Byremo

Byremo er ein tettstad og eit skulesenter ved nordre enden av Øvre Øydnevatn i Grindheim nord i Audnedal kommune. Her ligg Byremo vidaregåande skule, Byremo barneskule og Byremo ungdomsskule. Ungdomsskulen er interkommunal for Audnedal og Hægebostad. Her er også Byremo barnehage. I skuleområdet er det idrettshall, symjehall og idrettsanlegg med kunstgrasbane for fotball. I tettstaden er det to bedehus, Byremo bedehus og Eben-Eser Byremo. Grindheim kyrkje ligg på garden Grindheim, rett nord for Byremo. Dei fleste bustadhusa er samla i Hårtveitshei bustadfelt. Audnedal omsorgssenter ligg på Byremo. Det er også ein Joker-butikk i sentrum.

Fylkesveg 460 går sørfrå gjennom Audnedalen forbi Byremo til Fylkesveg 42 ved Håland. Fylkesveg 503 går i austleg retning gjennom Selandsdalen til Bjelland i Marnardal.

Grindheim var eigen kommune frå 1902 til heradet blei slege saman med Konsmo til Audnedal kommune i 1964. Byremo var i desse åra administrasjonssenteret. I dag ligg det på Konsmo.

Kjelder

• Knut Flaat, Grindheim, kapittel i Norges Bebyggelse, herredsbindet for Vest-Agder, vestre del, Faglitteratur AS Trondheim, opptrykk 1997, side 264-276
• Kommunekart.com
• Nettsida til Byremo vidaregåande skule
• Om Byremo barneskule på heimesida til Audnedal kommune
• Om Byremo ungdomsskule på heimesida til Audnedal kommune
• Om Byremo barnehage på heimesida til Audnedal kommune
• Joker Byremo

Kart

Laster kart ...