Notto Halland

Notto Halland (Notto Birkås) var fødd på husmannsplassen Birkåsen i Hornnes i 1872 og døydde i 1942. Faren var Alv Simonson Birkås og mora var Tomine Birkås. Han var gift med Gunhild Halland (Gunhild Birkås), som opphaveleg kom frå Valle. Ho var fødd i 1877 og døydde i 1961. Saman hadde dei seks born. Notto hadde mange syskjen, eitt av dei var treskjeraren Salve Birkås.

Notto kjøpte ein parsell av Børuf Hornnes og bygde opp hus der i 1904. Han kalla dette småbruket Halland, og borna hans tok då dette namnet som sitt etternamn. Fødestaden hans, Birkåsen, låg aude ei stund utover i 1920-åra. Men kring 1927 fekk han kjøpt tilbake Birkåsen med litt utmark, og busette seg der.

Notto var etter det som vart sagt ein uvanleg flink arbeidsmann. I fleire år var han gravar og kyrkjetenar i Hornnes kyrkje, eit arbeid han heldt fram med til han døydde i 1942, 70 år gamal.

Kjelder

• Olav O. Uleberg, Hornnes I. Gards- og ættesoge, utgjeve av Hornnes bygdesogenemd, 1969
• Torgrim Dåsnes og Alf Georg Kjetså, Treskjeraren Salve Birkås, hefte utgjeve av Evje og Hornnes sogelag, 2007