Programmet onsdagskvelden vart ganske så triveleg. Det var Ronny som hadde ansvaret, og han hadde ingen gjester den første timen. Men han hadde eit tema, og det var sosiale nettstader, og han snakka om Facebook, Skype og msn.

Eg pleier å høyre litt av Herreavdelingen på tysdagskveldane når eg har køyrt Niklos heim etter sendinga. Det startar etter Dagsnytt klokka 22, og nokre gonger har eg fått med meg at dei har ein konkurranse om kor mange nye medlemmer gruppa på Facebook kan få i løpet av sendinga. Så dermed tenkte eg at eg skulle utfordre Ronny til å lage ei gruppe på Facebook som heiter Valle Radio, og eg lova at om gruppa fekk 10 medlemmer i løpet av kvelden, skulle eg og melde meg inn.

Det gjekk med meg som det går med Finn Bjelke, han lova å ete hatten sin om dei fekk 300 medlemmer i løpet av sendinga, og det gjorde dei. Ein gamal hatt smakar sikkert ikkje godt. Men eg hadde ikkje tenkt å bli medlem på Facebook, det har vore nok med wikipedia for meg til no.

Men eg må vel gje meg no, og bli medlem der eg og. http://www.facebook.com Men eg utset det til i morgon. Då vi slutta i kveld, var det 21 medlemmer i Valle Radio-gruppa, og fleire vert det nok.

Så var vinterferien over, den enda med tungt snøfall i Øvre Setesdal og mykje regn i Mandal. Då vi stod opp i dag, undra vi oss over at bekken var full av vatn, og då vi gjekk gjennom hagen, surkla det godt, ein isboks som sto ute var full av vatn, så det må ha kome mykje nedbør siste natta. Ein telefon frå Niklos kunne stadfeste at det var snø i Valle, 30 cm målte han på Besteland då han starta måkinga i dag tidleg. Etter mi meining er det betre å få det i flytande form, då renn det vekk etter kvart. Snøen gjer jo og det, men det tek lenger tid.

Eg kom over ein artikkel i Setesdølen for ei veke sidan, der stod det at -Salt er best på maten. Det var ei spissformulering frå ein som ikkje likte salta veger. Men sjølv om det går hardt ut over bremseskiver, eg måtte bytte dei då eg hadde bilen på service denne veka, er det bra med svart veg, så eg klagar ikkje. I høve til situasjonen i Oslo er det truleg heller ikkje så mykje å klage over, der har snøryddinga vore eit stort problem i vinter.

Men her i Mandal blømer snøklokkene og påskeliljene spirer, det er bare fire veker, så er påska her og vinteren ligg bak oss. Vi får glede oss over det vi kan og starte på ny frisk.

No er korsong i vinden att. Eg fekk med meg litt av Det store korslaget på TV2 i kveld og trur nok at eg kjem til å sjå fleire av programma frametter våren, for det var god underhaldning og vakker song. Eg likte best Team Elg, så om eg skulle stemt, ville eg nok gjeve ein stemme til Kristiansundarane, dei hadde tydelegevis disiplinert ropinga si over sundet i heimbyen, no var det eit harmonisk kor.

Det kan ikkje vere lett å ha så mykje rørsle medan ein syng som det desse kora hadde. Eg er van med å stå ganske så stille når eg syng i kor, må få min stemme til å klinge i harmoni med naboen sin. Men her dansa dei opp og ned og såg ut til å vere ganske så fristilte frå naboen, og likevel var det harmonisk og vakkert. Om dette vinn fram, vert nok korsong noko anna i framtida enn det har vore.

Sjølv begynte eg i Sandnes Menighetskor tidleg på 1960-talet, det må ha vore i 1962, og heldt ut til om lag den tida då eg tok eksamen artium i 1966. Sidan var eg med i kor og delvis dirigerte koret vårt på Hadsel Folkehøyskole medan eg var rektor der. I Valle var eg med i Valle og Hylestad kyrkjekor ganske lenge, men etter at vi flytta til Mandal og eg difor reiser dit i helgene, har eg ikkje sunge særleg i kor. Men eg var med på eit korseminar med Per Oddvar Hildre for nokre år sidan, og det var gjevande. Eg reknar med at Syngjandi hadde glede av å vere med på eit liknande seminar i vinter.

Det var jo greitt at ingen vart stemde ut i kveld, så får vi sjå alle saman neste laurdag, og det ser eg fram til. Men eg likar nok betre klassisk kormusikk enn det vi fekk sjå i kveld.

I dag fekk eg epost frå Britta Lise, som fylgde sendinga i Valle Radio onsdagskvelden. Eg let henne fortelje:

Fin sending på radioen igår, men startproblem gjorde til at dei fekk ikkje kome igang før 18.45. (Eg
skriv difor ikkje tidspunkt på programma sia tidspunkt på alle vart forskyva)

-Øyvind ringa opp Jan Wojtazek ,som tala om sikkerheit i alpinbakkar o.l.
-Ingebjørg S.Austenå var i studio og fortalte om temakvelden Valle helselag skal ha om hjarteinfarkt.
Sjå meir om dette i Bygdenytt for mars,som ligg på nettsida til kommunen.

-Elise Marie Kringen kom for kommunen og gav god informasjon om aktuelle saker frå kommunen

-Bjørgulv T.Berg kom og hadde andakt (om den bortkomne sonen)

– Øyvind spila Beatlesmusikk i fleire variantar og tala litt om vinterferie,sikkerheit og rasfare.
Akkurat då han tala om dette så kom det inn melding frå Geir Ola Nomeland, om at det hadde vore ras på Ljom. Heldigvis ingen involvera.

Øyvind ringa også opp Liv Bakke Kvinlog, som fortalde utdjupande om planane med å revitalisere Setesdalslaget i Oslo, Ein idè Sigrid B.Berg hadde teke tak i,og fekk med seg fleire på. Sigurd Helle, tidlegare formann, hadde vorte svært glad dersom laget kjem igong att. Men mykje tyda på det motsatte i 2005,så dei hadde alt gjeve fanen til bygdemuseet. Ei fane dei bruka i 17 mai toget og som visstnok vart laga i 60 åra. Denne hadde jentene planar om å prøve å få tilbake.

Vi får håpe og tru på det,for som ho sa så hadde dei fleste ungdomane Setesdalsbunad, og hadde difor vore fint om dei fekk innpass i 17 mai toget opp Karl Johan.

-Så kom Ronny til Opi sending. Dei han skulle hatt med seg i studio var blitt sjuke, så han vart åleine. Men det skulle ein ikkje tru, for liv vart det !! 🙂

Dessutan har han sagt at han ikkje er god til å lage rebusar, no blir det ei påstand eg ikkje kjem til å tru på lenger 🙂 Mange hyttefolk som ringa inn,så det vart mest ei slags påskestemning i radioen.
Kruset gjekk til Kaja Sannes og Rosa til Elin Uppstad , som gav den til læraren sin Marianne Solbakk.

Marcel Tidje skulle lærast opp som teknikar ihop med Torleiv Soltun, men han hoppa rett i det, og styrte spakene på imponerande vis heile kvelden. Veit ikkje kven som var tlf.vakter denne kvelden.
Sjølv var eg på jobb,så dersom eg ikkje har fått med alt her, er det av den grunn. Men nok ein morosam og koseleg kveld frå Valle Radioen vart det.

Ha ein fortsatt god vinterferie og velkomen oppatt til oss!
blise:)

Denne songen av Sondre Bratland er populær i Valle Radio, både når han syng den og når Anne Karin Kaasa syng den. I kveld song eg den på Mandal Sykehjem, dei har sangkveld der fyrste onsdag i kvar månad. Ettersom det er vinterferie no, hadde eg høve til å vere med.

Ein stad mellom femti og hundre godt vaksne folk var møtt fram då det heile starta klokka halv sju. Ei forsangargruppe på fem, ein dugande pianist og så ein gjeng med triveleeg folk som sytte for kaffe og vaflar, det var alt som skulle til. Sjølvsagt gjer det seg bra med litt sangstemme, men det var fleire der som bare likte å høyre på utan sjølv å syngje. For meg som likar å syngje, var det ein ekstra triveleg kveld.

Songane vi song hadde ein dåm av vår, for snøen er borte i Mandal no. Snøklokkene har begynt å kome fram, så No livnar det i lundar passa godt. Men forsongargruppa hadde funne fram ei rekke kjende og meir ukjende songar, og vi song av hjartans lyst. Midt i heile arrangementet var det ein pause med høve til å smørje stemmebånda med kaffe og vaflar med syltetøy, og så var det ei ny økt. Ei opplesing var det og, det var frå ei av Thorbjørn Egners lesebøker, stykket om Losen går ut, som har handling frå Mandal. Godt lese og spanande fortalt. http://no.wikipedia.org/wiki/Thorbj%C3%B8rn_Egner

Vi burde syngje meir.

Etter mine notatar skal Øyvind Jacob ha ansvar for sendinga i morgon. Diverre var det ikkje noko i Setesdølen i dag om det, men eg vonar han har programmet klart til sendinga i morgon.

Fredag er det fyrste fredag i mars, og då skal Evje Radio sende til heile dalen. Det ser ut til at det vert ei temasending med sykkelrittet frå Kristiansand til Hovden som rød tråd, og i dagens avis stod det at det var ein premie på ein sykkel til 7000 kroner. Truleg vert det telefonstorm til telefonvaktene i Evje Radio denne kvelden. Jan Olsen er ein utprega radiomann som burde vore meir på lufta. No er han attende frå Cuba, så det vert moro å høyre han fortelje seinare i vår.

Lukke til, både telefonvakter og programleiarar.

Då eg i dag kom på PC-en min for å skrive epost til Setesdølen om at det ikkje er tysdagssending denne veka, var det ikkje forbindelse til Internett, same kva eg prøvde på. Først klokka 16 kom den attende, så det må ha vore noko som ikkje var rett i ein sentral ein stad.

Kva skal ein så gjere? Det var ikkje ver som frista til å gå ut, så eg fann fram boka som eg lånte på biblioteket i Valle og sette meg til å lese. Bjørg Øygarden heiter forfatteren, http://no.wikipedia.org/wiki/Bj%C3%B8rg_%C3%98ygarden Ho har skrive ein kriminalroman som heiter Siste time. Hennar siste bok er nominert til Sørlandets litteraturpris. Den heiter Askelandden og de nye hjelperne og er ei barnebok med ein ny vri på eventyra om Askeladden og dei gode hjelparane OG prinsessa på glassberget. Den las eg før vinterferien, og eg trur eg vil stemme på den til Særlandets litteraturpris.

Heldigvis kom forbindelsen til Internett attende, så kunne eg få skrive på bloggen i kveld. Og sanneleg klarte eg å løfte eit par stubbar også. Men når det er 17000 å ta av, blir det som ein dråpe i havet. Men litt kvar dag, så blir det mange til slutt.