I dag vil eg skrive om noko som eg har tenkt på, men som eg ikkje har teke opp i radioen til no. Det gjeld utlendingar og førarkort. Svært mange av dei kan kjøre eitt år på sitt gamle førarkort når dei kjem til Noreg. Men så må dei få nytt sertifikat.

I samband med dette ser det for meg ut til at svært mange av dei som kjem frå land utanom EU må starte på same nivå som norske 16-åringar: Grunnkurs på 12 timar før dei kan begynne på kjøreskolen. Pris mellom to og tre tusen kroner. For folk som bur i Valle vil det ofte vere slik at dei må reise til Evje. Der er det kurs frå klokka 16 til 19 fire kveldar.

Det medfører at ein må reise frå Valle klokka 08.30. Så må vedkomande vandre frå butikk til butikk eller kafe frå klokka ti til klokka fire, då startar kurset. Men når det er slutt, er bussen opp att gått, så det vert å bu på Dølen hotell til neste morgon, og så ta bussen som er i Valle klokka 11.30. Det vil seie at dei må bruke 27 timar på eit tretimars kurs. Kva prisen for mat, buss og hotell er, vil eg ikkje spekulere i. Det må dei gjere fire gonger for å ta kurset. Omkostningane rundt kurset vert då større enn kostnaden for heile kurset.

Min konklusjon er at dette er urimeleg. Men slik er stoda om du ikkje har eit nettverk av vener som vil bruke ein del av dagen sin på ein tur til Evje og vente i tre timar på å kjøre deg heim att. Ikkje mykje å gjere på Evje tre timar ein slik dag.

Når den det gjeld har hatt sertifikat i heimlandet og truleg kjørt i mykje større trafikk i mange år, då verkar det noko firkanta at ein må starte med same kurset som ein norsk 16-åring, som, om han har snike seg til ulovleg køyring med pappa, på ingen måte har same trafikk-kompetansen som ein med sertifikat frå heimlandet og erfaring frå bilkøyring der.

Etter mi meining burde ein køyrelærar kunne ta imot slike elevar på direkten, han vil fort finne ut om dei har bløffa seg til sertifikatet dei hadde i heimlandet.

Meiner du at det eg fortel om er eit konstruert tilfelle. Det er ikkje det, folk som bur i Valle no har opplevd at slik er det.

Det er bare slik, det er etter mi meining ei noko lettvint forklaring vi har andsynes vituge folk som ikkje lenger har kunna bu i heimlandet, og som så har funne asyl i dalen vår.

Prosjektet mitt veks. Kva for eit prosjekt? spør du. Prosjektet med å skrive om Valle på Wikipedia. Wikipedia på bokmål runda 100.000 artiklar sist laurdag. I kveld er det 1588 fleire, så leksikonet veks kvar dag med mellom 150 og 200 artiklar. 57 av dei er om Valle. Stoff som er relatert til Valle kan vere knytt til folkemusikk, geografi, litteratur og politikk. Denne veka har det kome til fire artiklar, mellom anna om Gunnar T. Rysstad og Birgit Rike Lund. Ikkje like lett å få det til å vekse på nynorsk. Der har det ikkje auka noko i kategorien Valle.

Talet på besøk på bloggen har ikkje vakse no, tvert om har talet gått ned i februar med 80 besøkjarar. No var det jo ikkje så mange dagar, så ein får trøyste seg med at det sikkert stig att i mars, som har fleire dagar. Du som vil abonnere på bloggen kan skrive epostadressa di til høgre for teksten her, så får du tilsendt melding når han vert oppdatert. Ha ein fin sundag.

Så har mars starta, midt i vinterferien. Før vinterferien starta, fekk vi jo meir ver i media enn i Valle, for å seie det slik, avisene på kysten har vore fulle av stoff om snø og brøyting det meste av tida. Radio og TV frå Sørlandet har fulgt opp. Balansen i dekkinga av regionen hadde nok vore noko betre om distriktskontoret til NRK hadde vore på Evje og ikkje på Tangen i Kristiansand.

I alle fall vil de som les bloggen min vite at dei som hadde vald å køyre om Evje, ikkje hadde problem å kome seg fram i høve til dei som køyrde E-18. Truleg bør Fædrelandsvennen flytte frå Kristiansand til Evje når Agder blir eitt fylke, slik at dei kan ha rett perspektiv på landsdelen og ikkje bare tenkje på sol, sommer, Sørland og tean i tanga. I alle fall verkar det ikkje som om nokon har tenkt den tanken at indre veg mellom Arendal og Kristiansand er eit betre val enn å stå ei heil natt på hovudvegen. Sjølv om det tek litt lenger å køyre, så er det betre å kome fram enn å bli ståande mellom vogntoga utan å kome fram.

For meg som har har hatt vinterferien i Mandal har det og vore nok snø. Eg trur mest ikkje er har sett så mykje snø her sidan 1970, men då var det meir, og han låg lenger. Med mars månad og ei høgare sol vil det nok ikkje gå så lenge før han renn bort att.

I vinterferieveka hadde eg ikkje tysdagssending. Onsdagssendinga var kommunestyremøte, og i serien første fredag i kvar månad var det Evje sin tur. Difor kunne tankane våre handle om andre ting i denne vinterferieveka. Det har vore godt, men no er det klart for ein ny innsats til beste for Valle radio. Snart er vi i normal gjenge att, og godt er det.