Gunnar O. Abusdal

Gunnar O. Abusdal
Født:	1841
Død:	1903 (alder 61–62)

Gunnar Olson Abusdal (fødd 1841, død 1903) var handelsmann i Dåsnes og lokalpolitikar i Hornnes.

I unge år var Gunnar Abusdal lærar. Men så tok han til med handel. Først hadde han landhandel på Moi. Men så kjøpte han fleire eigedomar i Dåsnes i 1884 og byrja med landhandel der. Eigedomen med dei opprinnelege husa han hadde blei teken att på odel. Han bygde då nye store hus på austsida av hovudvegen, som i den tida gjekk midt gjennom Dåsnes, og heldt fram med handelen. I desse svære husa er det framleis forretning, no daglegvarebutikken Joker Dåsnes.

Nokre år før det blei vedteke å bygge Setesdalsbanen, slo Gunnar Abusdal til seg Jortveitmoen og kjøpte også eit stykke utmark på Byglandsfjord. Han rekna med at det kom jarnbanestasjon i nærleiken av Dåsnes om jarnbanelina vart lagt på Hornnes-sida av Otra, og at det kom endestasjon på Byglandsfjord om lina kom på austsida av elva. Det seiast at han skal ha fått kjennskap til at Byglandsfjord ville bli endestasjonen for Setesdalsbanen av slektningen sin, statsråd Åsulv Bryggeså. Han kjøpte då (1886) Salbergmoen, som flata der tettstaden Byglandsfjord seinare vaks fram vart kalla på denne tida. Etter at endestasjonen faktisk kom på Byglandsfjord, blei det selt mange hustomter der. I Jortveitmoen kom Hornnes landsgymnas.

Gunnar Abusdal sat i kommunestyret i Hornnes i 1867-1871 og 1883-1897. Han var far til Torgeir G. Abusdal, som overtok forretninga etter faren og også var ein markant lokalpolitikar i Hornnes.

I offentlege kjelder nyttast ofte Gunder som fornamn, men som seinare vart til Gunnar.

Kjelder

• Olav O. Uleberg, Hornnes I, Gards- og ættesoge, utgjeve av Hornnes bygdesogenemd, 1969, s. 193-194
• Elin Kallhovd
• Sigurd Abudal, Or soga om Byglandsfjord, artikkel i Jol i Setesdal, 1987, s. 29-32