Gloppefossen
Gloppefossen er ein foss i Valle kommune. Fossen er 280 meter og den høgaste fossen i Setesdal. Fossen er ein del av Veiåne, som kjem frå Husebøvatnet. Vassføringa er stor i fossen heile sommarhalvåret, så fossen er verd å sjå og i turkeperiodar.
Å kome dit
Parkering kan skje ved Riksveg 9 like nord for Lunden camping. Det er merka tursti inn Veiåjuvet til Gloppefoss. Fyrste delen av turen går på grusveg, sidan vert det traktorveg. Det er ein flott natur med høge fjell på begge sidene av elva «Veiåne». Turen inn til fossen tek om lag 2 timar. Det er ikkje hytter eller hus i området der vegen går. Ein skal krysse Veiåne fleire gonger, normalt er det ikkje noko problem, då elva ikkje er djup. Ved normale vertilhøve høver turen godt for familiar med born. Etter langvarig regnver auker vassføringa i elva kraftig og ein lyt vurdere om kryssing av elva er trygt.