Munnharpa Valle
Munnharpa Valle står i rundkøyringa på Riksveg 9 i Valle sentrum. Ho blei flytta hit hausten 2023. Tidlegare stod ho mellom Riksveg 9 og skuleområdet rett sør for Valle sentrum.
Munnharpa skal vere verdas største, med plass i Guiness Rekordbok. Harpa er 50 gonger større enn ei vanleg munnharpe. Vekta er 350 kg, lengda 3,40 m og breidda 1,35 m. Ho er laga av 5 mm tjukke plater av rustfritt stål. Meisteren bak monumentet er Bjørgulv Bjørgum. Ei av harpene til Bjørgulv Straume var modell.
Ideen til munnharpa kom frå Sidsel Bangtvedt. Då Valle vidaregåande skule skulle få musikkline på 1990-talet var det dugnad mellom anna for å få ei flott brosjyre til å fange potensielle elevar si interesse. Då kom Sidsel med denne munnharpa på skrå som symbol for skulen. Ho vart også logo for skulen og seinare 1000-årsmerke for kommunen i år 2000.
Kjelder
- Reidar Tveito, Riksveg 9 - Bruer og særtrekk langs vegen, Byglandsfjord, 2014, side 175
- Leonhard Jansen, opplysningar gitt på Facebooksida til Setesdalswiki 1. november 2023