Rune Hodne Transport og Graving

Det nye sorteringsanlegget for industriavfall under bygging 21. januar 2017.

Foto: Geir Daasvatn

Rune Hodne Transport og Graving er ei transport- og anleggsverksemd med hovudkvarter i Infanterivegen på Evjemoen i Evje. Dagleg leiar og eigar av firmaet er Rune Hodne.

Firmaet har over 100 store utleigecontainerar for næringsavfall utplasserte frå Kristiansand til Haukeligrend. I tillegg ein heil del mindre containerar. Verksemda tek også på seg grave- og anleggsarbeid og transportoppdrag. Ein viktig del av verksemda er vegvedlikehald. Firmaet har kontrakt med Statens vegvesen om vedlikehald av sidevegar, rasteplassar og liknande. Selskapet har også kontrakt med Bygland kommune om vintervedlikehald (brøyting og strøing) på Byglandsfjord, i Grendi og på Longerak.

Vinteren 2016/2017 bygde verksemda ny 600 kvadratmeter stor sorteringshall for næringsavfall ved basen på Evjemoen. I hallen er det også kontorlokale og lager.

Omsetninga i selskapet i 2015 var om lag 8 millionar kroner. I 2016 steig ho til kring 11 millionar. Det var då 15 tilsette i firmaet.

Kjelder

• Ole Birger Lien, 600 kvm sorteringshall for avfall, artikkel i Setesdølen nr. 5, 2017, side 12
• Om Rune Hodne Transport og Graving AS på Proff.no