Onsdagskvelden hadde eg med meg Hans Georg Kohler på telefonen frå Oslo i Haralds time i Valle Radio. Han fortalde at i Kulturveka 2014 skulle han stå for Solstad-foredraget. Det skulle vere i Riddarsalen på Sølvgarden sundagskvelden.

Hans Georg Kohler hadde blitt kjent med Dag Solstad då han budde i Berlin på same tid som Dag Solstad budde der. I kveld skulle vi bli kjent med han og den siste boka hans, Det uoppløselige episke element i Telemark i perioden 1591-1896.

Eg trur det var over 50 personar i kjellaren på Sølvgarden klokka 19 då Hans Georg helsa velkommen og gav ordet til Dag Solstad. I eit timelangt foredrag tok han opp situasjonen for romanen i landet vårt så vel som i Europa og USA no. Kapitalismen styrer alt, og dersom romanen ikkje har ei form som ligg på linja mellom Dickens og Jo Nesbø, bør forfattaren innordne seg, elles kan han ikkje rekne med å få gitt ut romanen. Dei tradisjonelle forlaga blir meir og meir like Juritzens forlag, og til og med Gyldendal gir ut fire binds porno og kallar det roman, meinte han og synte til femti gråfargar-bøkene frå i fjor.

Etter å ha teke eit oppgjer med denne kommersialiseringa av romanen, vende han seg til dei kritikarane som hadde meldt romanen hans i fjor. Særleg fekk Aftenposten sin kritikar gjennomgå, utan namn, men då eg kom heim, googla eg litt og fann fort ut at det var Ingunn Økland han meinte. http://www.dagsavisen.no/kultur/solstad-pa-turn/

Han fortalde og at han laga foredraget til eit arrangement på Hamar og kalla det Til Hamar med slakt, fritt etter Prøysen, men at det sidan heller har fått namnet Solstads Svanesang. Han har halde foredraget fleire stader, og han var svært engasjert i den timen foredraget varte.

Etter han var ferdig, kom Kirsten Bråten Berg på scenen saman med Hallvard T. Bjørgum og Gunnar Stubseid. Dei delte slåttar, stev og ballade før Hans Georg hadde ein samtale med Solstad om romanen. Heile kvelden vart avslutta av Sigurd Brokke på munnharpe. Då var det gått over to timar til ein interessant og annleis kulturkveld i Kulturveka 2014.

Desse to første kveldane i Valle Radio i haust skulle eg unna mange å få oppleve. I går skreiv eg om den burmesiske halvtimen. I dag blir det ein samlepost om tema vi var innom i radioen resten av dei to kveldane.

Etter kåseri og andakt og i går kveld kom Kirsten Bråten Berg i studio og fortalde om Allsangkveld som ho planlegg som del av kulturveka. Då fekk vi og markere at Mads Berg Songbok er hundre år i år. Det heiter at om hundre år er allting glemt, men ho er ikkje heilt borte frå minnet, og mange av songane er det mange som minnest.

Så kom Torunn Charlotte Lund og fortalde om kulturbygget som er planlagd der Menighetshuset står i dag. Det fortener ein eigen blogg seinare. Etter Torunn hadde eg ein prat med Olav Mosdøl på telefonen og Chris Nyborg i studio. Vi snakka om ein nasjonal nyhet, den får også vente.

I dag hadde eg ordførar Tarald Myrum i studio frå Valle kommune. Det vart ein samtale som gav energi der vi var innom mange tema, tida gjekk helst altfor fort. Eg kjem noko innom noko av det vi snakka om seinare.

Så kom Arne Tronsen og ausa av sin kunnskap om konsesjonskraft, han har arbeidd med det i over 30 år og i sommar utvida arbeidsområdet hans seg ein god del. Så var Signe Sollien Haugå med frå ein parkeringsplass i Froland, Tonhild Kråkenes på telefonen frå Bykle oppmoda alle om å setje av sundagen til middag i menighetshuset til inntekt for TV-aksjonen og Hans Georg Kohler var med frå Oslo for å snakke om Solstad-foredraget som skal vere på Sølvgarden sundagskvelden før Astrid Nomeland runda av dei mange tema eg var innom med å fortelje om kvelden som Diakoniutvalet og Helselaget skal ha på Soknehuset neste tysdag der vår nye prostidiakon Anna Heggland skal snakke om Kvardagsdiakoni.

Mykje av dette vil eg kome inn på i bloggskrivinga min framover. Vonar det vil fange interessa di. Eg var i alle fall oppglødd då kvelden var over.

I kveld starta vi opp att i Valle Radio etter ein alt for lang sommarferie. Men du som les bloggen min veit at grunnen var naturens luner.

Siste sending før ferien hadde eg med burmesarar som bur i Bykle og Valle for å lage ei prøvesending på burmesisk. Det bur nærarare hundre burmesarar i Setesdal og vi sender til heile dalen. Så vi kom til at vi vil prøve å ha faste sendingar på burmesisk med nyheter frå Setesdal på deira språk. Dei fleste har karensk og chin som morsmål, men burmesisk er felles språk, så vi nyttar det.

I kveld hadde eg tenkt at Htoo Thaw og Michael frå Valle skulle ha nyheter og Eh Ka Mwee frå Bykle skulle ha andakt. Men han var på jobb og kunne ikkje vere med. Difor tok Eh Ka Mwee på seg også nyhetsjobben.

Dei kan lese nyheter frå den store verda på burmesisk frå BBC på internett, men lokale nyheter er det ikkje så lett å få. Difor plukka vi ut nokre nyheter frå Setesdølen. Her er overskriftene:

Burmesisk kafé i Valle menighetshus sundag 19. oktober frå 13.30
Burmesisk kulturkveld på kulturkafeen i Bykle samfunnshus neste onsdag frå klokka 19
Elevar i Åseral har samla inn leiker og anna i prosjeket Barn hjelper barn, som går til Cuba
Riksveg 9 mellom Valle og Rysstad har fått 25 mill. frå Staten og utbygging vil starte neste år

Vi møttest klokka 16.30 og laga dette saman. Eg skreiv kort notis på bokmål og dei omsette til burmesisk og gjorde det klart til sendinga starta 17.30. Etter ein kort presentasjon, var vi i gang. Ti minutt med nyheter, så ein burmesisk sang. Deretter andakt og ny sang.

Plutseleg var halvtimen gått.

Etterpå var alle nøgde med resultatet. Neste tysdag blir det likeeins. Eg trur vi er einaste lokalradioen i Norge som har slike sendingar. Eg vonar at folk vil høyre oss på Internett etter kvart som tiltaket blir kjent.

Endeleg, då er vi klar til å kome på lufta att. I alle fall var det meldinga eg fekk før helga, og det ser ut av lista som om eg får gleda av å vere i radioen både tysdag og onsdag.

Foreløpig er det litt uklart korleis programmet blir, men i morgon tidleg må eg sende program til avisa, og då vonar eg å ha det klart i grove trekk. Eg hadde tenkt å ha med Leif Kvinlog onsdagskvelden for å snakke om Kulturveka 2014, men han er på tur til Polen, så eg må finne ei anna løysing. Men ettersom kulturveka startar til fredag, vil nok noko av programmet i kulturveka prege denne veka i Valle Radio.

I haust blir det altså etter opplegget bare onsdagssending annankvar onsdag, så når eg har hatt mi sending onsdagskvelden, går det to veker. Då er det kommunestyremøte, og så går det to nye veker før det blir ordinær onsdagssending. Om du ikkje er av dei som har frekvensen ståande på heile tida, må du altså fylgje med i avisa og på facebook for å sjå kva tid det er sending, for med annankvar onsdag, er det lett å gå i surr.

Vonleg klarar vi å halde oppe radioen i tida framover. Det ville vore synd om vi måtte innstille.

Det meste av det eg gjer, vert lite influert av Statsbudsjettet 2014. Sjølvsagt er det viktig at norskopplæring for flyktningar held fram, det er jobben med det som sikrar lønna mi kvar månad. Men elles er eg for det meste i frivillig sektor, der har statsbudsjettet lite å seie, så langt eg kan forstå.

Då står det bare att å kunne glede seg over at det vart pengar til Riksveg 9, slik at strekninga Sandnes-Harstadberg kan bli utbetra. Alle som kjører mellom Valle og Rysstad, vil glede seg over dette, og det er takka vere Statsbudsjettet 2014 at pengane til dette kom på plass. Rett nok vert det lagt inn ein stor lokal pott, men utan 25 mill. frå statsbudsjettet, kunne ein ikkje starte utbetringa.

Dei andre sidene ved statsbudsjettet 2014 har eg ikkje sett meg så godt inn i, så dei vil eg ikkje kommentere noko.

I gårsdagens Aftenposten, nede på side 2, hadde avisa sitert Setesdølen si melding om at Torunn Charlotte Lund er på veg inn i fylkespolitikken, medan mannen hennar er på veg ut. Kommentaren hos “tanta i Akersgata” var nokså lakonisk: “Endringen ventes bare å få helt beskjedne følger for hverdagslivet til folk flest i Aust-Agder.”

Det er ikkje så vanskeleg å vere einig i det avisa skreiv her. Kvardagslivet til folk flest i Aust-Agder vil neppe bli endra noko særleg av at Bjørgulv skal vere meir i Valle enn i Arendal og at Torunn ein gong i månaden eller så, dreg til fylkeshuset for å vere med på fylkestinget. Men for dei to det gjeld, vil det nok bli ei stor endring.

I avisene kan vi no lese om førebuingane til kommuneval og fylkestingsval. Vi ser at mange seier nei takk til å halde fram og at det ikkje alltid er like lett å få nye til å stille opp. Det gjeld både i politikken og elles i samfunnslivet, mange avviklar det engasjementet dei har hatt, og det er ofte vanskeleg å få nye til å engasjere seg.

Dette har vi og sett i Valle Radio. Difor ser det ut til at vi må ha redusert frekvens på sendingane når vi kjem i gang att i neste veke. Eg vil halde fram med tysdagssendingane kvar veke, men onsdagssendingane vil bare gå annankvar veke, om ikkje nokon finn ut at dei vil lage ekstra sendingar. No blir dette semesteret kort, og så får vi sjå korleis det går når vi skal evaluere hausten og planlegge våren.

Du som ser i Setesdølen etter programmet til Valle Radio har nok alt funne ut at det ikkje er sending i dag heller. Om du av gammal vane skrudde på radioen for å høyre tysdagssending med Harald Haugland i kveld klokka 18, fann du nok fort ut at det var P4 og ikkje Valle Radio på frekvensen.

Grunnen til den seine starten etter sommarferien er at sendaren i Åmli ikkje overlevde uver i sommar. Etter det eg veit, brann han opp. Også datamaskinen som teknikaren nyttar, knelte i løpet av sommaren. Den kunne vi nok erstatta nokså lett, men det var verre med sendaren i Åmli. Der måtte det byggjast ein ny boks. Etter det vi forstår, skal ny sendar monterast i slutten av denne veka. Difor satsar vi på å vere på lufta frå veke 42. Det gleder vi oss til.

At vi ikkje har vore på lufta, har jo og blitt avspegla på bloggen. Heile haustferien hadde eg pause og skreiv ingenting på bloggen. Ettersom bloggen i alle fall for ein stor del speglar sendingane i radioen, kunne han nok vore tom for innlegg i heile sommar. Men litt kan ein jo skrive likevel. Og stoff relatert til Setesdalswiki har i staden teke plassen til bloggen.

I tida framover vil kanskje og noko av stoffet i Setesdølen verte gjenstand for kommentarar på bloggen. Kan Aftenposten kommenter Setesdølen, kan vel også eg gjere det, truleg les eg avisa grundigare enn dei fleste. I dagens Aftenposten, nede på side 2, hadde avisa sitert Setesdølen si melding om at Torunn Charlotte Lund er på veg inn i fylkespolitikken, medan mannen hennar er på veg ut. Kommentaren hos “tanta i Akersgata” var nokså lakonisk: “Endringen ventes bare å få helt beskjedne følger for hverdagslivet til folk flest i Aust-Agder.” Det er ikkje så vanskeleg å vere einig i det avisa skreiv her.