Nørdre Rygnestad

Rygnestad med det opphavelege Nordigard, i dag Setesdalsmuseet, i framgrunnen.

Foto: Geir Daasvatn

Nørdre Rygnestad er ein gard (gnr. 23) på Rygnestad, på austsida av Otra, nord i Valle. Bruka og teigane til Nørdre Rygnestad og nabogarden Syndre Rygnestad ligg noko om einannan, slik at skiljet mellom dei i matrikkelen er noko kunstig, skriv Alfred Ryningen i gards- og ættesoga for Valle.

Heimar og bruk i Nørdre Rygnestad

• Nordigard Rygnestad
• Systog Rygnestad
• Rygnestadtunet
• Åreholti

Historie

Ein reknar med at det var folk på Rygnestad iallefall frå vikingtida. Kanskje blei Rygnestad delt i to bruk, Nørdre og Syndre Rygnestad, rundt 1500. Den første namngjevne bonden på Nørdre Rygnestad er Torleiv Kjetilsson Rygnestad. Han var far til Åsmund Torleivsson Rygnestad, i folketalen mykje kjend som «Vonde-Åsmund». Nørdre Rygnestad ser ut til å ha vore einbølt til minst 1594. I 1611, etter at Åsmund Torleivsson var død, blei garden delt mellom enka Jorunn Eivindsdotter og sonen Torleiv. Den største delen blei delt igjen i 1640, og blei til Nordigard og Systog. Nordigard er det gardsbruket Vonde-Åsmund budde på, og der det gamle gardstunet seinare er blitt til det vidkjende Rygnestadtunet. Frå 1640 var det dermed tre bruk i Nørdre Rygnestad. Frå ca 1841 blei den andre delen av garden også delt opp i fleire mindre bruk og eigedomar. I 1981 var det 49 bruksnummer i garden.

Kjelder

• Alfred Ryningen, Valle kommune VI Gards og ættesoge Valle, utgjeve av Valle kommune, side 337 flg.