**Knut Kjetilson Jore** var deltakar i Ungdommens Kulturmønstring i Trondheim. Det var tre dagar med finale i går kveld. Eg veit ikkje om han kom forbi innleiande rundar i Trondheim, det står ikkje noko på sidene om det. Men det er eit intervju og bilete av han på
http://www.ukm.no/magasin/2007/intervjuer.php?mid=87&mer=S19.02.2007-19:50:55-0940

Det ser ut til at han fekk hikke under framføringa. Men han er jo bare 13 år og har mange høve til å framføre stev utan hikke seinare.

Stev er i det heile ei levande kunstform med svært lang tradisjon. Knut framførte stev i Trondheim, rundt påske kom det ut ei stevbok med 366 stev, Stev for dagen, av Kirsten Bråten Berg, Astrid Rysstad og Kari Rolfsen. Den er kjekk å gripe til både for å få eit stev av Kirsten og for å lese eit sjølv. Her er det som folkemusikk.no seier om boka:
http://www.folkemusikk.no/index.php?option=com_content&task=view&id=955&Itemid=75

Agder Folkemusikkarkiv på Rysstad har hatt eit prosjekt med å skrive av stev frå gamle opptak og leggje dei ut på Internett. Her finn du dei: http://www.folkemusikkarkivet.net/agder/ Eit av dei eg fann der då eg søkte på heitt, var dette:

Å liksom soli o heitt kan blenkje,
så heitt kan jenta på guten tenkje.
Å liksom snjovatnet renn av rist,
ja så græt o au itt o hev an mist.

Ta deg ein tur på Folkemusikkarkivet, då kan du lage di eiga Stev-for-dagen-bok. Om du søkjer på sol, finn du nokre av dei vakraste steva, i alle fall på ein flott junidag.

Og sjølv om det er juni og varmt i veret, kan du leite fram Jol i Setesdal og kose deg med steva i annonsane der. Dei gjer bladet makelaust.

Ha ein fin sundag.

Det er ikkje triveleg å ha rådyr i hagen. Dei finn solbærbuskar og kva anna godt ein kan nemne, i kjøkkenhagen er det nesten bare løk dei ikkje likar.

Fredag høyrde eg på Norgesglasset, det er eit triveleg program. Ein gjeng i Randaberg gjekk der bøndene skulle slå og leita opp kje, slik at dei ikkje skulle kome i rundballar eller silo. Når eit lite kje, kanskje bare eit til to kilo, ligg og trykkjer, er dett ikkje lett å sjå det for den som kjører traktor og har det travelt i slåtten. Men denne gjengen med naturvernarar gjekk fyrst gjennom enga og såg etter liggegroper. Om dei fann ein kalv som låg og trykte, sette dei opp stokkar rundt han, slik at traktoren ikkje skulle ta knekken på kalven. Dei fortalde og at mora kunne vere opp til ein kilometer frå kalven og bare kom dit han låg når han skulle die. Ettersom kalven luktar lite, finn ikkje reven han når mora er ein heilt annan stad.

Vel heime i Mandal kunne eg så sjå ei geit og to kalvar på jordet utanfor kjøkkenvinduet. Dei har overlevd slåtten og gjekk på nyslått mark, to små kje som hoppa rundt mora og koste seg. Sjølv om ein mange gonger er ilter over rådyr som kjem i hagen om natta, er eit slikt syn noko eg set pris på. Å leve så tett på naturen er interessant sjølv for ein stovegris og datafreak som meg.

Turistar betalar 100.000 for at Olav Neset på Neset Camping skal syne dei elg. Elgsafari har vore eit tilbod fleire plassar, eg er litt usikker på om det er nokon som driv med det i Valle og Bykle no. I Mandal er elgen omtrent blitt borte i løpet av dei siste åra. Utbygging reduserer det naturlege området som han hadde tidlegare. Men rådyra held ut, til glede for ein som kikkar ut vinduet ein tidleg morgon.

Øyvind Jacob hadde med seg Leonhard Jansen i studio ved starten av sendinga onsdag. Leonhard kunne fortelje at det ikkje hadde vore særleg mange arkeologiske utgravingar i Setesdal. Men ein har funne spor etter menneskeleg aktivitet (pollen frå korn) på Breive tilbake til 2800 før Kristus. Sidan er det spor tilbake til folkevandringstida, om lag 200 til 400 år etter Kristus. Men det er først utover mot vikingtida at det er mange spor etter busetnad i Setesdal.

Han kunne og fortelje at ein kan ta prøver ved å stikke ei stang ned i ei myr og få opp jordprøver. Ettersom ein har tabellar for kor mykje ei myr veks, kan ein rekne ut alder på pollen som ein finn i slike lag.

Dei snakka og om utgravingane på Hovet og Bjørgum. Øyvind hadde vore bortom og snakka med folka som held på der. Leonhard fortalde om då dei skulle bygge huset i svingen på Hovet, då fann dei fleire ting. I området der er det både gravrøyser (steinfylte haugar) og gravhaugar (jordfylte).

Øyvind fortalte også at han skulle etablere eit boligfelt på sin eiendom, og at han måtte ha ein kontroll i høve til fornminne. Dei reflekterte litt over korleis det var for 25 år sidan då Leonhard var på utgraving. Då var det ingen satelittfoto, dei nytta luftfoto som dei sette knappenåler på for å marker kor dei grov.