I går skreiv eg om heile sendinga i ein bloggpost, så då brukte eg opp heile stoffet som eg elles kunne spreidd utover i fleire avsnitt.

Dermed må ein rote litt rundt i aktuelle tema for å finne ut kva ein skal skrive om.

Det mest aktuelle temaet er då skulesaka i Valle kommune. Skulegruppa har arbeidd med saka og legg fram to framlegg for kommunestyret til drøfting. Du bør ta ein tur inn på Valle kommune sine nettsider og finne kommunestyrepapira, slik at du veit kva dei snakkar om når du høyrer på sendinga neste onsdag. Du kan og gå innom på biblioteket og lese saka, eller på velkomstsenteret og få ein kopi.

Eg skal prøve å få sakspapira i ei form som gjev meg høve til å sitere noko i ein seinare bloggpost.

Så har eg høyrt endå ei triveleg onsdagssending i Valle Radio. I kveld var det Ørnulf som hadde ansvaret, og han hadde nytta opptakaren godt. Først var han på IntermEsso, EksprEsso, kjært barn har mange namn, og prata med folk som sat der fredagskvelden frå klokka 17. Det var både unge og eldre med i samtalen. Sjølvsagt var eldsjelene Sissel Åkre og Astrid Kyte med, men og tiandeklassingar og sjefen i Utviklingsavdelinga, David Tharaldsen.

Etter det var han på Valle Idrottslag sin basar i Frikyrkja og prata med Tarald Myrum. Vi fekk vite at basaren har lange tradisjonar i Valle, og sjølv om dei slo saman dei to laga for nokre år sidan, heldt dei fram med å ha basaren i Frikyrkja. I tillegg var det og premieutdeling for aktivitet som har vore i sommar.

Etter eit slikt innslag var det naturleg å ta ein telefon til Ragnar Aas på Evje. Han er primus motor for basaren som Misjonssambandet sine kvinneforeningar i Setesdal samlar folk til komande laurdag og kunne fortelje at det var nr. 26 i rekka av basarar dei hadde. Med start klokka 11, møte klokka 13, 16 og 18 og loddsal mellom møta, vert det ein hektisk dag. Før om åra har dei fått inn om lag 300.000 kroner, og dei vona på det i år og. Men i år selde dei ikkje eple, det har vore så mykje eple i år at Ragnar Aas rekna med at dei ikkje ville fått salg på dei om dei hadde hatt eple å selje.

Deretter hadde Håvard Viki andakt, før David Tharaldsen dukka opp i Kommunen informerer att. I tillegg til å fortelje om kulturprogram framover mot jol, snakka han og om småbruksprosjektet, der dei har mål om å få folk på ti tome småbruk i løpet av ti år. Det er tilsett prosjektleiar der, ho skal starte frå nyttår. I Vest-Telemark har dei hatt gode resultat av eit slikt prosjekt.

I timen mellom 20 og 21 var det opptak frå aktivitetsdagen på Tveitetunet. Då fall eg litt av lasset og fekk ikkje med meg heile programmet, men det var den dagen då bygdekvinnelaget synte fram klesdrakter frå boka Rette klede i Setesdal.

Kvelden vart avslutta med Opi sending som vanleg. Den var det Jorunn Lund Harstad som hadde, og ho hadde med seg Kåre Rike i studio. Rebusane handla om utstillarar på Tveitetunet og hovudstader i Europa, i tillegg skulle folk finne ein sang ved hjelp av ei strofe. Sjølv ringde eg inn og son Den norske sjømann er et gjennombarket folkeferd, og sanneleg trekte dei meg ikkje ut til å vinne ein damaskduk, gåve frå Gyro K. Homme. Tusen takk til Gyro og folka i studio. Teknikar denne kvelden var Jørund Georg Jore og Torleif Haugen siste del av kvelden. Og telefonvakter var Torbjørg Hoftuft og Gudrun Nomeland.

No er boka om Selbuvottar som Annemor Sundbø har omsett frå engelsk komen ut. Ho fortalde om boka då ho var i Valle Radio sist. Det førte til store oppslag i avisene, Setesdølen, Fædrelandsvennen og Vårt Land har alle hatt artiklar om dette.

Det høver jo fint å gje boka til jolegåve, det vert ei hard pakke, eventuelt som ei gåve før jol, slik at mottakaren kan strikke mjuke pakkar til å leggje under joletreet i år.

Det er visst på tide å finne fram vottar no etter kvart, for fredag kom det snø i Valle, og sjølv om det ikkje er sikkert at han vert liggjande, er det ikkje noko som tyder på at det vert ein vinter utan bruk for vottar. På Hovden er dei så sikre på snø at dei lovar gratis opphald om det ikkje kjem snø der neste helg.

Sjølv meiner eg at han kan vente til joleferien, sjølv om eg ser poenget med at lyser opp litt i novembermørket. Dei to-tre neste vekene er jo noko av det mørkaste vi har, men så kjem adventstida, og då er mørket mykje mindre påtrengjande.

I denne tida er joleførebuingane gode å konsentrere seg om. Eg skjønar ikkje heilt dei som alt no er ferdige med jolebakst og slikt, og jolebord med jolemat er jo heller ikkje så viktig i førjolstida, då misser jolematen noko av smaken. Men eg gleder meg til det kommunale jolebordet om eit par veker, så eg er vel litt ambivalent her. Slik er det så ofte i livet, ein får vel bare aksepere det.

Kvar fredag når eg køyrer nedetter dalen, høyrer eg på Sørlandssendinga. Litt over klokka 12:30 har dei avisrunde, og på fredagane er det Setesdølen som dei ringjer til. I dag snakka dei i to minutt om oppslaget på framsida, der ein joletreprodusent meiner at det kunne vere lurt av setesdølar med jord å starte joletreproduksjon. Han meiner klimaet er betre for trea i Setesdal enn i Audnedal, der han bur.

I dag var det den eine saka dei nemnde, avisa var jo full av stoff, men programleiaren i Arendal, det er alltid han på fredagane, sa at ein får sjå korleis det går, og så sette han i gang ei ny plate. Eg hugsar ikkje kva det var, det kan for så vidt vere det same. Men at ein i det heile tatt tek ein telefon til ein redaktør for å snakke om dagens avis, og så bare brukar to minutt, det synest eg nærmar seg skandalenivået. Kva musikk var det som var så viktig at dei måtte spele den i staden for å ha ein skikkeleg prat med Sigurd Haugsgjerd? Rein pop denne gongen, av og til har dei musikk frå Setesdal rundt innslaget, men ikkje denne gongen.

Eg blir litt matt av Sørlandssendinga og eg slår ofte av når musikken kjem, og så gløymer eg å slå på når den er slutt. Dermed går eg glipp av reportasjar som eg kunne hatt glede av å høyre på. Men eg får gnagsår i øyro av all den musikken som skal kome mellom reportasjane. Hadde dei hatt 10 minutt prat, kunne ein nok tålt 3 minutt musikk, men når samtalen vert to minutt, då kunne ein like godt bare sitert frå framsida sjølv, og ikkje teke bryet med å ringje til redaktøren.

For meg er det ei gåte at dei må ha så mange folk tilsette i Sørlandssendinga for å spele musikk i sendingane. Dei har sending frå 11:05 til 13 med avbrot av Dagsnytt klokka 12. Det er knapt 120 minutt, kanskje heller 110 minutt. Eg har ikkje hatt oppteljing av kor mange plater dei spelar, heller ingen statistikk på kor mange minutt dei snakkar, men det skulle forundre meg mykje om det er 35 minutt samtale med folk, ein tredel av tida. Og noko av styrken til ei lokalsending burde jo vere at ein kunne snakke med folk i nedslagsfeltet, anten ved at dei kom i studio eller ved å ta ein telefon.

Seinare på dagen kjem Her og nå. Dei kan ha ein heil time utan musikk, men med interessante samtalar, og dei har sikkert fleire lyttarar.

Øyvind Jacob var ansvarleg for den aktuelle timen i kveld, og han hadde ein prat på telefonen med prosjektleiaren for kurset som tolv kvinner i Valle no tek for å verte fagarbeidar helse. Maureen Johnsen har vore avdelingssjukepleiar på Valle Bygdeheim. Men det var eit vikariat, så då det gjekk ut, fekk ho ei prosjektstilling for å leie arbeidet med å gje tolv kvinner fagbrev i sjukepleie.

Dette er sydd saman ved at mange små bidrag kan dekke kostnadene, og så bytter deltakarane vakter for å kunne gå på kurset. I dag hadde dei ein foreløpig test, alle besto den og kan vere med vidare. Den tilsvarte VK1 på vidaregåande skule.

-Dei har jo lang erfaring frå slikt arbeid, så det er den teoretiske delen dei no får på plass. Om det ikkje hadde vore lagt opp slik, ville dei nok ikkje kunna ha teke dette faget, for dei har band i bygda gjennom familie og born.

-No hjelper vi Valle kommune med å få folk med papir til å jobbe her, og det vert nok bare vanskelegare og vanskelegare å få folk i det heile, sa Maureen Johnsen til Øyvind Jacob.

-Kurset skal vare i tre semester og vil gå vårsemesteret og ein del av hausten i 2010. Så vil dei få papir på det dei kan, sa ho og fortalde at ho ikke hadde høyrt om eit liknande tiltak nokon stad i Noreg.