Typleband
Typleband er eit band som høyrer til Setesdalsbunaden. Det er eit band som blir fletta inn i hårflette eller lagt rundt håret om det er sett opp i topp. Ordet «typle» har samanheng med topp i tydinga hårtopp. Slikt band er kjent tilbake til 1600-talet.
Bandet er vove på bandvevrei med renning av bomullstråd og med innslag av ulltråd der raudt er hovudfarge. Opphaveleg var garnet heimespunne, men sidan vart det vanleg å bruke «løyegån», laust tvinna fabrikkspunne ullgarn. Mønsteret kan vere kross og kringle, doble krossar eller sikk-sakk. Breidda er 2 cm og lengda er tilpassa lengda på håret, 2,5 - 3 meter. Det blir avslutta med ein dusk.
I 2018 laga ein Kjell Einar Kana i Kreativ Videoproduksjon ein dokumentasjonsfilm om typleband for Setesdalsmuseet. Den syner May-Lis Flateland i arbeid ved veven.
Kjelder
- Aagot Noss: Stakkeklede i Setesdal 2008 ISBN 978-82-7099-477-9 side 13-20
- Valle Bygdekvinnelag: Rette klede i Setesdal 1999 ISBN 82-995252-0-9 side 60
- Innslag om typlebandprosjektet i Onsdagssending i Valle Radio 20180117