Torleiv H. Bjørgum

Torleiv H. Bjørgum
Født:	25. mai 1921
Død:	9. februar 1990 (68 år)

Torleiv H. Bjørgum (fødd 25. mai 1921, død 9. februar 1990) var spelemann og kvedar. Han spelte også munnharpe. Han var dessutan sølvsmed, og bygde opp Sylvartun på Nomeland. Han budde på småbruket Kåsland på Bjørgum i Hylestad.

Som spelemann la Torleiv seg spesielt etter spelet til Knut Jonson Heddi. I stevkveding var han ein av dei fremste utøvarane i Noreg. Han var ein av dei få i si tid som meistra tradisjonelt setesdalsspel på munnharpe.

Torleiv H. Bjørgum var med i skriftstyret som stod bak utgjevinga av jubileumsboka til Setesdal spelemannslag 1930-1980. Boka kom i 1981.

Foreldra til Torleiv var Hallvard T. Bjørgum sr. og Helga Bjørgum (fødd Heimigard Rysstad). Folkemusikaren Hallvard T. Bjørgum er sonen til Torleiv.

Heider

• Aust-Agder fylke sin kulturpris 1971 for fortenestefull utøving av norsk folkekunst
• Målprisen til Bygland mållag
• NRK sin Krystallvase
• Ei rekke 1. plassar på lokale kappleikar og Landskappleikar, både i spel og kveding
• Æresmedlem i Setesdal spelemannslag
• Spellemannsprisen 1990 saman med sonen Hallvard i klassen folkemusikk/gammaldans for plata Skjoldmøyslaget. Faremoslåttar frå Setesdal

Kjelder

• Gunnar Lande og Hallvard T. Bjørgum, Setesdal Spelemannslag 50 år. 1930-1980, jubileumsbok for Setesdal spelemannslag, 1981, side 377
• Artikkelen om Torleiv H. Bjørgum på Wikipedia (bokmål), besøkt 25. august 2016