Husmannsplassen Hagen

Husmannsplassen Hagen i 2015.

Foto: Geir Daasvatn

Fil:Hagen husmannsplass Lauvdal Bygland 261216.jpg

Hagen 26. desember 2016.

Foto: Geir Daasvatn

Husmannsplassen Hagen ligg lengst nord på Lauvdal i Bygland. Plassen blei fråflytta på 1960-talet og har fått stå urørt sidan. I dag er han ein del av bygningsmassen til Setesdalsmuseet. Plassen ligg ved den gamle trasèen til Rv-9 gjennom bygda.

Husmannsskipnaden hadde eit stort omfang i delar av Setesdal. Hagen på Lauvdal er ein av dei få stadene der ei husmannsstoge er teken vare på i sitt opprinnelege miljø, utan ombygging m.m.

Historie

Hagen var husmannsplass under Nedre Nordgarden, og høyrde til bruket Nordlid. Det gjekk eit svært ras frå Ørnenapen i 1793. Mykje av den dyrka jorda i Nordgarden blei øydelagt av raset. Men den lille jordflekken som blei til Hagen, blei liggande igjen midt i ura.

Pål Gunsteinson Lauvdal (fødd 1839) skal ha vore den første som bygsla Hagen. Han blei i 1871 gift med Gunhild Jonsdotter Krosstog (fødd 1846). Bror til Pål, Såve Gunsteinson Lauvdal (fødd 1853) overtok Hagen og sat med plassen til han døydde i 1942. Såve var gift med Gunhild Sjølluvsdotter (fødd 1860). Eitt av borna deira, Gunstein S. Lauvdal, blei verande i Hagen etter foreldra sine. Han var vegvaktar i Bygland, men blei buande i stoga i Hagen heilt til han flytta til Byglandsheimen i høg alder.

I nokre kjelder heiter det at Hagen blei fråflytta på 1960-talet. Men i eit intervju med Gunstein i Setesdølen er det opplysningar som tyder på at han har budd der mykje lenger, til langt ut på 1970-talet.

Kjelder

• Lauvdal på Wikipedia (bokmål), besøkt 29. mars 2015
• Husmannsplassen Hagen - Olavsrosa
• Reidar Bolling, Gards- og ættesoge for Bygland, 1952, side 331, elektronisk utgåve hos Nasjonalbiblioteket

Eksterne lenker

• Bilete frå husmannsplassen
• Husmannsplassen Hagen på Kulturarv.no