Onsdagskvelden hadde eg sett opp ein heil time til å snakke om snøscooterar i Valle Radio. Grunnen til det er at Setesdalsmuseet planlegg ei utstilling om dette. Her er kva dei skreiv på Facebook 6. februar:

Snøskuterar i kombinasjon med ferdsle i utmark har etter kvart nærare 50 år med historie bak seg. På godt og vondt har skuteren vore ein medhjelpar i arbeidet og ein likekamerat i fritida. Knapt nokon i bygdene i Setesdal kan påstå å ikkje ha eit forhold til skuteren.

Som ein vil skjøne er vi opne for idear og innspel, og håper på mange tilbakemeldingar her på FB!

I løpet av dei tre månadene fekk museet 23 liker og 4 delingar. Truleg tok og folk kontakt med museet, for no ser det ut til å bli ei utstilling der dei vil vise ti scooterar, frå nokon av dei fyrste som kom til Setesdal, til dei mest moderne. I Valle er det fire scooterforhandlarar, og dei har vore til god hjelp.

Mellom anna har dei fått tak i Røde Kors sin scooter, som var ein av dei fyrste. Den har hatt eit skiftande tilvære etter at han gjekk ut av bruk, i programmet fortalde Leonhard Jansen at scootersamlaren Svein Jore hadde fått tak i den grøne scooteren i Kvinesdal og fått han heim til Valle. Pål Dale kunne fortelje at Røde Kors hadde telt ved Bakkebu i påska og scooteren på plass om noko skulle hende, men det skjedde sjeldan noko. Elles leigde dei ut scooteren med sjåfør til folk som trong frakte noko på heia. Kjetil Rike administrerte ordninga, og mange nytta seg av den. Pål trudde folk melde seg inn i Røde Kors for å få vere med og køyre scooteren den fyrste tida.

http://www.setesdalswiki.no/wiki/Valle_Radio_9._mai_2012

-Eg vonar at ikkje FM fell ut i dag som det gjorde i går kveld klokka 19, frå då av sende eg bare nettradio, sa eg til Jørund Georg då han i kveld var innom i Valle Radio for å minne oss om korleis vi skulle snakke i dei nye mikrofonane i studio.

Han vart litt lang i maska med det same, så kom det: -Det var min feil. Eg hadde gløymt det skulle vere sending, så eg tok ned den linken som går frå Valle Radio til Bykle då me skulle drive feilsøking på noko. Heldigvis at du sa det no, for eg hadde tenkt å gjere det same i kveld, eg kom ikkje på at den linken også vart brukt av Valle Radio.

Så var nå den gåta løyst, det var jo kipt for alle dei eg prata med på telefonen som trudde at det var mange i øvre Setesdal som høyrde kva dei sa, og så var det bare eg og fem-seks lyttarar på Internett.

Eg lurer forresten på korleis det vil vere om fem år når FM-nettet skal slåast av, slik Ørnulf fortalde på årsmøtet til Valle Radio. Då vert vi nettradio, men eg ser ikkje for meg at alle som no høyrer på FM-bandet, vil verte med over på nettet. Og ingen har råd til å legge om slik at vi kan ha DAB, det vil koste millionar.

I kveld vart det ikkje problem. Alle som skulle vere med og bidra i sendinga, dukka opp og vel så det. Både Vidar Homme, Terje Emblemsvåg og Tor Egil Vaule Andersen var med i Aktuell time, den siste på telefonen frå Oslo. Eg fekk forresten informasjon til å skrive artikkel om han på Setesdalswiki i dag, sjå http://www.setesdalswiki.no/wiki/Tor_Egil_Vaule_Andersen

Så var Torleif B. Harstad på plass med Tankar frå Bibelen, og deretter vart studioet mest fullt då Alida Harskamp, June Thorsen http://www.setesdalswiki.no/wiki/June_Salte_Thorsen og Benny Uppstad. Dei fortalde levande og engasjert om Hylestad skule og det gode samarbeidet det er med FAU og at bygdefolk møter opp når dei lagar bygdekveldar og andre arrangement.

Klokka 20 var det tid for ein prat om snøscooter i nytte og fritid, ei utstilling som Setesdalsmuseet skal ha i sommar. Leonhard Jansen og Pål Dale sat i studio, og Knut Olav Tveit kom med frå Oslo og fortalde levande frå kampen for å kome opp Hegglandskleiva. Den timen gjekk ganske fort, eit par scootersongar fekk vi og tid til.

Så var det open sending med Jorunn Lund Harstad. Ingunn og Bitte dukka opp som telefonvakter og kvelden gjekk fort i triveleg lag, så plutseleg var klokka 22.30 og det var tid for å runde av. Så takka Torhild Sandnes, som var teknikar, for kvelden og eg sat att for å skrive bloggen. Den er no ferdig, så då kan også eg seie god natt.

Her er lenke til programsida på Setesdalswiki: http://www.setesdalswiki.no/wiki/Valle_Radio_9._mai_2012

Ikkje veit eg kva som skjedde, men midt under sendinga i kveld fekk eg melding om at FM var falt ut og at sendinga bare gjekk på Internett. I går på årsmøtet sa Ørnulf at FM vil bli slått av om fem til ti år, men for oss vart det slått av i kveld. Vi valde å halde fram sendinga som internettradio, ettersom det var lydarar på nettet, etter det vi kunne sjå. Men det er jo litt rart å vite at folk i Valle ikkje kan høyre oss.

Sendinga i kveld var litt spesiell, ettersom eg hadde bygga ut sangkveld med journalistisk arbeid, eg tok ein ringerunde til Torjus Rygnestad, som har skipa Facebookgruppa Bilete av Bykle og Valle i gamle dager. Eg snakka og med Ole Aa. Brattfjord, som har gitt ut plata Dalen vår. Vi fekk høyre tre av songane frå den plata. Så hadde eg ein prat med rektor Ole Magne Omdal på Bygland KVS. Han sat på Gardermoen og venta på Kristiansandsflyet etter å ha vore på konferanse for naturbrukskular. Det var ennå ledige plassar på skulen, og folk kunne bare søke, for dei har løpande opptak fram til skulestart. Til slutt snakka eg med Jon-Rolf Næss om samarbeid i Setesdal, basert på 1. mai talen han heldt på Evje, den som det var så stort oppslag om i Setesdølen.

Så det vart ei travel økt i kveld. Eg fekk ikkje tak i Valborg Hauan som skulle fortalt om NMS Gjenbruk på Evje, så det får vere som det vart. Etter Møteplassen frå Norea var det tid for norsk musikk med Niklos K. Besteland i Postludium. Her fekk vi høyre
1.Ludvig Mathias Lindeman (1812-1887): Fuge over B-A-C-H i frygisk toneart spelt av Magne Elvestrand på orgelet i Margaretakyrkan i Oslo
2.Johannes Haarklou (1847-1925): Fantasia triomphale, opus 36 spelt av domorganist Kåre Nordstoga på orgelet i St. Jacobs kyrka i Stockholm
3.Arild Sandvold: Toccata over «Din rikssak Jesus være skal» spelt av Andrew Canning på orgelet i Uppsala domkyrka
4.Alfred Gammelsæter (1955): Preludium nr. 1, 2 og 3, opus 18 spelt av Einar Steen Nøkleberg.

Du finn meir om programmet i kveld på http://www.setesdalswiki.no/wiki/Valle_Radio_tysdag_8._mai_2012

Styret:
Ørnulf Hasla, leiar
Britta Lise Homme, nestleiar
Helge Homme, kasserar
Jørund Georg Jore, teknisk leiar
Inga Flateland, medlem
Rolf Erik Homme, varamedlem
Anna Rysstad, varamedlem

Rekneskapsførar: Halvor Rike

Revisor: Hallvard Holum

Valnemnd: Henri Tore Viki og Ronny Stavsholt

Aktivitet
Styret har i 2011 hatt 5 styremøter.

Det har vore sendingar kvar veke på tysdag og onsdag i skuleåret, og i samarbeid med Evje Radio fyrste fredag annankvar månad + nokre ekstrasendingar, blant anna direktesendig i samband med kommunestyrevalet, sauesjå og lisle joleptdagen. Siste sending i kvar månad er som regel overføring av kommunestyremøte. I alt ca 75 sendingar.

Valle Radio si Facebookside har no 2 476 medlemer (pr 1. mai 2012).

Podcast vart bestemt igongsett 2011, men er av tekniske årsaker ikkje i orden.

Programleiarar for påskebasaren var Helge Dahle, Rolf Erik Homme og Britta Lise Homme. Basaren gav ei brutto inntekt på kr 164 050.

Det vart bestemt at det skulle byggast eit ”kaldtlager” ved innganga til radioen. Likeeins nytt studiobord med konsulenthjelp/utstyr frå Jørgen Lien.

Det vart kjøpt diverse utstyr, så som iPhone, PC, kamera.

Jolebord for medarbeidarane var på Valle Motell.

Hovedsponsor for Radioen er Valle Sparebank, med kr 25 000 kvart år.

Valle kommune held oss med lokaler og straum i Valletunet til ein verdi av kr 30 000 pr år.

Valle Radios blogg: Harald Haugland har ansvar for bloggen.

Valle Radios facebookside: Britta Lise Homme har ansvar for denne sida.

Medarbeidarar:

Programleiarar:
Bjørgulv T. Berg, Ørnulf Hasla, Harald Haugland, Britta Lise Homme, Øyvind Jacob, Ronny Stavsholt, Jorunn Lund Harstad, Rolf Erik Homme, Henri Tore Viki

Teknikarar:
Torhild Sandnes, Inga Flateland, Kåre Rike, Liv Gunn Viki, Jørund Georg Jore, Torleiv Soltun Haugen

Telefonvakter:
Torbjørg Hoftuft, Berit Homme, Bjørg Ragnhild Trydal Jansen, Gudrun Nomeland, Ingebjørg Ellinor Rysstad, Ingun Uppstad, Jorunn Lund Harstad, Jorunn Helle, Solveig Rysstad, Ingebjørg Helle Haugen, Ingunn Åkre, Anna Rysstad

Andre medarbeidarar:
Niklos K. Besteland, Torleiv B. Harstad, Håvard Viki

I tillegg kjem folk som har vore med under spesielle sendingar.

Takk
Styret vil takke alle for innsatsen i året som har gått.

Valle, 2. mai 2012

Styret

Måndag kjem statssekretær Morten Søberg (Sp) i finansdepartementet til Valle Sparebank. Eg hadde vel tenkt at Vidar Homme hadde skrive noko på sin blogg om det, han skal jo vere vert. Men når dei har vore i banken, skal dei i Valle Radio og høyre litt om samarbeidet mellom banken og radioen, banken sponsar jo Valle Radio med 25.000 kroner årleg.

At ein sparebank brukar noko av overskotet til almennyttige føremål i lokalsamfunnet, har lange tradisjonar. I ein kronikk i Sparebankbladet, som vel ikkje så mange utanom sparebankane les, skreiv han for eit snaut år sidan, i august i fjor:

August, sein kveld. Surfar; kjem inn på www.nb.no. Derifrå lastar eg ned ei lita bok frå 1898 av H.E. Berner (då bankdirektør): «Om sparsomhed og særlig om vore sparebanker.» Skriv ut, og skriv av. Spesielt side 30. Der står mellom anna dette: «Da sparebankerne ikke som aktiebankerne er beregnet paa udbytte for aktionærer, lægger de heller ikke an paa stort overskudd. Det overskud, som de giver, gaar til «almennyttige øiemed» (saasom: til kirkelige og religiøse formaal, til museer, samlinger, bibliotheker og leseværelser, skolevæsen, husflids- og haandgjerningsskoler, børneasyler, arbeiderforeninger og arbeiderhjem, syge- og understøttelsesforeninger, musikk- og kunsteriske formaal, vandledninger m.m.m.)»

Over 100 år sidan. Og vi kjenner det att frå Valle Sparebank si utdeling av gåver kvart år. No vil Finansdepartementet lære om dette, og dei har funne ut at dei kan lære noko i Valle. Svært mange av dei oppgåvene som bankane støtta tidlegare er i dag kommunale og statlege. Endringane har ikkje ført til at bankane har slutta å dele ut gåver, men føremålet med gåvene har nok endra seg noko. I dag stør banken opp om arbeidet til lag og organisasjonar, alle med sine føremål organisert i demokratiske grupper på sida av det offentlege apparatet i kvar kommune.

No ville tilfellet at Valle Radio skal ha årsmøte etter at statssekretæren har vore i Valle. Om han hadde stoppa, ville han sjå at det er ei nokså fast gruppe som står bak aktiviteten med sendingar to kveldar i veka frå september til og med mai. Men radioen formidlar nyheter og kulturell identitet på mange plan i bygda. Det er pengane frå Valle Sparebank med på å bidra til, saman med pengar vi får inn på den årlege radiobasaren. Ingen av oss får løn, dugnad har vore prinsippet frå radioen var ny.

Alle vi som jobbar i Valle Radio, nokre av oss jobbar og i Valle Sparebank, opplever banken som ein god støttespelar i lokalsamfunnet. Nettopp fordi han har blitt ståande som ein sjølvstendig lokal bank, er det vår bygd som nyt godt av tilskot til lag og organisasjonar. Truleg opplever også næringslivet det slik, banken kjenner tilhøva og tek ansvar i lokalsamfunnet vårt når noko skal finansierast så sant banken har høve til det. Slik vil vi ha det også i nye hundre år.

I dag var eg innom Spisekroken på Evje. Dei har bakverk frå Moseid i Vennesla, det er kjent for å vere særs godt, sa Heidi Ose, som opna butikken for tre veker sidan. Å få eit bakeri til å gå på Evje har vore vanskeleg tidlegare, men det har vore godt sal dei fyrste vekene, kunne ho fortelje. I dag hadde det vore så mange kundar innom at køen stod heilt til inngangsdøra i periodar og den stunda eg sat der, var det eit jamnt sig av folk som ville ha bakverk eller brød til helga.

Eg stoppa første gongen der sist fredag på tur ned frå Setesdalskonferanen. Då hadde eg vore på Bykle Hotell og høyrt Richard Jacobsen snakke om sal, korleis den som sel skal oppfylle kunden sine behov, og nettopp det var det Heidi Ose gjorde denne seine fredagsettermiddagen, dei har jo ope til klokka 18 på fredagane på Evje. Eg fekk med meg brownies og jojo-kake heim, så vi hadde noko til fredagskaffe og laurdagskaffe. Snadder.

I dag var eg noko tidlegare, så det var Napoleonskake i disken. Då var det ingen grunn til å sjå etter andre variantar til fredagskosen. Raskt og triveleg pakka ho kakene i eske og la i ein pose. Eg valde å få meg ein kopp kaffe og ei skive i same slengen, og så sette eg meg ned for å prate litt. Ho rakk det og i den noko rolegare ettermiddagsstunda.

Etter det eg skjøna av ein annan kunde, burde eg nok og ha fått meg ein eplemuffins eller to, dei var spesielt gode, sa han og sette til livs nr. 2.

Det ligg alt artikkel på Setesdalswiki om Spisekroken, http://www.setesdalswiki.no/wiki/Spisekroken og snart kjem det artikke om Heidi Ose også.

I dag fekk eg ein artikkel om Langeloni på Setesdalswiki. Langeloni er eit vatn i Langeidsheii, 32 km frå Langeid i Setesdal Vesthei – Ryfylkeheiane landskapsvernområde. Der har ein ikkje lov å byggje hytter, men i 2004 vart det sett opp ei jakthytte på 30 kvadratmeter langt der vest i heia, like ved vatnet, på austsida. Grensa mellom Setesdal og Sirdal går i Langeloni.

Grunnen til at eg fekk ein artikkel, var at eg kom til å sjå eit bilete som Knut William Bygland la ut på Facebook av hytta der inne. Det var teke då dei heldt på å reise hytta, og så spurte eg om eg kunne bruke det på Setesdalswiki. Det syntest han var morosamt, så han fann like godt eit bilete av vatnet og, så no ligg det to bilete i artikkelen. På internett klarte eg å finne koordinatar for å legge inn eit kart, så no kan ein sjå på kartet kor hytta ligg.

Det er etablert to grupper på Facebook der ein legg ut bilete frå gamle dagar, det vil seie frå forrige hundreår. Nokre av desse bileta kunne godt høve til artiklar på Setesdalswiki, det har eg tenkt lenge, og i dette tilfellet lukkast det. Eg kunne gjerne sett at fleire artiklar kom til på den måten. Dette skjedde etter klokka tolv i natt, men det kan like godt skje på lyse dagen.

No stundar det mot kvelden att, i morgon er det skuledag, så eg trur nok det er på tide å dra oppover dalen og gjere klar for ei kort jobbveke etter ei lang sjukemelding. I morgon kveld skal Bjørgulv T. Berg ha sending i Valle Radio, programmet kjem vel i Setesdølen i morgon tenkjer eg.

Her er lenke til artikkelen på Setesdalswiki: http://www.setesdalswiki.no/wiki/Langeloni