Bjørnarådalen
Bjørnarådalen er eit dalføre ved Bjørnarå i Bykle. Dalen strekkjer seg først i nord-austleg retning, i Bykle. Seinare svingar han meir rett austover, og kjem inn i Valle. I dalbotnen renn Vasstøylsåni (Bjørnarååni). På nordsida av dalen ligg det svære Nasefjell. Det går skogsbilveg (bomveg) innover i dalføret frå Riksveg 9 ved Bjørnarå.
Historie
Tradisjonen fortel at det i eldre tider var gardar og fastbuande i Bjørnarådalen. Såleis var det ganske visst folk som budde på Gryggjetveit før Svartedauden. Andre gardar kunne vere Voglumtveit, Øybø og Vasstøyl med fleire. Seinare blei desse stadane nytta som støylar for Rygnestad og Flateland, og etter det igjen til slåttemark og til sist bare sauebeite.
Lenger vest i dalen låg støylane til Bjørnarå, som Listøyl, Røyrtveit og Hagjen.
I nærleiken av Gryggjetveit finst det haugar i terrenget som kan minne om gravhaugar. Dei er ikkje nærare undersøkte. Kanskje var det ein graplass her, for dei som budde i Bjørnarådalen i gamal tid?
Kjelder
- Olav O. Holen, Bjørnarådalen, artikkel i Jol i Setesdal 2018, side 50-52
- Alfred Ryningen, Valle kommune VI Gards- og ættesoge Valle, utgjeve av Valle kommune, 1987, side 159
- Kulturminnesok.no