Terje A. Fidjeland

Terje Aanonson Fidjeland (fødd 1865, død 1. april 1914) var børsemakar og oppfinnar. Han var son av Aanen Fidjeland, som saman med foreldre og søsken hadde flytta frå Ånebjør i Bygland til Vestre Fidjeland i Iveland i 1861.

Terje kjøpte eigedomen Fosstveit på Birketveit i Iveland, tett ved elva Langsima. Her bygde han ein mekanisk verkstad. Kraftspørsmålet løyste han med å bygge ein stor stem i Kinnarfossen, rett ovafor verkstaden. Han lagde eit nytt armégevær, men tapte i konkurransen mot Krag og Jørgensen. Seinare arbeidde han med halv-automatvåpen.

Terje Fidjeland døydde brått i 1914, og ingen heldt fram med arbeidet hans. Verkstaden blei seld og flytta. Stemmen i Kinnarfossen og ruinane etter den mekaniske verkstaden står att på staden.

Kjelder

• Aslak Fjermedal, Iveland I - Gards- og ættesoge, utgjeve av Iveland bygdesogenemnd, 1955, side 542