av dei mest uformelle prosjekta eg var involvert i gjennom dei åra eg var kulturkonsulent. Vi som var med på dette vart i grunnen berre kommanderte i ulike retningar av Hallvard Kjelleberg. Som hovudregel var han alt for utolmodig til å vente på formelle vedtak i kulturstyret og kommunestyret. Når eg endeleg hadde fått kommunal godkjenning til å bruke pengar på dette, var det meste alt bestilt og langt på veg montert. Men det gjekk no greitt.

Det vart gjort avtale om å bruke same konsesjonen som Bykle. Difor var det i ganske mange år Bjarne Tveiten som vart ståande som redaktør også for Valle radio. Sendaren var også i Bykle, og av og til når det var noko som skar seg, måtte Reidar Trydal trø til og slå av og på brytarar. Sendinga frå Valle vart sendt på ISDN-linje til sendaren i Bykle, som så sendte det ut over sendarnettet.

Det vart montert master fleire stader. Mest utsatt var den på Ljom som av og til vart heilt nedisa, og utan Jørund Georg ville det ha vore mange sendingar som ikkje hadde kome på lufta. Iskalde snøskuterturar vart det fleire av.

Då sendarane på toppane vart sette opp var Hallvard frykteleg oppglødd. Han sette i gong sendaren og kommanderte meg til å køyre nedover dalen. Så hadde vi telefonkontakt og han var veldig oppglødd då det viste seg at radioen kunne høyrast langt nede i Austad sokn. Seinare fann vi jo ut at på heiane der bar det endå lenger.

Eg skreiv i går at vi skulle få høyre noko frå Leonhard Jansen om starten av Valle Radio. Dette er litt av det han sa då radiofolka markerte at vi hadde fått Valle kommune sin kulturpris:

I kveld gav Siri Johannesen meg høve til å mimre om Valle Radio si første tid. Den gongen var vi på loftet i det gamle Heradshuset i Valle, og ho hadde leita i arkivet og funne stoff som eg hadde gløymt at eg hadde halde på med.

Eg er til dømes ikkje realist, likevel hadde eg hatt ein programserie om Niels Henrik Abel, matematikaren. Eg hugsar derimot at eg hadde med meg Jan Oddvar Rysstad, Knut Inge Hovet og Jan Roger Homme som teknikarar. Dei var elevane mine på Valle skule og Siri tok telefonen til Jan Oddvar for å høyre kva han hugsa. Han fortalde at dei ikkje var så interesserte i fotball, så dei valde å ha valfag i radioen. Det hadde dei også lært mykje av.

Om vi skal ta programmet i kveld kronologisk, så starta det med eit kåseri eg hadde i 1999 om då radioen flytta inn i det som no er radiohuset. Så var det Over ein open Bibel med Pet Karlsen og deretter Nytt og gamalt med bl.a. kommuneoverlege i Bykle og Valle Benedicte Severinsen og Sigurd Langeid frå Politiet om jol og nyttårshelga før det nemnde innslaget mitt med Jan Oddvar.

I år fyller Valle Radio 25 år og difor har Siri rota i arkivet. Der fann ho mykje gull, så i morgon, tysdag 4. januar blir det skattar frå arkivet.

25 år som lokalradio, om vi brukte gjesteboka og leita litt, ville vi nok funne stoff nok til å lage bok om radioen og alle folka og perspektiva vi har lyfta fram gjennom åra. I morgon vil du få høyre noko heilt frå starten.

Tirsdag 4. januar

Eg har skrive blogg i mange år, men har likevel ikkje fulgt heilt med i timen, for eg har ikkje oppdaga at folk kommenterer det eg skriv direkte på bloggen. Det var Torbjørn Greipsland som gjorde meg merksam på det då vi prata saman i dag og ønskte kvarandre godt nytt år. Han hadde kommentert på noko eg skreiv, men det kom ikkje fram, det stod at det venta på godkjenning.

Eg har jo helst tenkt at kommentarane kjem på Facebook, for det eg skriv, blir jo lagt direkte ut på Facebook med ei lenke tilbake til bloggen. Men folk kan kommentere på bloggen også, og det er mange som har gjort det. Til dykk alle vil eg seie takk, eg skal prøve å fylgje betre med framover.

Høgtida er vel over no og det går mot kvardag att. For oss pensjonistar betyr det ikkje så mykje, vi skal ikkje ut på glatte vegar for å kome oss på jobb, vi skal heller ikkje ha heimekontor og må logge oss på til morgonmøte. Vi kan ta livet med ro, ta ut bilen litt ut på dagen og ta turen til butikken for å komplettere det som tek til å minke i kjøleskap, fryseboks og brødboks. Her i sør er det mildver og grøn plen, ein kan jo håpe at snøen uteblir i år, men det er nok tvilsamt.

Eg såg på tv-gudstenesta på svensk tv2 i dag også, og då prøvde eg å ta eit bilde av veggen framme i kyrkja for å syne det motivet eg skreiv om tidlegare.  Her er det: Alfa og Omega, med Kristus i midten.

Det er ikkje mange nytårssalmer i Sangboken, bare to: Gamleåret seig i hav og Hans navn skal kalles Jesus. Om den siste har Wikipedia dette å seie:

Hans navn skal være Jesus er en salme av Bernhard B. Fjærestrand. Opprinnelig førstelinje var «Hans navn skal kaldes Jesus». Salmen stod på trykk i Krigsropets julenummer i 1913 og kom med i Frelsesarmeens sangbok i 1948, men allerede i 1939 var den tatt inn i Sangboken: Syng for Herren. I Den norske kirkes salmebøker kom den med i Norsk salmebok 2013 på nr. 85 under rubrikken Jesu navnedag – Nyttårsdag.

Salmen har fire vers og omkved. Innledningslinjen i salmen er hentet fra Matt. 1,21 og er hentet fra engelen Gabriels budskap til Jomfru Maria. I salmen skildres så de oppgaver Jesus skulle få i verden: Å frelse folk fra synd, død og dom.

Melodien til salmen er en lied-melodi av Franz Schubert, Der Lindenbaum. Detter er lied nr. 5 i sangsyklusen Winterreise fra 1826.

I dagens gudstjeneste på svensk tv2 var det som vanleg mykje fin sang, men også predikan var sjeldan, for pastoren nytta altertavla, med starten Alfa og enden Omega til å visualisere den, og midt mellom desse var det eit kors, det er eit tidsskille.

Så skal vi snu om kalenderen og helse eit nytt år velkomen. Her på Eskeland skjer det med knall og bang rundt oss, men vi har aldri vore av dei som sender hundrelappane til himmels på den måten. Vi har ein stille kveld i stova etter å ha hatt eit godt  taco-måltid tidlegare i kveld. Etter å ha sett litt på Kongeleg variete på NRK, skrudde vi av, stilte spørsmål frå quiz i dagens aviser. Eg sender helsing med Sangbokens nr. 652, nyttår har bare to nummer i Sangboken.

Gamleåret seig i hav,
siste dag i dauden bleikna;
men i aust det atter kveikna
nyfødd sol sto opp av grav.
Ljoset fram or mørkret stiger
som på fyrste skapingsdag.
Sol og dag er fødd til siger,
mørkret dømd til nederlag-

Godt nytt år!