Hallvard Eldhuset
| Hallvard Eldhuset | ||
|---|---|---|
| Fil:Bygland, Sandnes kyrkje, Hallvard Eldhusets gravsten crW DSC.JPG | ||
| Hallvard Eldhuset si grav ved Sandnes kyrkje i Åraksbø | ||
| Født: | 9. juni 1914 | |
| Død: | 3. desember 1976 (62 år) | |
Hallvard Eldhuset (fødd 9. juni 1914 i Åraksbø, død 3. desember 1976) var lærar og skuleinspektør i Bygland kommune. Han vaks opp på gard i Åraksbø og lærde bondeyrket å kjenne alt frå tidlege barne- og ungdomsår. Seinare overtok han saman med kona Birgit, fødd Åkre, heimegarden i Åraksbø, der tre gutar vaks opp.
Han gjekk befalsskulen i Kristiansand, der han var ferdig i 1937. Deretter tok han examen artium. Så vart det lærarskuleeksamen i Volda i 1941 og hadde så lærarpost på Tjøtta på Helgeland eit års tid. I 1942 kom han heim att og vart lærar i Bygland kommune, dei fyrste åra i framhaldsskulen, som flytte frå grend til grend men etter kvart vart fast på Bygland. I åra 1947-1951 var han lærar ved Evje framhaldsskule. Etter kvart vart han skuleinspektør i Bygland kommune. Olav Arne Kleveland, som var eleven til Eldhuset medan han var lærar på framhaldsskulen i Evje, har skrive at han var ein av dei mest dugande, mest energiske og mest ansvarsfulle lærarane han hadde hatt. Kleveland meiner Eldhuset må gå inn i skulesoga for Setesdal som ein av dei absolutt beste pedagogane dalen har ått.
I mange år var han meldar i Fædrelandsvennen frå Bygland kommune. Seinare skreiv han andaktane i Setesdølen då den tok til å kome ut. Som lyrikar hadde han ein djup religiøs undertone i dikta, og han var sterkt engasjert i sundagsskulen. Men også mållagsarbeid og fråhaldsarbeid engasjerte han seg i.
I fleire periodar var han medlem av kommunestyret i Bygland, og i 1969 stod han på 3. plass på lista til Stortingsvalet for Kristeleg Folkeparti i Aust-Agder. Som medlem av kommunestyret var han og med i ei rekke nemnder og utval i kommunen.
Hallvard Eldhuset skreiv og i Jol i Setesdal og laga prologar og dikt til ulike samanheengar. Setesdalsforlaget gav i 2010 ut ei bok med dikt i utval ved Ånund K. Homme.
Bibliografi:
- Djupt gjennom berg det hjalar. Dikt. Setesdalsforlaget 2010. ISBN 978-82-92441-72-5
Kjelder
- Olav Arne Kleveland, Eit år på framhaldsskulen, artikkel i Jol i Setesdal, 2006, s. 28-30