Kjelleberg

Valle sentrum med noko av Kjelleberg 16. juli 2018.

Foto: Geir Daasvatn

Kjelleberg er ein gard (gnr. 40) i Valle like vest for Valle kyrkje. Garden har tre bruk. Valle Motell ligg på Kjelleberg.

Historie

Garden ligg sentralt i Valle og er heilt sikkert gamal. Men han er snaut av same alder som gardane litt lenger sør i bygda.

Kjelleberg hadde støylen Bølet i Finndalen saman med Sagneskar. Garden hadde også støyl ved Neiretjønn. I tillegg var det støylar på Midtfjøddi og i Stavedalen. Det var vanleg å reise opp til Neiretjønn tre dagar etter jonsok. Her blei dei verande i tre veker. Så var dei fire veker på Bølet. Rundt 15. august flytta dei heim frå heia. 1960 var det siste året det var støylsdrift ved Neiretjønn.

Kvernhus hadde garden i Vikebekk.

Stadnamn på Kjelleberg

I hovudoppgåva Nokre stadnamn frå Valle i Setesdal nemner Dreng Uppstad seks stadnamn frå innmarka og to frå utmarka.

Innmark

• Fossåkeren
• Friggshola
• Frubærhaugen
• Linekre
• Tjørehaugen
• Skeidfloti

Utmark

• Munkehaug
• Valedokk

Litteratur

• Alfred Ryningen, Valle kommune IV Gards- og ættesoge Valle, utgjeve av Valle kommune, 1987, side 516-572