Denne kvelden fekk vi problem med å kome på lufta. Torleif Soltun Haugen vart helst litt varm i toppen før vi endeleg kom på lufta klokka 18:15. Då hadde han endåtil hatt kontakt med Jørund Georg Jore som var i Kristiansand for å finne ut kva som var problemet.

Fyrste temaet var at gaupa er komen tilbake til Valle. På telefon fortalde Bjørgulv N. Berg at han hadde mist ein vér på Uppstad sist veke. Folk som har peiling på dette hadde slege fast at det var gaupa, mellom anna ut frå bitemerker.

Anna Arneberg, som steller med jord og skog i kommunen, fortalde at dette var fyrste gong ho høyrde om slikt i den tida ho hadde vore i kommunen. I går hadde ho vore innanfor Everdalen for å leite etter to reinsdyrbukkar som var rapportert med horna innfiltrert i kvarandre. Det var ikkje råd å finne dei, så om dei hadde kome laus eller døydd, var ikkje godt å seie.

Deretter var det ein telefon til Torstein Sødal, som er på turne med Inger Lise Rypdal i samband med Aksjon Håp, som skal vere 10. desember. I morgon skal dei vere på Evje, der skal dei syngje saman med eit ungdomskor på Evje. I kveld er dei i Filadelfia, Vennesla. Konserten klokka 19.00 i Evje kyrkje er gratis og Sødal vona at folk frå Øvre Setesdal tok turen ned.

Neste innslag var ein samtale med Trond Støle om ungdomsarbeidet i Valle kommune. Det vil eg kome tilbake til i eit seinare innlegg på bloggen.

Til slutt fekk eg ein prat med Frode Buen om reiselivet i Setesdal. Den vil eg og kome tilbake til på bloggen i eit seinare innlegg.

I dag er det eitt år sidan eg oppretta bloggen. På denne tida har det blitt 350 artiklar om laust og fast rundt Valle radio.

63 artiklar fell i gruppa **program**, det vil seie det er oversyn over program som skal vere i radioen. Det er jo nyttig når vi har live streaming over Internett, for då kan folk sjå oversyn over programmet utan å ha Setesdølen.

Dei andre taggane er meir tilfeldige. Eg skulle nok gått gjennom stoffet og sett på taggar, for det er vanskeleg å finne fram i stoffet når det ikkje er tagga, det ser eg jo.

Nesten ein artikkel kvar dag heile året. Dersom du går gjennom stoffet, vil du verte overraska over kor mange tema vi har vore innom i løpet av dette året. Likevel fangar bloggen neppe opp halvparten av alt vi har hatt oppe. Mange sendingar har eg ikkje høyrt, nokre gonger har eg høyrt sendingane utan å skrive om stoffet.

Likevel er det altså blitt nærare 300 artiklar om emne som Valle radio har dekka i løpet av dette året. Setesdølen som avis kan ein ta vare på, kanskje til og med binde inn når årgangen er over. Valle radio kan ein ikkje fange på same måten, dermed er det fort at ein ikkje hugsar det som har vore oppe, sjølv om det bare er gått nokre månader. Bloggen fangar opp litt av det som rører seg i bygda vår og tek vare på det for ettertida.

Det er grunn til å gratulere meg sjølv med dagen i dag.:D

Til no i år har eg skrive 346 artiklar på bloggen. Om fem dagar er det eitt år sidan eg starta skrivinga. Det er blitt ganske mange tastetrykk gjennom det året. Mange tema har eg vore innom, likevel er det bare ei lita avspegling av alle dei emna Valle radio har teke opp i løpet av året. Det er ikkje mogleg å få med seg alt når ein bare skriv på dugnad, truleg hadde det ikkje vore mogleg om ein hadde det som heiltidsjobb heller.

Likevel lurer eg på om eg klarar å skrive fire artiklar kvar dag dei dagane som er att til vi rundar 1. november. Om eg klarar det, vil eg ha skrive i gjennomsnitt ein artikkel kvar dag heile dette året. Vonleg har det vore til glede for lesarane, som har auka i tal no etter kvart. Det er nesten 30 innom kvar dag, og mange dagar i oktober har eg hatt over 100 sidevisningar. Det er no totalt nesten 26 000 sidevisningar på bloggen min, det er eg ikkje misnøgd med.

Alt i alt meiner eg at bloggen har vore eit godt supplement til programma i radioen. Noko av det vi har sendt, har vi kunna fange og få ned på trykk i staden for at det bare skal leggjast ut i eteren og vere til glede for folk der og då. Anna har vore tankar som har kome i samband med programma.

Når eg søkjer med Google og har med Valle i søkeordet, vil det ofte kome tilslag frå sider på bloggen min, for det er mange emne som har vorte med på bloggen. Eg kunne jo likevel ha ynskt at det hadde kome nokre kommentarar til det eg skriv, i alle fall av og til. Men eg skriv uansett. Takk for at du les.

I kveld var det kommunestyremøte, og dei kveldane er det ikkje vanleg sending. Men i kveld kunne ein godt hatt det, for kommunestyremøtet var slutt før klokka 19.00 og det er jo eigentleg bare tilsvarande Nyhetstimen ein vanleg onsdag. Eg hadde ansvaret for teknikken, med god hjelp av Jørund som kopla opp og ordna til. Men lenge vart det ikkje….

Norvald Losnegard er ein forfattar som du truleg ikkje visste om. Han er fødd i 1927 på Stord og er altså tett opp mot 80 år. I 1954 var han utdanna sivilingeniør i kjemi, og etter eit par år som stipendiat ved Institutt for teknisk biokjemi på NTH i Trondheim, fann han vegen attende til Vestlandet. Fyst var han fem år ved Haukeland sjukehus. Frå 1962 var han ved Fiskeridirektoratet i Bergen, og der vart han verande i 30 år, dei siste 17 som sjef for laboratoriet. Han har stått for ganske mange undersøkingar i den samanhengen.

* 1. Losnegard, Norvald – Den kvisten er best som bøyer seg og ikkje brest cop. 2003
* 2. Losnegard, Norvald – Primstaven cop. 1999
* 3. Losnegard, Norvald – Hygienisk standard og kvalitet på frosne fiskeprodukter 1992
* 4. Losnegard, Norvald – Oppdrettstorsk, kvalitet og anvendelse 1987 og 1986
* 5. Losnegard, Norvald – Undersøkelser over tørrfisk 1979
* 6. Losnegard, Norvald – Undersøkelse av ekstraksjonsmidler for bestemmelse av fett 1979

Sjølv om du ikkje visste om Losnegard, har du truleg nytt godt av arbeidet hans, for det gjeld dei fleste former for fiskekvalitet.

Som pensjonist har han gjeve ut Primstaven, ei bok der han samla stoff om gamle merkedagar.. 1. boka kom i 1999, no er ho komen i ei utvida utgåve frå 2006.

Meir interessant er boka om gamle ordtøke. Han har samla 2800 ordtøke og sett dei om til små vers med enderim. Det er blitt ei bok på over 200 sider på Setesdalsforlaget. Begge bøkene kan du kjøpe på Husfliden i Valle, ta gjerne turen innom og skaff deg noko interessant lesestoff.

Det er mange ordtøke å dele med dykk frå denne boka:

Kunst kan ikkje, men tonar kan nå
Inn i den mørkaste krå.

Difor kjem det nokre tonar her no i kveld. Velkommen til Valle radio tysdag 24. oktober 2006.

Før kåseriet spelte eg frå plata **Judith** Sommer i all evighet **Barnetro**, og etterpå var det tonane frå **Der roser aldri dør** som smaug seg inn i den mørkaste krå.

Eg fekk ein telefon i ettermiddag frå Konrad Byklum. Han var lei for at han ikkje rakk å kome til Valle radio i kveld og vere med i programmet om FN. Det var så mykje å gjere på jobben at han kom til å måtte arbeide overtid i kveld også, og dermed ville han ikkje rekke å vere med. Men han lova å vere med om vi kom tilbake tidlegare i høve eit anna program seinare.

Slik går det nokre gonger. Vi får prøve å finne ein annan vinkel i kveldens program.