I kveld var eg i Mandal kirke på konserten Religiøse folketoner fra Sørlandet. Komponisten Sigvald Tveit var saman med Håkon Sødal, Kristina Jølsta Moi og Kjell Åge Stoveland og gav 100 tilhøyrarar ein nydeleg kveld.

Dei starta med folketonen frå Åseral: Mitt eneste håp, sidan kom fleire melodiar frå Setesdal: Den sjel sin Gud i sannhet kjenner, Vær trøstig, mitt hjerte og Den bortkomne sauen. Sødal, som bandt saman programmet, meinte at Åseral-tonen til Lær meg å kjenne dine veie var den mest kjente religiøse folketonen frå Agder. Det er ikkje sikkert eg er enig med han i det, men det gjer ikkje noko, den var fellessang i konserten.

Så kom Bud fra Herren som Bjarne Sløgedal har på plata si med religiøse folketonar frå Agder. Deretter kom Vær stille min sjel, ein melodi frå Marnardal og Jeg har et hjem, melodi frå Finsland. Dei hadde til og med funne eit par melodiar frå Lista og Flekkefjord, så etter Se ei på meg frå Fjotland kom Nu rinner solen opp frå Lista og Der ginge to til Emmaus. Denne hadde tekst av Petter Dass og var på heile 28 vers, vi fekk vel om lag halvparten, trur eg, før denne avdelinga vart avslutta med O du min Immanuel.

Ettersom det er Maria Budskapsdag denne helga, hadde dei teke med tre jolesongar. I denne søte joletid med melodi frå Setesdal var jo kjent. Mindre kjent var melodien vi fekk høyre til Et barn er født i Betlehem. Som fellessang hadde vi så No koma Guds englar, som anten er skotsk eller frå Vest-Agder. Den har aldri vore nytta i Mandal dei 25 åra Tormod Lindland har vore organist.

Konserten vart avslutta med bånsullar og kveldssalmer. Se solens skjønne lys og prakt med melodi frå Setesdal, Nu hviler mark og enge frå Fjotland og Tenk på meg når dagen heller til melodi frå Laudal eller Finsland.

Det var ei god oppleving å få med seg denne konserten. Kan hende kunne den vere noko for kulturveka til hausten.

Det vert årsmøte i Valle Radio måndag 30. mars klokka 19:30 på Valle Motell. Dermed får vi avvikle årsmøtet før påskesendinga i år. Det trur eg vil vere bra, og det er jo bra at vi ikkje har det så seint som det har vore før om åra.

Eg stiller ikkje til attval som leiar i styret, det har eg meldt til valnemnda, så dei må finne ein ny styreleiar. Etter protokollen frå i fjor er det Ørnulf og Inga som er på val i styret + varamedlemmene Britta Lise og Anna. http://valleradio.blogs.no/2008/06/12/attval-over-heile-fjaoslash-la-4308669/

Nå går førebuingane til påskesendingane for fullt. Helge Dahle tek ansvar for dei i år og. Det er vi svært glade for, han har klart å få det til å passe med turnusen sin slik at han er heime i påska.

I dag var det ein interessant artikkel i Fædrelandsvennen. Den fortel at det er 300.000 bloggarar i Norge ved utgangen av 2008. På tre år er talet tidobla frå 30.000 i 2005. Dei fleste som skriv er kvinner, 65%, fortel Thomas Moen frå Kristiansand, som er gründar bak bloggeplattforma Ipublish.

Moen meiner folk har eksponeringsbehov, dei ynskjer å bli kjende og å få ansiktet sitt fram. Mange av dei som skriv, lagar rosa bloggar der dei skriv om mote, livet og kjærleiken, av og til og om kor teit kjærasten er. Men i tillegg til dette har vi fått temabloggar og politiske bloggar. I det siste har det og dukka opp næringslivsbloggar. http://no.wikipedia.org/wiki/Blogg

Øystein Sæbø, som er førsteamanuensis i informasjonssystemer ved Universitetet i Agder meiner at blogginga har modna med åra. Til å begynne med var det ein hobby for teknofrikar, men nok kan alle bruke dette. Difor har vi fått ein stor variasjon, både skuleungdom og stortingspolitikarar. Difor ser ein at heimesida taper, folk vil ha oppdatert informasjon, ikkje ei statisk heimeside som sist var oppdatert for eit år sidan. Han meiner difor at personlege heimesider ikkje lenger er noko å satse på. No er det sosiale medier det gjeld, der ein kan kommunisere på eit høgare nivå ved at folk kan svare på eit blogginnlegg.

Sæbø åtvarar folk og seier at med det same noko er publisert på ein blogg, har ein ikkje herredøme over det lenger. Difor er det lurt å ikkje vere privat når ein skriv ein blogg, både bilete og tekst kan finnast att om tre år når du søker ny jobb, og om du har lagt ut noko som arbeidsgjevaren ikkje likar, kan det hende du ikkje får jobben.

I avisa er det intervjua ein personleg bloggar, Cecilie Møskeland, og ein politisk bloggar, Line Vennesland. Dei har ulikt utgangspunkt for blogginga, sjølv om begge studerer til å verte sosionom ved UiA. Den fyrste likar å skrive og skriv kvar dag på bloggen, den andre brukar bloggen som ein del av valkampen, ho er andrekandidat på Ap si liste i Aust-Agder.

Valle Radio sin blogg er tekstbasert. Det er bare eit bilete der, av han som skriv, ja og så kan folk leggje seg til som vener. Ulikt Facebook har eg bare ein ven på denne bloggen, men der har eg vel snart 20 vener. Det er og for det meste ein temablogg, relatert til Valle Radio. Det eg skriv her i dag kan du høyre i sendinga i kveld klokka 18, det er manuskript til kåseriet eg skal halde då. Artikkelen i Fædrelandsvennen er ikkje publisert på nett enno, så den må du bla fram til side 18 for å lese. Men her er lenka til heimesida hans på UiA: http://home.hia.no/~oysteisa/

I går var det eit artig innslag i Fædrelandsvennen. Advokat og lokallagsleiar for Fremskrittspartiet i Farsund, Andreas Bjørn (Boa) Salvesen, vil kjøpe sauer til det planlagde sauehotellet i Valle. Dette kunne eg lese på side 7 i gårsdagens avis.

Boa seier at han meiner at kapital frå byen må til for å få prosjektet på føtene. Og prosjektet er viktig for at kulturlandskapet skal haldast ved like, seier han til Johs. Bjørkeli i Fædrelandsvennen. Han vil ikkje ut med kor mykje pengar han eventuelt ville skyte inn i sauehotellet, men han er klar på at målsettinga ikkje er å tene pengar. Han vil bidra til samrøre mellom bykapital og landbruk.

Eg hadde kanskje trudd at det hadde vore vår tidlegare hyrding i Valle prestegjeld, lillebror til Boa, Theis Salvesen, som ville kjøpt seg inn i sauehotellet. Då hadde han fått halde fram som pastor hos oss. Kan hende hadde det blitt nokre program i Valle Radio også. Og sjølv om han truleg hadde spelt musikk som er noko for sterk for øyro mine, hadde eg likt det. Dei gode programma Theis laga i Valle Radio, dei saknar eg.

Eg visste ikkje at eg hadde så mange vener. Utan at eg har vore aktiv på Facebook har 14 vener vore og lagt meg til ven der. Men eg har jo eit problem, for «social networking» er ikkje lov i Valle, og eg har ikkje privat datamaskin, eg nyttar maskin på arbeidsplassen.

Dermed kan eg risikere at eg ikkje kjem inn i det gode selskap før eg kjem attende til Mandal. Men det slår meg at det er få som er jamnaldringar. Eg må jo likevel hylle Ånund K. Han var vel nesten den fyrste venen eg fekk, bare Margunn som slo han.

Så no har eg 15 vener, dei aller fleste under 35. Det var meir enn eg visste.

Og meir skal det bli. Eg har invitert Ronny til å vere med i Open sending onsdag. Då skal vi finne ut meir om dette fenomenet. Du som les bloggen, eg vonar at du høyrer på oss den kvelden. Kan hende vankar det premie og.

Når ein held på på internett, oppdagar ein fort at det er mykje ein ikkje veit, eller rettare sagt visste før ein fann informasjon i den store informasjonskjelda som internett er. Eg rotar og leitar rundt og set saman små puslespelbitar, og plutseleg er det ein artikkel på wikipedia om eit eller anna emne. Eg likar å pusle slik.

I grunnen er det eit puslespel å setje saman eit radioprogram også. Det må eg pusle meir med denne veka, ettersom eg skal ha ansvar for sendingane både tirsdag og onsdag.

Det stuntet vi gjorde i går var interessant. No er det over 90 medlemmer i gruppa Valle Radio på Facebook. I løpet av dagen har det strøymt på med folk som vil vere med i gruppa. Nokre av dei har vore i studio eller hatt ulike rollar elles, men dei fleste har ikkje vore aktive medarbeidarar.

Fleire av dei som var i radioen eller på telefon i går kveld har no meldt seg inn, men eg glimrar med mitt fråvær, for eg har ikkje privat PC i Valle og Valle kommune har blokkert Facebook, så eg får vente til eg kjem til Mandal med å melde meg inn.

Eg har jo lurt litt på kva ein skal bruke gruppa på Facebook til. Det er kanskje eg som er litt utanfor her, kanskje slike grupper ikkje brukast til noko. Det vil eg gjerne få meir informasjon om frå dykk som er medlemmer i andre grupper, til dømes Herreavdelingen, som jo og er relatert til radio.

Eg tenkjer at det kunne vere greitt med lenke til heimeside og internettradioen, slik at ein kunne nå dei frå gruppa. Bloggen kunne vel og få lenke. Men det er jo nokså passivt. Er det noko ein kan nytte Facebook til i samband med påskesendingane, det er jo mindre enn ein månad til dei skal på lufta.

Slik sit eg og funderer og vonar at nokon vil sende meg eit svar. Skriv gjerne ein kommentar her på bloggen, eller til harhaugl (at) gmail.com om du har idear.

Ronnys kveld
I tillegg til å snakke om Internett, hadde Ronny David Tharaldsen med seg i Kommunen informerer. Dei snakka mellom anna og om oppstart av kommunedelplanarbeid for området Uppstad til Bygland grense.

I timen mellom 20 og 21 hadde han først besøk av Tone Silje Rysstad som fortalde om korleis det er å vere hestegal og etablere sin eigen stall. Deretter kom Torleif Homme i studio og fortalde om to brannutrykningar, ein til bustadhus på Nomeland i Valle og ein til hytte på heia i Brokke, det var pipebrann. Då måtte dei bruke snøscooter for å kome inn til staden der det brann. I samband med dette snakka dei om tryggleik, og Ronny hadde ein hugseregel for å bytte batteri i brannalarmen, det gjorde han på bursdagen sin.

Og Sirdal dominerte den opne sendinga.