I den aktuelle timen i går var Torleiv Løyland i studio og fortalde om restaureringsarbeidet som er gjort med den gamle badestoga på Flateland. Han kunne fortelje at stoga vart sett opp i 1943 etter at helsedirektør Karl Evang http://no.wikipedia.org/wiki/Karl_Evang hadde peika på at slike stoger ville vere godt for folkehelsa. Dermed vart slike stoger bygde både i Bykle, Oveinang, Valle, Brokke, Rysstad, Ose og Bygland for ei løyving på 10.000 kroner til saman.

Torleiv Løyland hugsa godt då arbeidet vart gjort og fortalde levande frå det. Stoga var sett opp av Stein Juvenes og Knut Løyland. Åsmund Øyuvson Løyland murte pipa og lensmannen i Valle, Juel Lund, smidde beslag til dørene. Stoga stod ferdig i 1944, men det var ikkje noko spesiell markering då, fortalde Torleiv, som hadde sett mykje på arbeidet då dei heldt på. Etter at ho var ferdig, fekk han, då han gjekk siste åra på skulen i oppdrag å fyre. Ein måtte fyre heile dagen, og stoga vart brukt fredag for kvendi og laurdag for karar. Ho var vel brukt 10 til 15 år, men så fekk folk bad heime, og stoga vart ståande til nedfalls.

-Eg tenkte at det kunne vore greitt å få restaurert stoga, sa Torleiv Løyland, som så hadde fått grendelaget med seg på prosjektet. Han hadde skrive ein grundig søknad til Norsk Kulturminnefond på Røros, og dei løyvde pengar. Det same gjorde Aust-Agder Fylkeskommune og Valle kommune, som formelt eig badestoga, så vel som Oveinang Grendelag. Badestoga rommar ti personar og vert framleis fyrt med ved. Men det er kome dusj og toalett der, og varmekablar i golvet fortel om at det er eit heilt nytt hus, sjølv om mykje av det gamle er teke vare på. Huset skal brukast til det som det var tenkt til, det er ikkje tale om eit museumsbygg som skal stå på utstilling, seier Torleiv Løyland, som i tillegg til å skrive søknadane også har stått for det praktiske arbeidet i lag med glade dugnadsfolk på Flateland.

Det kom ikkje program i avisa i går, men her er programmet for i kveld:

Ansvarleg: Bjørgulv T. Berg
Teknikar: Gudrun Rysstad
Telefonvakt: Anna Rysstad og Bjørg Ragnhild Trydal Jansen
Open sending: Jorunn Lund Harstad

18:00 Aktuell time.
Varaordførar Sigbjørg Næss og tidlegare ordførar Tarald Myrum kommenterer Attraksjonsbarometeret frå Telemarksforskning, der Valle kom på sisteplass i Aust-Agder. Vi tek og ein telefon til mannen bak barometeret, forskar Knut Vareide

Deretter vert det ein prat med mannen bak den restaurerte basstoga på Flateland, Torleiv Løyland.

Til slutt tek vi telefon til Birger Trydal, som er med i viltnemnda i Bykle og har synspunkt på trafikk og elg.

19:00 Kommunen informerer. Bygg, eigedom og anlegg.
Halvor Rike og Torleif Homme
19:30 Tankar frå Bibelen.
Over ein open Bibel med Kurt Hjemdahl, deretter spela Harald Haugland plater resten av tida.
20:00 Harald Haugland og Lisbeth Homme snakkar om kronikken i Fædrelandsvennen i dag: … om det gode barneliv.
20:30 Bjørgulv og Roald Tveit i studio med blues og prat.
21:00 Open sending. Jorunn Lund Harstad og Tora Homme Uppstad i studio.
Med rebusar frå Setesdølen tysdag 8. januar

I kveld hadde Niklos mest kormusikk i Postludium. Han starta med Laudate Nomen Domini, ein motett av Christopher Tye, som levde frå 1498 til 1573. Motettkoret i Stavanger Domkyrkje song med domorganist Lars Mæland som dirigent. Ingen artikkel på norsk wikipedia enno, men engelsk har: http://en.wikipedia.org/wiki/Christopher_Tye

Deretter var det Orlando Gibbons (1583 til 1625) sitt Nunc dimittis frå Second Evening Service med koret i Winchester Cathedral, dirigent David Hill. http://en.wikipedia.org/wiki/Orlando_Gibbons

Det tredje stykket var og eit korverk, denne gongen av Felix Mendelssohn (1809 til 1847) med Thomaskoret i Leipzig: Herr, nun lasst du deinen Diener in Frieden fahren. Dirigent var Thomaskantor Georg Christoph Biller. http://no.wikipedia.org/wiki/Felix_Mendelssohn

Då spurde eg om han ikkje hadde tenkt å kome med orgelmusikk i Postludium i kveld. Han kunne trøyste meg med at han ville slutte programmet med orgelmusikk. Og så kom to stykke basert på høgtidsverset sin melodi: Av høyheten opprunnet er, eit svensk og eit dansk stykke:

Gustav Adolf Hägg (1867 -1925): Vär hälsad, sköna morgonstund. Festpreludium. Organist var Per Thunarf på orgelet i St. Klara kyrka i Stockholm. http://sv.wikipedia.org/wiki/Klara_kyrka Her er pg bilete av kyrkja og orgelet.
http://sv.wikipedia.org/wiki/Gustaf_H%C3%A4gg

Johannes Nørgård, fødd 1916: Af højheden oprunden er – frå samlinga Periokope, orgelkoraler til kirkeåret. Domorganist Niels Henrik Nielsen spela på orgelt i Vor Frue kirke i København. Stor kveld med variert kor og orgelmusikk i Postludium

Eg las med interesse denne artikkelen i Dagbladet laurdag 5. januar 2008 og kjende meg att i nokre av dei problema Knut Nærum tek opp. No har han bestemt at han ikkje skal kjøpe bøker i år, det er eit nyårsløfte nokon kvar kunne trengje å gje. Einaste unntaket er at han kan gje bøker som gåve, han kan få bokgåver, og han kan låne bøker.

Grunnen til det er at han skal lese dei bøkene han alt har, som han ikkje har fått lese, fortel Knut Nærum og skildrar levande situasjonen på nattbordet. Der er det ein stabel på 43 cm, på golvet er det to, ein på 25 m og ein på 15 cm. Han kan verte teken av eit bokskred, fortel han og legg til at dei etterlatne i så fall ikkje kan vite om han døydde lukkeleg, men at han hadde kulturelle ambisjonar.

Grunnen til at han skriv om det i avisa, er at det er eit vanskeleg nyårsløfte. Han vonar at det skal vere lettare å gjennomføre det når alle har lese om det, for når han står i bokhandelen og kjenner på ei ny bok han gjerne ville skaffe seg, vil folk sjå han og seie at no klarte han det ikkje lenger. Då må han seie at det skal vere ei gåve, eller så må han stå mot freistinga og legge boka bort, kanskje etter å ha kjent lukta av trykksverte frå sidene.

Eg har ikkje funne kåseriet på nettet, men wikipedia har ein artikkel om Knut Nærum her på nynorsk wikipedia: http://nn.wikipedia.org/wiki/Knut_N%C3%A6rum Om du går til den på bokmål, finn du at den er litt større.

Eg trur ikkje eg klarar å gje eit slikt løfte. Men talet på bøker eg kjøper er mindre enn før, og det bør truleg reduserast endå meir. Når no Valle Folkebibliotek har fått ei så god og rask ordning for fjernlån frå nyår, slik biblioteksjef Lisbeth Dalquist Homme fortalde om i sendinga fredag, så kan ein jo låne det stoffet ein treng der. Og så er det eit lurt råd å lese noko av det ein har i bokhylla frå før. Det har eg teke med meg.

I dag passerte vi 200.000 sidevisningar. I løpet av dagen har det vore 178 personar inne på bloggen. Dei har sett på 2706 sider, noko som gjorde at vi passerte 200.000 i løpet av dagen. No står teljaren på 200.900 sidevisningar.

Eg veit ikkje kven det er som les bloggen. Det er bare 23 som har abonnert på han, det vil seie at dei får epost i e-postkassen sin når eg skriv eit innlegg. Andre vil kome til bloggen fordi dei finn noko eg har skrive om på google eller ein annan søkemotor.

Eg prata litt med Helge Homme i dag om dette, og då meinte han at eg burde minne om at det er høve til å abonnere på bloggen som e-post. Då får du ei triveleg melding frå meg mest kvar dag. For eg prøver å skrive minst eitt innlegg kvar dag.

Takk for tilbakemeldingar og gode ord. Det gjer det meiningsfylt å skrive.

I sendinga i går sa eg at gevinstane frå open sending skulle eg ta med til Evje i dag då eg drog nedover. Men eg droppa turen i dag, når politiet oppmodar folk om å vere heime, treng ein jo ikkje trasse seg fram. Så de får vente på premiane til veret betrar seg.

To kveldar måtte til for å lese minneoppgåva Tarald Nomeland skreiv i 1981. Den er trykt i Agder Historielags årsskrift nr. 62 – 1986 og fyller 14 sider der. Det var Torleif B. Harstad som las, og det har vore ei glede å høyre på. Fleire av dei som ringte inn i kveld, kommenterte dette positivt, så ei slik oppgåve er ein rikdom å ha offentleg.

Truleg ligg det ein del skrivne tekstar rundt om med minne frå livet til forfattarane. Men det vert verande i skrivebordsskuffene. Det er dumt. Har du noko, kan det vere lurt å prøve å publisere det, anten det er i bok eller hefte eller i eit program på radioen.

Fredag 4. januar Sending for heile Setesdal

Ansvarleg: Harald Haugland
Teknikar: Knut Olav Tveiten
Telefonvakt: Gudrun Nomeland

18:00 Utvida aktuell time
19:30 Tankar frå Bibelen ved Håvard Viki
20:00 Bachs juleoratorium siste del
20:30 Torleif B. Harstad les frå Tarald Nomeland si minneoppgåve
21:15 Opi sending

**Skulefokus i Valle Radio**

Valle Radio startar vårsemesteret 2008 med ei sending for heile Setesdal fredagskvelden. Den fyrste timen av sendinga får skulefokus. Det er yrkesmesse for Agder neste veke, og avdelingsleiarane på dei vidaregåande skulane i Setesdal vert med i sendinga, frå studio eller telefon. Då vil dei fortelje om opplegget dei skal ha på yrkesmessa og tilbodet dei har til nye elevar frå neste år. Det kan difor vere lurt å skru på lokalradioen klokka 18.00 om du vil verte oppdatert på dei vidaregåande skulane i Setesdal.

Vi skal og snakke om den nye ordninga som biblioteka på Agder starta frå årsskiftet. No kan du låne bok på alle biblioteka i heile landet og levere inn att på det næraste. Heilt gratis! Lisbeth Dalquist Homme i Valle er i studio, men vi tek telefonkontakt med andre bibliotekarar i Setesdal, seier Harald Haugland, som har ansvaret for sendinga.