Ulla-Førre
Ulla-Førre-reguleringa ligg i kommunane Suldal, Hjelmeland og Bykle i fylka Rogaland og Agder. Konsesjon for utbygginga blei gitt ved Kongeleg resolusjon av 13. september 1974. I reguleringa inngår fire kraftstasjonar som samla produserer 4 900 GWh i eit normalår, eller om lag årsforbruket til 250.000 bustadar. Stor magasinkapasitet i Blåsjø, pumpe-moglegheit og store produksjonsanlegg med robuste installasjonar gjer at Ulla-Førre-anlegga har høg fleksibilitet i produksjonen og kan levere kraft når samfunnet treng ho mest.
Eigar av anlegga er Statkraft Energi AS. Selskapet er fullt eigd av den norske stat, og er konsesjonær for anlegga, er eigar av fallrettane og ansvarleg for drift og vedlikehald. Lyse Produksjon, Agder Energi, SKL og Skagerak Kraft er medeigarar i Ulla-Førre og har uttaksrett på produksjonen.
Meir om utbygginga
I Ulla-Førre-reguleringa inngår seks kraftverk/pumpeverk, 28 magasin og om lag 85 km med overføringstunnelar med eit 40-tal inntak. Det er det største vasskraftanlegget i Noreg og Nord-Europa, med samla installert effekt på ca. 2 100 MW. Årleg produksjon er i snitt 4,9 TWh (2000–2019), og dei tre hovudkraftverka utgjer om lag 7,5 % av den totale produksjonskapasiteten i Noreg. Målt i energiinnhald er Blåsjø Nord-Europas største magasin og gjev tryggleik for forsyning med energi. Blåsjø kan aleine lagre 6 % av norsk kraftbehov i eit middelår.
Kjelder
- Statkraft Energi, Vilkårsrevisjon Ulla-Førre – Revisjonsdokument, dagsett juni 2021