Vetrhusvegen
Foto: Geir Daasvatn
Vetrhusvegen er ein om lag to kilometer lang privat grusveg på heia frå Yksenskårvegen ved Nautevaknuttane til garden Vetrhus og Vetrhusvatnet nord-vest i Evje og Hornnes kommune. Heiegarden Vetrhus var veglaus heilt fram til 1978-1979, då Yksenskårvegen vart bygd frå Fylkesveg 353 ved Håvestøl i Fiskårdalen i Åseral fram til garden Yksenskor i Evje og Hornnes. Samstundes som vegen til Yksenskor kom, laga ein avstikkaren til Vetrhus. Yksenskårvegen er stengd med bom, så ein må ha avtale med grunneigaren for å køyre med bil på både den vegen og Vetrhusvegen.
Kjelder
- Olav O. Uleberg, Kultursoge for Evje og Hornnes, band I, utgjeve av Evje og Hornnes bygdeboknemd, 1990, side 207