Søndagar er det tid for ein søndagstur. I dag var eg først i Kina og såg snooker, så innom ei sangglad og god besøkt Glimåkra kyrka i Sverige på gudsteneste før eg hadde ein lang sykkeltur i Flandern i lag med 200 proffsyklistar og ein million tilskodarar rundt løypa. Kor mange som likt meg var på tur frå sofaen er det ikkje godt å seie, men det var nok fleire millionar i mitt selskap.

Men i kveld var eg aleine i bilen på veg frå Mandal til Valle. Det er ein tur på nesten tjue mil, og då er radioen godt selskap. Som oftast er det p2 som fylgjer meg på turen, eg har ikkje fått DAB enno, så p1 sin sport og musikk svingar eg innom av og til, men det meste av tida er det p2.

I kveld fekk dei som høyrer på Radiodokumentaren klokka 2103 høyre om korleis Natt-tjenesten i Oslo har det ei vinternatt. Med 19 minusgrader og 15 heimebesøk hadde sjukepleiar Trine Lise nok å gjere då ho starta runden klokka 22. Vi fekk høyre litt om dei folka ho besøker og jobben som vert gjort utover natta, som oftast aleine, men og saman med ein annan sjukepleiar der det var naudsynt. Om natta møtte pasientane stort sett dei same folka, på dagtid var det ein som hadde hatt over 200 innom for å stelle han i løpet av nokre år. Når ein høyrer slikt, tenkjer ein at det kanskje ikkje er så heilt enkelt å bli gammal og trenge hjelp.

Samstundes tenkte eg på Britta Lise i Valle Radio som har ein tilsvarande jobb i heimesjukepleien i Valle. Trine Lise i Oslo ville ha ein 4-hjulstrekkar på vinteren, det har sikkert Britta Lise og, for her er det no minst like vanskelege kjøreforhold som i Oslo. Dei kjører nok lenger i Valle, men kjenner eg situasjonen rett, er dei like velkomne som dei vi høyrde om i programmet frå Oslo. Nattens englar vart dei kalla.

Når p2-Dokumentaren er ferdig, går det mot nyheter klokka 22 og då skiftar eg til p1, for etter nyhetene kjem Salmer til alle tider med Kjetil Lillesæter og ein gjest. Der kan eg få tips til noko eg kan dele med lyttarar i Valle Radio i tysdagskveldens sangkveld.

Og så er eg framme i Valle og kan setje meg til datamaskinen og skrive kveldens blogg.

Onsdag 30. mars 2016 gjekk det eit ras på vegen mellom Åraksbø og Ose, tvers overfor Osefiti. Det var litt av eit ras, og vegen er vel stengd på ubestemt tid. Det må nok geologar til for å finne ut om det rotne berget har meir som er laust.

Veterinær Olav Robstad var bare 200 meter unna då raset gjekk, så han fekk panoramautsikt til hendinga, sa han til Setesdølen.

Det var ingen aprilspøk i Valle Radio i år, så vidt eg veit. Men både Setesdølen og Evje og Hornnes kommune hadde brukt fantasien, avisa med eit oppslag om at Bygland kommune kjøpte Tesla til kommunetoppane, noko som var ganske truverdig når ein ser ladestasjonane utanfor Glashytta.

Evje og Hornnes hadde ein på kommunen si heimeside om at det var blitt semje med Bygland om kommunesamanslåing med senter på Byglandsfjord, det nye rådhuset skulle vere ei utrangert oljeplattform som Statoil gir bort gratis, den skulle fraktast med helikopter i modular frå Nordsjøen til Revsnes Hotell og setjast opp utanfor hotellet, med bru ut til plattforma. Eg trur dei hadde stor glede av å fabulere om korleis dette skulle bli, Det skulle haldast ei militærøving for å gjere det, noko som Donald Trump skulle gjere gratis når han vart president om han bare fekk ei statue på toppen.

Programmet i Valle Radio denne kvelden var det Øyvind Jacob som var ansvarleg for. Han hadde med seg Siri Johannessen som teknikar. Og Siri har bursdag 1. april, dermed kom Øyvind, Signe og Sondre med bursdagssang live på radioen for henne og med kake til teknikaren.

19.00 Musikkprogram med eit lite bidrag frå Asbjørn Kvalbein (Norea radio)
19.30 Regionrådet informerer med Signe Sollien Haugå
20.00 Øyvinds time
– Om påska som var, og påska i høve til filosofi og astronomi.
– Nytt musikkalbum frå Runar Granheim
– Setesdalskonferansen
21.00 Opi sending med Sondre Rua Dokken