Helge skulle vere med på møtet om Setesdalswiki som var torsdag. Det er han som har det tekniske ansvaret for databasen, og han var interessert i å vere med på idedugnaden eg skreiv om i går.

No høver det slik at han har fått seg bustad så nær jobben at han spaserer på jobb, og då kvitta han seg med bilen. Dermed var det aktuelt å ta buss til Valle, og etter å ha granska rutetabellar, kom han til at han kunne kome til Bykle om kvelden klokka 23.05. Det hadde eg aldri høyrt om, og eg spurde andre om det same, men det verka ikkje som om nokon visste det.

Då han kom på busstasjonen i Oslo stod Haukeliekspressen der og på bussen stod det Haukeligrend/Hovden/Bykle, så det var klart at det stemte. Halv seks gjekk han på bussen i Oslo, og etter å ha bytta til minibuss på Åmot, gjekk det strake vegen til Bykle. To personar gjekk av på Hovden, og då bussen hadde sett av Helge på YX i Bykle, snudde sjåføren og drog tilbake til Haukeligrend.

Eg møtte Jan Oddvar den kvelden, eg var nede og fekk meg bensin på Statoil Rysstad, og då stoppa bussen der slik at passasjerar skulle få handle litt og gå på do, det var jo stengt i Valle så det var ingen grunn til å stå lenge der, sa han. Eg spurde han då om dette og han fortalde at Bykle kommune hadde ein avtale med Haukeliekspressen om å køyre til Bykle om det var passasjerar – bare avstiging. Ein kunne altså ikkje rekne med at bussen kom om ein hadde vore på Hovden ein tur og ville reise heim seint på kvelden. Men elevar på Skigymnaset visste godt om bussen når dei hadde vore på tur austover og nytta den gjerne, etter det eg skjøna.

Etter mi meining er det ein buss som fortener å verte betre kjent i Valle og på Rysstad. Det er mest vanskeleg å kome fortare frå Oslo til Valle enn den tida bussen bruker, seks timar om ein vert henta i Bykle, og den turen er jo overkommeleg sjølv litt seint på kvelden.

Eg trur det er grunnlag for å lage eit innslag om dette i Valle Radio når det høver slik.

I kveld tok Øyvind Jacob ein telefon til Svein Harberg, stortingsrepresentant for Høgre frå Aust-Agder. Bakgrunnen var at Harberg har fremja eit dokument-8-framlegg i Stortinget for å få liv i saka om motorisert ferdsle i utmark.

I samtalen med Øyvind og Ørnulf Hasla fortalde Harberg, som har hytte på Hallbjønnsekken og som handlar i Valle når han er på hytta, at det har vore eit forsøk der åtte kommunar har hatt prøveordning med lokal forvaltning av lova. Det har fungert svært godt, og det har ikkje kome klagar på slik lokal forvaltning, Sirdal og Vinje var med i prosjektet, men ingen kommunar i Aust-Agder.

Men då prøveperioden var omme og det skulle lagast rapport basert på erfaringane, såg ikkje Direktoratet for Naturvern, som hansamar saka, på konklusjonane, men fremja sitt eige syn, som gjekk ut på ei strengare praktisering. Ettersom det var usemje i regjeringa, vart saka lagt vekk. Det er ingen tent med, og opposisjonen vil gjerne ha saka opp med tanke på å få til ei permanent ordning i tråd med forsøksordninga.

-Ein opplever jo at folk som har snøscooter, køyrer i hyttefelt og på vegar fordi det ikkje er lov å køyre lovleg med dei, sjølv om det er lov å kjøpe og å eige snøscooter, sa Harberg, som meinte at det var betre om det kom ei avklaring i Stortinget. No reknar han med at i løpet av eit par månader kan det kanskje verte ein debatt i Stortinget om saka.

Dette vart den einaste saka eg fekk høyre av kveldens sending. Eg tok meg ein tur til Rysstad for å fylle bensin, Esso-stasjonen i Valle er stengd og eg skal til Bykle i kveld og hente Helge, som kjem for å vere med på møtet om Setesdalswiki i morgon. På Statoil Rysstad møtte eg trivelege folk eg slo av ein prat med i staden for å høyre resten av nyhetstimen, så kva anna Øyvind og Bjørgulv snakka om, fekk eg ikkje med meg.

Men eg fekk med meg litt av Kommunen informerer, der Frode Buen brukte siste nummer av Bygdenytt for å minne om aktuelle saker. Øyvind fortalde og at treningsbassenget i fysioterapiavdelinga no er i drift att, etter to og eit halvt år utan basseng var det mange som gledde seg over at dei no kunne få trene i varmt vatn att. Om nokon legg ut informasjon på Setesdalswiki, får du heller lese meir der om sendinga i kveld: http://www.eskeland.net/setesdalswiki/Onsdagsprogram_Valle_Radio_20110119

Niklos K. Besteland likar minnedagar, og i kveld markerte han minnet om Tomas Luis de Victoria, som levde frå 1548 til 1611. Han var ein spansk komponist og blir ofte kalla den spanske Palestrina. Han fekk si fyrste musikalske utdanning ved katedralen i Avila, der han var korgutt frå han var 10 år. I 1565 vart han elev ved Collegium Germanicum i Roma, eit jesuittkollegium, og der kom han i kontakt med Palestrina sin musikkstil. I 1575 vart han prestevigd, og under kong Philipp den andre av Spania fekk han stilling som kantor. Han hadde ein stor produksjon, 20 messer, 44 motettar, 35 hymner, 16 magnificat, 7 bibelske salmekomposisjonar, 12 antifonar, 19 cantica. Den berømte Officium Defunctorum spelte vi i Valle Radio til Helgemesse 2010.

I kveld var det koret i Westminster Cathedral som song under leiing av David Hill. Eg fann nokre relevante lenker for deg som vil vite meir:
http://en.wikipedia.org/wiki/David_Hill_(choral_director)
http://no.wikipedia.org/wiki/Westminsterkatedralen
http://no.wikipedia.org/wiki/Tom%C3%A1s_Luis_de_Victoria
http://en.wikipedia.org/wiki/O_Magnum_Mysterium

Dette var det første programmet Niklos hadde utan orgelsolo. Og det var hans program nummer 271.

Ein time med Gospel Country i kveld. Den kom eg lett frå, for Per Govertsen sende ei plate frå Arendal der han hadde brent inn heile programmet.

Eg trefte Ørnulf på Valle Handel i dag og han hadde sett på filene eg hadde lasta ned frå nettet, dei må konverterast før dei kan spelast i vår spelar. Slikt har eg ikkje lært meg å gjere enno, så eg får prøve å få det til etter kvart.

Eg har i lang tid hatt Sangtime i radioen no, og før jol var Siri Johannessen med fleire gonger. Det var meininga ho skulle hatt programmet i kveld også, men ho fekk problem med bilen og nådde ikkje fram i tide. Dermed vart det Country Gospel, og programmet hans var godt. På slutten var det til og med ein liten andakt.

Sist veke nytta eg spelelista hans som grunnlag for å finne songar til Sangkvelden, og då oppdaga eg ein artist eg ikkje hadde visst om før: Ann Kristin Eikeland frå Kvås. Då song ho eit par norske songar, det var sjeldan vakkert. Eg vil nok nytte dei seinare i Valle Radio.

Spelelista til programmet finn du på Setesdalswiki:
http://www.eskeland.net/setesdalswiki/Tysdagsprogram_18._januar_2011#18.30_Sangkveld._Country_Gospel-timen

Eg synest det er fint å kunne kople saman Setesdalswiki og bloggen, så ta gjerne ein tur innom og les det som står der.

I sendinga i går snakka Ronny Stavsholt og Kåre Rike som vanleg om at premiane skulle leggjast på Esso i Valle. Heller ikkje dei visste at stasjonen var stengt. Etter det eg høyrde i dag, var siste opningsdagen måndag. Erna og Will hadde vel halde på knapt eit par år då dette hende. Men siste tida har vore tung, for Will fekk problem med ein fot og vart sjukemeld. Dermed vart Erna aleine om å drive, og det vart tungt i lengden.

Sjølv har eg i liten grad nytta meg av Esso-stasjonen i Valle ettersom eg reiser til Mandal i helgene. Då vert det til at eg handlar bensin på helgetilbod der, og gatekjøkkenmat har eg ikkje vore nokon tilhengjar av på mange år. Men i haust var eg innom der nokre gonger og fekk meg gatekjøkkenmat. Eg hadde i grunnen tenkt å få meg det i dag og, men fekk altså vite at det ikkje var mogleg lenger.

I alle år hadde Valle Radio avtale med Essostasjonen om å leggje ned premiar der etter Opi sending. Kor Ronny og Kåre leverte premiane frå i går, veit eg ikkje. Men eg går ut frå at det vil kome ei løysing om ikkje alt for lang tid. Ein ting er premiane, noko anna er høvet til å kjøpe bensin. Det er å vone at nokon vil finne den utfordringa interessant også i framtida. Valle treng ein bensinstasjon i bygda.

Fyste onsdagssendinga i 2011 starta med Theis Salvesen, som skal gjeste Valle kyrkje under prestegjeldsaksjonen og tale der fredag 28. januar, og slutta med Mariann Uleberg frå Hovden, som studerer musikk i USA og som spelte tre stykke på gitar for oss i Valle Radio. Dei synte ein strålande teknikk og stor musikalitet og var ei rein oppleving å høyre.

Mellom desse ytterpunkta fekk vi så ein samtale om den anonyme alkoholikaren Yngvar om at AA vil prøve å starte med samlingar i Setesdal og skal ha eit informasjonsmøte om dette for heile Setesdal i Grendi neste onsdag klokka 18. Den som har lyst til å reise, kan kontakte NAV i kommunen, som vil organisere transport. AA vart starta i 1947 og har vore ei god hjelp for mange alkoholikarar sidan den gongen.

Bjørgulv fekk og tid til ein prat med Bjørnar Mørenskog, som har starta butikk på Hovden etter at han avslutta drifta på Hovden Fjellstoge. I butikken sel han klede frå Stormberg og bøkene og kartmåleria som han har gjeve ut. Bjørnar sin aktivitet er i skjæringspunktet mellom kultur og næring, og då Bjørgulv snakka med han i telefonen, var han på veg heim frå Kristiansand etter å ha henta eit lass med klede hos Stormberg. I tillegg til å drive butikk vil han framleis organisere pilgrimsturane frå Hovden til Røldal om sommaren.

Etter at Torleif Harstad hadde hatt Tankar frå Bibelen, kom konstituert rådmann Elise Marie Kringen i studio i programmet Kommunen informerer. Ho fortalde om alt som skjer i samband med helsereformen, sjølv hadde ho vore på eit møte i Arendal i dag og blitt oppdatert på ein del av det som skal skje i året som ligg framfor oss. Mange av dei emnene som ho fortalde om, har alt artiklar på Setesdalswiki, det var helst litt moro å sjå at det vart blå lenker i teksten etter kvart som eg skreiv. Du kan lese om heile kvelden om du fylgjer denne lenka: http://www.eskeland.net/w/index.php?title=Onsdagsprogram_Valle_Radio_20110112&redirect=no

Klokka 20 presenterte Katrine Johnsen og Selma Margaret Dahlin frå Valle vidaregåande skule presenterer. Deira musikk i dag var av irsk og roleg slag, vel verd å høyre på. Og då dei var ferdige med sin etappe i kveldsprogrammet, var ringen slutta i høve til det eg starta denne bloggen med: Mariann Uleberg sin gitarmusikk, ho spelar elgitar, var sjeldan vakker. Og samtalen med henne var også til å få forstand av.

Klokka 21 overtok Ronny Stavsholt og Kåre Rike studio med Opi sending. Tema for rebusane var overnaturlege fenomen. Eg løyste nokre av rebusane og ringde inn, men kom ikkje til studio. Om eg vann krus, får eg finne ut på Facebook etter kvart, Britta Lise pleier å legge vinnarane ut der. Eg skreiv ikkje så mykje om opi sending på Setesdalswiki, eg vart distrahert og hadde ikkje høve til å få med meg alt som hende der. Men dei to i studio verka å ha ein triveleg kveld, klokka vart over 23 før dei sa god natt.